Aswamisio 16 - AKITUTUKET NAKITETET (NEPEPEKA ISABULIN KA AWARAGASIA)

Euparosi Timoti ka Paulo kiton Sila

¹ Kobuni nesi Derbe ka Listra. Kejii ekesisian ng'ina lokenyarite Timoti esapat ka Ayaudit na akeyunan; konye kerait papa keng' Egirikit.

² Enerito lukeyunak kere nama ka jokan kuju keng' ko Listra ka Ikonio.

³ Akote Paulo kouparosi Timoti ka nesi; koyari nesi akepo kanuka Iyaudin lukejaasi alarosinoi ng'unu, naarai kejenete kesi kere ebe kerait papa keng' Egirikit.

⁴ Elosete kesi, etubitosi ko oreria ka lukapolok kosodete kesi alimonokin itung'a kotupata nu kebutu ikiyakia ka imojong' lukejaasi Yerusalem kitutubosi.

⁵ Kanuka ng'un, kicasete ikanisai ka amunokina kosodete akiyatanikin irwan ipu ng'in paaran.

Eruja ka Paulo ko Troa

⁶ Kosodete akitor alaro nako Pirigia ka Galatia na kiteong'eria Emoyo Lokalaunan kesi akisiarasiara akirot ka Akuju ko Asia.

⁷ Na kedoliata jewai ka Misia, kotamakinete akilomo Bitinia konye kirebokini kesi Emoyo ka Yesu;

⁸ kanuka ng'un, kosodete atubor ko Misia, ka aikar Troa.

⁹ Kotakanikini Paulo eruja kware: Kegwoi etwan loko Makedonia imaimai nesi ebala, “Okwai kobuu wai loko Makedonia king'arak siong'.”

¹⁰ Na kedauna eruja, nepeneni kaikarete siong' Makedonia, idauto siong' atyakun ebe kenyarit Akuju siong' akisiarasiara akirot keng' nama kes.

Akibelokin ka Lidia kiton Pilipo

¹¹ Kilomasi siong' ko Troas itosomaete ataker, kaikarete siong' ape ka ape akitoro Samotras, kaikar Neapolis,

¹² koikarete kang'ina Pilipi, ere lokapolon ko distrikt kaloko Makedonia nama kipugaete Iromayon. Keboot siong' kaneni apaarasia nu ipu;

¹³ apaaran naka Sabato, kalomarete siong' king'a ka erute, arir ka ang'olol, nama amunito siong' ejii alaro na ilipere; kasodete siong' akiboikin kwap kagwaun alimonokin aberu nu ketukokina nenipe.

¹⁴ Ape na kepupit siong' arait aberu na kenyarite Lidia, alomun ko ore lokapolon lo kenyarie Tiatira, naketegwelan inagai lu epusiaka, kemina nesi Akuju. Kong'ari Lokapolon etau keng' akipup nu kebala Paulo.

¹⁵ Na kibatisaere nesi nepepe ka itung'a keng', kimaimai nesi siong' ebala, “Kianyuto osi ebe amunokina eong' kamaka Lokapolon, kobutu otogo kang' akiboi.” Kacamunete siong'.

Eju Toma aenis ko Pilipi

¹⁶ Alosete siong' alaro na ilipere, kiriamakinos siong' ka apese nakejaanakinan nakejatatare ka eparait lo keinakiit nesi apedor naka adwarun nu isomakinosi koking'aren. Kedumanakini nesi ikapolok keng' ikabel ipu noi alomun ka asoma kanuka adwarunun.

¹⁷ Kigwapi nesi Paulo ka siong', emonyi ebe, “Eraito itung'a lu lukejaanakinak ka Akuju kana eliliara, lu elimonokinete osi kuju ka erot kaloka kakiyuno.”

¹⁸ Abu nesi kisoma nu kapaarasia kanu ipu noi. Konye kokadak Paulo, kosodi akibong' kalimokin eparait, “Kalimokini eong' ijo kokiror ka Yesu Kristo kolomu king'a kama keng'.”

¹⁹ Konye nape kanyunata ikulopek nesi, ebe adaun erot kes lo adumunata ikabel, kikamunete kesi Paulo ka Sila kosodete akigwosar kesi osokoni king'aren ka lukepugak;

²⁰ na kedaunata ayar kesi nama kalukatubonokinak, kotemarete, “Itung'a lu eraito Iyaudin, isialete ere wok lokapolon.

²¹ Isisianakinete ekitok lo mam ikisila wok Iromayon kecamuto kere de asoma.”

²² Kimorikikin akwap ka itung'a alomikin kesi; Kocilicilarete lukatubonokinak inagai ka Paulo ka Sila kosodi akicorakin kipotai kesi kapariko.

²³ Na kedaunata akibung'a noi kesi kocakakinete kesi aenis, ka alimokin lokedaran kidar kesi kojokan.

²⁴ Kedau adumun akicorasit na, kigwakin nesi kesi aenis nako toma ka akitok akejen kes.

²⁵ Konye kiding' ka akware, elipete Paulo ka Sila, bobo ekirukosi ikosiosinei luka akimaa Akuju, bobo apupete imabusun,

²⁶ atipete kojaikin akijang'ajang'a ka akwap, akitodol na kijang'ajang'akiner apetat naka aenis; kosodete ikekia kere ang'ari; kosodete irikoi kang'in itwan alacakin.

²⁷ Nakekwenyuna lokedaran aenis kanyun ebe eng'ara ikekia ka aenis, koutuni ekileng' keng' lokaujan ekote atwanikin, emunit ebe kesiata lukeyenite.

²⁸ Konye kodelori Paulo koporoto kaloko kuju ebala, “Mam atwanikin, naarai kijaasi siong' kere ne.”

²⁹ Kiworokini koinune nesi acaus, kolomi toma, kibirokin kwap akejen ka Paulo ka Sila,

³⁰ kosodi ayar kesi king'a kosodi atemar ebe, “Luka ang'osibib, inyena itemokina eong' asoma tetere elokonyuun eong'?”

³¹ Kotemarete ebe, “Komunok Lokapolon Yesu, kosodi ijo akilokonyun, ijo nepepe ka ere kon kere.”

³² Kosodete alimonokin nesi kiton ng'ulu kere lukejaasi otogo akirot ka Lokapolon.

³³ Kosodi nesi alemar kesi akolong' nipe ng'ini naka akware, kosodi akilot ajimii kes, kosodete akibatisa nesi nenipe ka itung' luko ore keng'.

³⁴ Koyari Paulo ka Sila otogo keng', ka ainakin kesi inyamat; kosodi nesi alakar nepepe ka ere keng' ebe kemunok nesi Akuju.

³⁵ Konye na kiwalara, kijukiarete lukatubonokinak ipolosi, “Kinyekisi itung'a ng'ulu koikasi.”

³⁶ Lokedaran aenis alimokin Paulo akiro nu ebala ebe, “Ejukutu lukatubonokinak akirot ebe kolakakine osi; kanuka ng'un kolomutu king'a kolototo ka aipuc.”

³⁷ Konye kolimokini Paulo kesi ebe, “Epotata kesi siong' koking'aren ka itung'a kere, katubokin siong', itung'a lu eraito itung'a luko Roma, bobo icakakisi kesi siong' toma aenis; bobo ekotosi kesi kipokona alacakin siong' etiiti? Mam! Kinyek kesi ikulopek kobutu alacakin siong'.”

³⁸ Kolimokinete luka ajore lukatubonokinak akiro nu, kosodete akuriana nape kiirarata ebe eraito Iromayon;

³⁹ kanuka ng'un, kobunete kesi akilip kesi akirimao. Kolemarete kesi king'a kalimokin kesi kolomasi kore lokapolon.

⁴⁰ Kolomarete Paulo ka Sila ka aenis, ka alosite otogo ka Lidia. Kang'ina kosodete anyuni ka ikanacan nepepe ka akanacan, kosodete ejor akiro nukaokisicat kesi itawon, koikarete.