Aswamisio 19 - AKITUTUKET NAKITETET (NEPEPEKA ISABULIN KA AWARAGASIA)

Paulo ko Efeso

¹ Ejii Apolo Korinto, kitori Paulo kiding' ka eprovins kosodi adolore Efeso. Kodumuni nesi lukeyunak kang'ina.

² Kolimokini nesi kesi, “Kibutu osi kodumutu Emoyo Lokalaunan na kiyunata osi?” Kinyakunete ebe, “Mam, mam siong' atikere kirarito ebe ejii Emoyo Lokaunan.”

³ King'isi Paulo kesi ebe, “Ebatisim ali kidumunete osi?” Kinyakunete ebe, “loka Yoana.”

⁴ Kotemari Paulo ebe, “Akibatisa ka Yoana kerait naka akibelokin, elimonokini itung'a akiyuun ng'olo lo ebuut kedau nesi, nes Yesu.”

⁵ Nape kirarata nu, kibatisaete kesi kokiror ka Lokapolon Yesu.

⁶ Na kedauna Paulo akidokokin akanin keng' kuju kes, kobuni Emoyo Lokalaunan nama kes; kosodete kesi ejor ka ang'ajepa kanu pejok, bobo kodwarete.

⁷ Kesi kere lukejaasi kapiarito itomon ka iare.

⁸ Kolomi nesi osinagog, kosodi nesi ejor ka itung'a mam akurianu kolapio iuni, epegasi ka kesi imaimai kuju ka ajakanut ka Akuju.

⁹ Konye kicasito ice kama kes akwes kong'erete amunokini, kinereta kesi koking'aren ka itung'a kere nukarokok kuju ka Erot ka Lokapolon. Kolomari Paulo kama kes kaupari ka lukeyunak. Kosodi nesi ng'ini paaran akinamanama ko otogo kalo isisianakinere ko Tiranus.

¹⁰ Kitolototo nu kokaru ka iare, akitodol na kiirarata itung'a kere, Iyaudin ka Igirikin, lu kiboete ko Asia akirot ka Lokapolon.

Itelepai ka Skefa

¹¹ Abu Akuju kisoma aumosia akitor nama ka Paulo,

¹² akitodol na ayarere ikitambalia keng' ka akabutin keng' nukenapit nesi, kolomarete adekasia kama kes.

¹³ Kosodete Iyaudin de ice lukiremosi ireng'ianarete ipaara ko otung'a atamakin akitosoma ekiror ka Lokapolon Yesu asoma nu. Kolimokinete kesi iparaa ebe, “Kolomutu kokiror ka Yesu, lo elimonori Paulo kuju keng'.”

¹⁴ Kisomaete nu isapa ikanykaare luka esaserdotit lokapolon kalo kerait Eyaudit lokenyarite Skefa.

¹⁵ Konye kobong'okini kesi eparait ebala ebe, “Ajeni eong' Yesu, ajeni eong' Paulo; konye ng'ai osi?”

¹⁶ Koporokini etwan lokikamuut eparait kesi ka agogong'u ka akitelekar kesi, akitodol na kemotarototor kesi kotogo esekeny bobo ikang'asite.

¹⁷ Abutu itung'a kere, Iyaudin kiton Igirikin lukiboyete ko Efeso kojenutu nu; kikamuni kesi kere akurianu; kosodi ekiror ka Lokapolon Yesu apolor.

¹⁸ Kobunete lukeyunak ipu, iyamoete koking'aren ka itung'a ka alimonor nu kisomato kesi.

¹⁹ Kosodete ng'ulu lu ipu lu kemuruoete ayaun ikitaboi kes nenipe ka akicwe koking'aren ka itung'a kere; kimarete etyae kes kodumunete erait etyae ipuesai aritai akaisakany.

²⁰ Kanuka ng'un, kosodi akirot ka Lokapolon akisiarakin bobo kiyatakin apedor keng'.

Ejie ko Efeso

²¹ Na kedaunototore nu akisomakin, kotiakuni Paulo kotau keng' akitor Makedonia kiton Akaia kolosi Yerusalem ebala ebe, “Na kadauna eong' ajaus ng'ina, itemokina eong' anyun Roma de.”

²² Kijukia nesi Timoti kiton Erastas, iare kamaka lu king'arakito nesi, kosodi nesi elope akideun ko Asia apak adiosi.

²³ Apak ng'ini, nes ajaikiner akinyalun ko Efeso kanuka Erot ka Lokapolon.

²⁴ Kejii etwan epe lokenyarite Demetrio lo kitenenene aputon ka etogo ka akuju kana beru na anyarite Artemis. Koinutu asoma ng'un lukadukok keng' adumunete na epolo noi.

²⁵ Kotukokini Demiterio lukesomak ng'ulu nenipe kaluce lukejaasi ka asoma bala ng'unu, kosodi alimokin kesi, “Ijenete osi ebe abara wok elomuut kobele kalo.

²⁶ Bobo iteete osi ka akipup ebe mere Efeso bon konye apiarit Asia kere nes emaima Paulo lo kakibelokin itung'a lu ipu, ebala ebe akujun nu itenite ka akanin mam keraito akujun.

²⁷ Icani lu ejaasi mam keraito amunaun ka ekiror kebele wok bon, konye ebe mam itung'a bobo keyong'ete etogo lo ilipere akuju na beru na enyarite Artemis. Bobo apolou keng' emudiaro akuju na imae ng'in itwan ko Asia kiton akwap kere.”

²⁸ Nape eirarata kesi nu, kokadakini kesi, kosodete adelor, “Epolo Artemis naka itung'a kaluko Efeso!”

²⁹ Kanuka ng'unu kinyalun ere lokapolon kere. Kikamuni anya ka itung'a Gaius kiton Aristakus, itung'a iare lu kidoute ko Makedonia, lu kelosete nenipe ka Paulo.

³⁰ Kekote Paulo akige kamaka anya ka itung'a, konye kirebokinete lukeyunak nesi;

³¹ Kosodete ice de kamaka lukapolok ka eprovins, lukeraito ipaupatin ka Paulo, akijukakin nesi akirot imaemaete nesi mam atakanun kotogo kaloka aboliasinoi.

³² Ice kemonyete ibore ipe, luce naarai enyaluna atukot, bobo itung'a lu mam ajenete atenikina na ketukokinototor kesi.

³³ Kotiakunete itung'a ice ebe Alekisanda nes kidupori isomakinosi nu, kanu kipiakitotor Iyaudin nesi king'aren. Kosodi Alekisanda akikiar akan keng' ekote akitataune itung'a ti, kotamakini nesi alimokin itung'a ebe emam nesi aronus.

³⁴ Konye nape kejenunata ebe kerait nesi Eyaudit, kocelunete kesi kere nenipe kosaan kiare ebalasi ebe, “Kitopolore noi Artemis loko Efeso!”

³⁵ Kedau ekegirigiran loko ere akitataun anya ka itung'a ti, kosodi nesi atemar ebe, “Itung'a luko Efeso, ng'ai itwan ni mam kejeni ebe ere loko Efeso nes idari Artemis nakapolon kiton amoru nakalaunan na kedacun kokuju?

³⁶ Konye kanu etakania ebe mam keng'erokino iboro lu, ekotokina osi ataus ti, bobo mam asoma ibore ipede mam osi kitunenete.

³⁷ Naarai iyautu osi itung'a lu ne lu mam kedemito siong' kere de ejor nukarokok kuju ka akuju wok na aberu.

³⁸ Kejaasi Demeterio kiton lukejaanakinak keng' ka ewosa kuju ka itwan kipede, ejaasi ijakaa bobo ejaasi apaarasia nu etubonokinere. Ebeikiite atubonokin kang'ina.

³⁹ Konye kejii ibore ice ni iring'a osi ikotosi, edauno ka atuket kanaka ng'ini paaran.

⁴⁰ Naarai ijaasi oni ocani luka atubokino lolo kanuka ejie. Kanu emam atenikina na inakinete oni akigang'a akinyalun na kere.”

⁴¹ Kedau ejor nu, kong'etakini atukot.