Aswamisio 2 - AKITUTUKET NAKITETET (NEPEPEKA ISABULIN KA AWARAGASIA)

Abunore ka Emoyo Lokalaunan

¹ Kedolo apaaran naka Pentekost, kejaasi kesi kere nenipe alaro ape.

² Atipet kobuni eporoto kokuju bala ekuwam lokapolon, kosodi akilelebun otogo kere nama kiboyata.

³ Kosodete anyun iboro lu aputosi ka ang'ajepa nuka akimi nu kebutu kisiarakinosi ka akikamun ng'ini itwan kang'ina.

⁴ Kilelebai kesi kere ka Emoyo Lokalaunan kogeunete kesi ejori ka ang'ajepa ka ace kwape keinakina Akuju kesi apedor naka ejor.

⁵ Kejaasi Iyaudin lukiboyete ko Yerusalem, itung'a lukeminasi Akuju, lu kelomuto kang'in ilaro ka akwap.

⁶ Nape kiirarata iporotoi ng'ulu, kosodi akwap ka itung'a atukokin nenipe, koumokisi, naarai ng'ini ipe kama kes kebu kiira itung'a ng'ulu inerasi ka ang'ajepa kes.

⁷ Abutu kitimokisi ka aumokin, kotemarete, “Mere lu kere lu inerasi itung'a luko Galilaya?

⁸ Ekipone ali ipupiata oni kere kesi inerasi ka ang'ajepa wok?

⁹ Ilomuto oni ko Pasia, Media ka Elam; alomun ko Mesopotamia, Yudea kiton Kapadocia, Pontus kiton Asia,

¹⁰ Firijia ka Pamfilia, Misiri ka alarosinoi nuko Libia nu eraito nuko Kirene. Ice kama wok elomuto ko Roma,

¹¹ Iyaudin nepepe ka itung'a luka akwap lu lu atupito edini ka Iyaudin, ice alomuto ko, Krete kotoma Arabia, Kuretan ka Iwarabu. Konye siong' kere kipupi kesi inerasi ka ang'ajepa kuju ka akiro kanukapolok nuka Akuju.”

¹² Kitimok kesi, koumikisi, kaking'itanakin kesi ebe, “Inyena apolou kanu?”

¹³ Konye abutu ice kokwenatatare kesi ebalasi, “Emerasi.”

Ejori ka Petero

¹⁴ Kogwoi Petero nenipe ka ikiyakia itomon kaare luce kageun alimonokin akwapa ka itung'a koporoto kaloko kuju ebala: “Iyaudin ka osi kere lu iboyete ko Yerusalem, kopuputu eong', bobo kinyekisi kalimoki eong' osi apolou kanu.

¹⁵ Mam itung'a lu kemerasi, naarai ering'a erait isaan iuni luka ataparacu;

¹⁶ konye nu eraito nu enerit ekadwaran Yoel”:

¹⁷ “Ebala Akuju ebe ka apaarasia kanuka esial esomakini eong' nu: Abukokini eong' Emoyo kang' nama kang'in itwan. Itelepai kus ka apesur kus edwarunete; anyunete lukatumunak kus ng'unu nu emam ketakanete, Imojong' kus ebunete eruja.

¹⁸ Eebo, atikere lukejaanakinak kang'; ikiliok nenipe ka aberu, abukokini eong' kesi Emoyo kang' ka apaarasia kang'un, kosodete kesi alimonor akiro kang'.

¹⁹ Abuni eong' akisomakin aumosia kokuju kiton nuka akitim ka akwap. Ejaikinosi aokot, akimi, ka apuru nakapolon;

²⁰ irionari akolong', ering'ari elap kwape ka aokot, ering'a apaaran nakapolon kiton nakajokan ka Lokapolon kebuna.

²¹ Ng'ini kere ni enyarauni Lokapolon king'arak nesi eyuuno.”

²² “Itung'a kang' luko Israel, kiirasi akiro nu. Arait Yesu loko Nasareti etwan lo apon kitodune kama kus akitor aumosia kanuka akitim nu abu Akuju kisoma itorit nama keng'. Ijenete osi ikulopek nu, naarai esomakinosi kokiding' kus.

²³ Atupa ka ekipone kalo kitemitemiter nesi elope, kedaut Akuju atiakun ebe koinakine osi Yesu; koarete osi nesi kokipone kaloka akinyekin itung'a lukarokusio ibubukinete nesi omusalaba.

²⁴ Konye kitajaruni Akuju nesi, kolacakini nesi alomun ka apedor keng', naarai amam atwanare abeikiit akiene nesi.

²⁵ Naarai abu Daudi kolim kuju keng' ebe”: “Abu eong' kanyu Lokapolon koking'aren kang' akolong'o kere; api nesi kama kang', mam eong' kabuni apodo.

²⁶ Kanuka ng'unu ileleba eong' alakara, akiro kang' de ileleba ka alakara. Atikere karait eong' ni abuni atwanare,

²⁷ naarai mam ijo kinyekini eong' ka akwap kanaka lukatwak; mam ijo kiisikini nikejaanakinan kon ni emunokina kobos kotoma adwi.

²⁸ Itodik ijo eong' irotin lu idirarito akijar, ajaus kon ilelebikin eong' alakara.”

²⁹ “Ikinacan, alimokini eong' osi kuju ka lokasonya Daudi ebe kebu kotwana konukete, bobo ates keng' ejaasi ka oni akitodol lolo.

³⁰ Arait nesi ekadwaran lo ajeni nu kitumunikiit Akuju nesi: Kiyapokiit Akuju ebe itarauni nesi ejakait ipe kamaka auri ka Daudi, kwape kejaare Daudi.

³¹ Kanyuti Daudi nukelosi Akuju akisomakin ka apaarasia kanuko king'aren. Kanuka ng'un kinerit nesi kuju ka ajarun ka Kristo na ketemara: ‘Mam apon kinyekine nesi kakwap kanaka lukatwak; mam akwan keng' akibos ka ates.’”

³² Etajaru Akuju Yesu lope lo alomun ka atwanare, iraito oni kere ikajenak kuju kanu.

³³ Kedaun akikiari Yesu ka akigwakin nesi akan na teten ka Akuju, Papa keng', kodumuni Emoyo Lokalaunan kwape kitumunikiitere nesi. Nukipokona iteete osi ka akipup erait idutat keng' ni abukoki nesi kuju wok.

³⁴ Naarai mere Daudi nesi kelosi kuju; konye abu nesi kotema: “Kolimokini Lokapolon kang': Kiboikin ne teten kang'

³⁵ akitodol na egwakina eong' lukasurupi kon kwape ka ekicolong' ka akejen kon.”

³⁶ “Kanuka ng'un ejii itung'a kere luko Israel ajenun ka abeite ebe Yesu lo, lo ibubukinete osi omusalaba, nes erait lo etarau Akuju Lokapolon kiton Kristo!”

³⁷ Na kiirarata itung'a nu, kicanakinosi noi, king'isete Petero ka ikiyakia luce ebe, “Inyena ikokinete siong', ikanacan?”

³⁸ Kolimokini Petero kesi, “Ekotokina osi kere akinyekin arokusio kus ka akibatisaun kokiror ka Yesu Kristo, tetere erimakino arokusio kus; kosodete osi adumun idutat ka Akuju, Emoyo Lokalaunan.

³⁹ Naarai akitumunet ka Akuju kitenio kanu kus kiton idwe kus kiton ng'ulu kere lu ejaasi nama elwana, ng'ulu kere lu enyarauni Lokapolon Akuju wok nama keng'.”

⁴⁰ Kosodi Petero akimaima kesi itosomae akiro nu ipu ebala, “Koyutu awate kus kotoma ocan kalu ebuto nama ka itung'a kalukarokok kalu!”

⁴¹ Lu ipu kama kes abutu komunokisi akiro keng' kosodete akibatisa kesi, kosodete itung'a apiarito aritai auni akiyatakin apaaran ng'ini.

⁴² Kosodete kesi akitosoma akolong' kes akisisia kamaka ikiyakia emorete ka kesi kotoma akimorikikina kes, akibili emugati nepepe ka alipasia.

Akijar kamaka lukeyuunak

⁴³ Abutu aumosia nu ipu kanuka akitim kisomakinosi akitor namaka ikiyakia, kosodi ng'ini itwan akurianari.

⁴⁴ Kosodete lukeyuunak kere akitolosit nenipe kotoma akimorikikina, komorete iboro kes nenipe.

⁴⁵ Kogwelarete kesi abara kes nepepe ka iboro, kokorarete kere, atupa ka akiisitoi ka ng'ini itwan.

⁴⁶ Ng'ini paaran kotukonokinosi kesi Otogo ka Akuju, bobo anyemete nenipe ka oreria kes, kalakara kitawon kalu ejoka,

⁴⁷ iturete Akuju, elelikito ajokun kang'in itwan. Bobo eyatanakini Lokapolon atukot kes ng'ulu lu kilokonyunonosi.