Aswamisio 20 - AKITUTUKET NAKITETET (NEPEPEKA ISABULIN KA AWARAGASIA)

Adolore Makedonia ka Akaia

¹ Kedaun akinyaluna, konyarauni Paulo lukeyunak. Kedau akitogogong' kesi itawon, kinyekini kesi kosodi aikar Makedonia.

² Kitori nesi alarosinoi ng'un kosodi akitogogong' itung'a itawon. Kobuni akwap nako Akaia,

³ nama kideunere kolapio ka iuni. Kelokonikin nesi alosite Siria na kejenuna nesi ebe kejaasi Iyaudin lu kitemitemete akiar nesi; kanuka ng'un kotiakuni nesi abong'or akitoro Makedonia.

⁴ Keupasi nesi ka Sopata loko Beroea, okoku ka Firus ka Aristakus ka Sekundus alomun ko Tesalonike; kiton Gaius loko Derbe, kiton Timoti; kiton Tikikus ka Trofimus luko Asia.

⁵ Abutu lu kogeata ka akidereun siong' ko Troas,

⁶ konye abutu siong' kaikasi itosomaete ataker alomar ko Pilipi ketuborosi apaarasia nuka emugati kalo emam asipa, kasodete siong' abunere nama kes ko Troas, nama eboyata siong' apaarasia akanykaare.

Ilatokini Paulo Troas nakesial

⁷ Apaaran na sodit nakesabiti, itukokina siong' nenipe akinyama emugati, kosodi Paulo ejor ka kesi, ekote alomar apaaran na etupakini; kitowojae ejor keng' akitodol kiding' ka akware.

⁸ Kejaasi atarai ipu enokete kotogo kaloko kuju kama kitukokina siong'.

⁹ Kiboye esapat lokenyarite Yutikus ka adirisat. Kikamunete nesi ajoo noi na kitolositere Paulo akitowojat ejor; na kilanyata ajoo nesi, kosodi akibiror kwap alomun ko ogorofa kalokiuniet, kosekunete nesi etwanit.

¹⁰ Konye, koikari Paulo kwap kosodi aburiar nesi etunit, kotemari, “Mam ariang'un, naarai ejari nesi.”

¹¹ Keika Paulo kuju ka akibil emugati ka akinyama, kosodi nesi ejor ka kesi kapak kanakaujan, akitodol nakecilare akwap, koikari konye.

¹² Koyarete kesi etelepat ejari, kosodete itawon kes akinapakn noi.

Alomar ko Troas alosite Miletus

¹³ Kaikarete siong' akidok ameli kaikar Asos, nama etemokina siong' adumun Paulo kouparosi ka siong'. Alimokit nesi siong' akisoma nu, naarai alosi nesi ng'ina itosomae ebarabara.

¹⁴ Na adumuna nesi siong' ko Asos, ketodokete siong' nesi ameli, kosodi abunore Mitilene.

¹⁵ Kilomasi siong' kang'ina, kabunete siong' apaaran na atupakini akiteo ka Kios; kosodi apaaran na atupakini; kabunete siong' Miletus.

¹⁶ Naarai ketiakut Paulo atubor ko Efeso, tetere mam nesi kedauni apak ko Asia; naarai kiburiburi nesi adolore Yerusalem, kebeikini nesi adolore ka apaaran kanako Pentekost.

Isidari Paulo Imojong' luko Efeso

¹⁷ Ejii nesi Miletus kijukiari nesi akirot Efeso konyarakine nesi imojong' luka ekanisa.

¹⁸ Na kedolunata nama keng', kolimokini kesi ebe: “Osi ikulopek ijenete ekipone lo eboyata eong' nenipe ka osi apak kere ageun apaaran na sodit na ecakia eong' Asia,

¹⁹ ejaanakini eong' Lokapolon ka akiyapepera kere ka akio bobo ipu atamisio nu kadumunete eong' akitoro akitemitemiso ka Iyaudin akiara eong';

²⁰ ijenete osi ebe mam eong' akigwa ibore ipede ni ing'arakini osi esiarisiari eong' ka akisisianakin koking'aren ka itung'a nepepe ka oreria kus,

²¹ etejenunene eong' Iyaudin ka Igirikin akibelokin namaka Akuju nepepe ka akiyuun namaka Lokapolon wok Yesu Kristo.

²² Kipokona, kiteete, kanuka ayong'ite Emoyo Lokalaunan, alosi eong' Yerusalem, mam kajeni nu adumuni eong' kang'ina;

²³ adepar ebe ketodikit eong' Emoyo Lokalaunan ko ng'ol ere lokapolon kedarito eong' ayeno ka akisicanio.

²⁴ Konye mam eong' kanyut adumunete ka akijar kang' ka elope; ibore bon akote eong' adaun erait asoma nu einakit Lokapolon Yesu eong' asoma, akitejenar akiro nukajokak nuka asianut ka Akuju.”

²⁵ Kipokona, kiteete, ajeni eong' ebe osi kere lu esiarasiaraniki eong' akirot ka Akuju mam kianyunete aputo kang' bobo.

²⁶ Kanuka ng'un ketejenikini eong' osi apaaran na ebe mam aokot kus katupete eong',

²⁷ naarai mam eong' abu kakurianar akitodikin osi akirot ka Akuju kere.

²⁸ Kanuka ng'un kocoikinasi osi ikulopek bobo kocoikitete amerekekin nu einakini Emoyo Lokalaunan osi apolokite, kidarata ekanisa ka Akuju lo adumuni nesi kanuka abukor aokot ka Okoku keng'.

²⁹ Ajeni eong' ebe nape ka alomar kang', elomunete ipeen lukadedeng'ak kama kus, mam kideunete espan;

³⁰ bobo alomun kama kus ka ikulopek nes elomunata itung'a lu inerasi iboro luka aliokonu, akingalar lukeyunak nama kes.

³¹ Kanuka ng'un kokwenyete, itunenete osi ebe kokaru kiuni, mam eong' apalikin akware ka apaaran akikwenyanar osi ng'in itwan amonyi eong' akio.

³² “Kapak kana, egwakini eong' osi akanin ka Akuju nepepe ka akirot naka asianut keng', na ebeikini akiduk osi ka ainakin osi asulwany na ejaasi ka Akuju kanuka itung'a keng'.

³³ Mam eong' aminanar ka epuesa ka itwan, kere ka esawabu kere ka inagai.

³⁴ Osi ikulopek ijenete ebe esoma eong' ka akanin kang' kanu tetere adumakini eong' lu aupasi ka eong' nenipe ka eong' elope ng'in ibore ni akote eong'.

³⁵ Koboro kere etodiki eong' osi ebe asoma ka akinyinyira ejii itwan nice aking'arakin ni enonok, eitunene akiro ka Lokapolon Yesu ebe, ekipone lo abu nesi kotema, ‘Epolo arereng'u ainakin akilanya akidiaun.’ ”

³⁶ Kedau ejor ng'unu, kokukin kosodi akilipi ka kesi kere.

³⁷ Komonyata kesi kere kosodete akitun Paulo ka anuikin nesi,

³⁸ ituriete noi kanuka akirot kana kinerit nesi, ebe mam kesi kanyunete nesi bobo. Koyarete kesi nesi ameli.