Aswamisio 18 - AKITUTUKET NAKITETET (NEPEPEKA ISABULIN KA AWARAGASIA)

Kotoma Korinto

¹ Kedaunosi nu kolomari nesi ko Atens kosodi aikar Korinto.

² Kodumuni nesi Eyaudit lokenyarite Akwila lokidouno ko Ponto, lo kelomuni pacu ko Itali nepepe ka aberu keng' na kenyarite Prisila naarai kicorakiit Klaudio Iyaudin kere kolomasi ko Roma. Alosit anyun kesi;

³ kanu kisomanana nesi de ebele lo kisomaenenete kesi kosodi akiboi ka kesi, kosodete asoma naarai keraito kesi lukesomak ebele loka akiten aemai.

⁴ Bobo enaminaminene nesi ko osinanagog ng'in Sabato etamakit akimaima Iyaudin kiton Igirikin.

⁵ Na kedolunata Sila kiton Timoti alomun ko Makedonia, esiarisiari Paulo akirot ka Akuju, itodianari kamaka Iyaudin ebe Kristo nes Yesu.

⁶ Nape kitepegiata nesi ka akirat nesi, kosodi akipukupukor inagai kolimokini kesi, “Kobukokinosi aokot kus akwes kus! Mam eong' aronus. Ageun kipokona aikari eong' olong'au.”

⁷ Kolomari kang'ina kosodi alosite otogo ka etwan kalo kenyarite Tito Justo, ekemaan Akuju; kidunyasi etogo keng' ka esinagog.

⁸ Komunokini Krispus, lo arait ejakait ka esinagog nepepe ka etogo keng' kere Lokapolon; na kiirarata Ikorinton ipu Paulo, komunokinete, kosodete akibatisa kesi.

⁹ Kolimokini Lokapolon Paulo kware ko oruja ebe, “Mam akurianu, konye kiner bobo mam ataus ti;

¹⁰ naarai ajaasi eong' ka ijo, bobo mam itwan nikilomikini ijo akikang'as ijo; naarai ajaasi eong' ka itung'a lu ipu kore kalo.”

¹¹ Kosodi nesi akideun kang'ina ekaru epe ka ilapio ikanykape, isisianakini akirot ka Akuju kokiding' kes.

¹² Na kerauna Galio egavana loko Akaia, kimorikikinosi Iyaudin nenipe alomikin Paulo, koyaunete nesi nama etubonokinere itung'a,

¹³ ebalasi, “Imaimai etwan lo itung'a kimaata Akuju kokipone kalo mam ekisil kecamakiit.”

¹⁴ Konye aput Paulo ang'ar akituk keng', Kolimokini Galio Iyaudin ebe, “Kere cut korait kuju ka adiakar kere de kuju ka akibil ekisil, tia eong' apupokini osi, okwai Iyaudin;

¹⁵ konye kanu eraitere ang'itasia kuju ka akiro ka iroria nepepe ka ikisila kus ka ikulopek, kodautu osi ikulopek; ang'ere eong' lokatubonokinan ka iboro kalu.”

¹⁶ Kireng'iar nesi kesi kama etubonokinere.

¹⁷ Kosodete kesi kere akikamun Sostenes, lokepolokiit esinagog, kibung'aete nesi koking'aren kama etubonokinere. Konye mam Galio ariangg'un kuju kanu.

Abong'or Antiok

¹⁸ Paulo akideun ko Korinto kaparasia ipu nepepe ka Ikristayon, kosodi konye akinyekin kesi kosodi aikar Siria nepepe ka Prisila kiton Akwila itosomae ataker. Kobareno itima keng' ering'a ejii Kenkrea, naarai kejaasi nesi ka eyapo.

¹⁹ Kolosete Efeso, kosodi nesi akinyekin kesi kang'ina; konye nesi elope kolomi osinagog akinamanama ka Iyaudin.

²⁰ Na king'isiata kesi nesi kitolosite akiboi, kong'eri nesi;

²¹ konye inyekini nesi kesi, kotemari, “Abong'uni eong' nama kus kerait amina ka Akuju,” koikari ka ataker Efeso.

²² Na kedolia nesi Kaesarea, kolosi nesi Yerusalem kosodi akimala ekanisa kosodi aikar Antiok.

²³ Kedau akiboi kang'ina ka apak adis, koikari ka akirim itorit alaro nako Galatia kiton Pirigia, itolosit akitogogong' ikiyakia kere.

Apolo ko Efeso kiton Korinto

²⁴ Kobuni Efeso Eyaudit lokenyarite Apolo, lokidoute ko Alekisandria. Kerait nesi etwan lo kejeni ejori noi, kejeni Agirasia noi.

²⁵ Kisisianakite nesi kuju ka erot ka Lokapolon; bobo ileleba nesi emoyo kinere nesi ka akisisianakin mam kediiakit iboro kuju ka Yesu, konye kejen nesi kuju ka akibatisao ka Yoana bon.

²⁶ Kogeuni nesi ejor mam akurianu ko osinagog; konye nape kiirarata Prisila ka Akwila nesi, kosodete kesi ayari nesi ka akisisianakin kotenan kuju ka erot ka Akuju.

²⁷ Na kekotore Apolo adokar alosite Akaia, kosodete lukeyunak ko Efeso aking'arakin nesi, kigirakinetelukeyunak ko Akaia imaemaete kidiautu nesi. Na kedolia, kosodi nesi aking'arakin noi kang'ulu lukebu asianut ka Akuju koinak apedor naka araun lukeyunak,

²⁸ naarai kebu nesi kilany Iyaudin kapega koking'aren ka itung'a, itosomae nesi akiro nukalaunak akitodiar ebe Kristo nes Yesu.