Aswamisio 15 - AKITUTUKET NAKITETET (NEPEPEKA ISABULIN KA AWARAGASIA)

Atukot ko Yerusalem

¹ Konye kobunete itung'a ice alomun ko Yudea isisianakinete itung'a lukemunokiito Akuju ebe, “Kimam ijo kikepite atupa ka Ikisila ka Musa, mam ijo kibeikini ayuno.”

² Na kitepegata kesi Paulo ka Barnabas kuju ka akirot kana, koseunete Paulo ka Barnabas ka ice kamaka lukemunokiito Akuju kolototo Yerusalem nama ki ikiyakia ka imojong' kuju ka Akirot kana.

³ Kanuka ng'un ijukiarit ekanisa kesi, kitorete kesi Poenisia ka Samaria inerito kesi kuju ka akiyuuno ka Ilong'au, kitalakarete kesi lukeyunak kere.

⁴ Na kedoliata kesi Yerusalem, kidiauni ekanisa kesi bobo ikiyakia nenipe ka imojong', Kosodete kesi alimokin kesi ng'unu kere nu kisomat Akuju akitor nama kes.

⁵ Konye kosodete lukeyunak ice lukejaasi wai ka Ifarisayon akigwo, ka atemar, “Ejokuna akikepe kesi, bobo alimokin kesi ayong'ite Ikisila ka Musa.”

⁶ Kosodete ikiyakia ka imojong' atukokin nenipe akimor akirot na.

⁷ Kedautu apega ka apak kana auja, kogwoi Petero kalimokin kesi, “Lukeyunak, ijenete osi ebe lemu sek kebu Akuju koseu kokiding' kus ebe akitor akituk kang' nes irarata Ilong'au akiro nukajokak kosodete amunokin.

⁸ Konye Akuju lo ejeni etau, abu kitodia kama kes, ka ainakin kesi Emoyo Lokalaunan kwape kisomakitere oni';

⁹ Mam nesi akitegelikin oni' ka kesi konye abu kilot itawon kes kakiyun.

¹⁰ Kanuka ng'un, inyo konye itamiata osi Akuju kokipone kaloka akigwakin amajok omorising' ka ikiyakia na mam kes ka papa wok kere oni kibeikinete akidak?

¹¹ Konye kimunokiito oni ebe kiyuno oni akitor asianut ka Lokapolon Yesu kwape kes.”

¹² Kosodi atuket kere ataun ti; kopupokinete kesi Barnabas ka Paulo inerasi kuju ka aumosio kiton nuka akitim nu king'arakini Akuju Barnabas ka Paulo kamaka Ilong'au.

¹³ Kedautu ejori, kinyakuni Yakobo ebe, “Ikanacan ka akanacan, kopupokisi eong'!

¹⁴ Adau Simon alimokin osi ekipone lo kegea Akuju alosikin Ilong'au, kalemun kama kes araun itung'a keng'.

¹⁵ Iriamara akiro ka ikadwarak kanu cut. Kwape ebalatatar agirasia nukalaunuka ebe”;

¹⁶ Ebala Lokapolon ebe, “Ketuborosi nu abong'uni eong', ka akiduk bobo ajakanut ka Daudi. Aduki eong' bobo akapong'or keng', kasodi eong' akitogwoo,

¹⁷ tetere ekotosi itung'a luce de kijokin Lokapolon, nepepe ka Ilong'au lu arautu lukeng'.

¹⁸ Ebala Lokapolon, lo etejenuuni iboro lu ageun apakio nu sek.”

¹⁹ “Kanuka ng'un atiakunet kang' erait ebe mam kilesikina oni akisican Ilong'au lu abong'utu nama ka Akuju,

²⁰ konye ekotokina akigirakin kesi kinyekinosi ki inyamat lukitoroni kanuka alemikin akujun. Bobo kinyekinosi kesi ka adoteu ka ibore ni emedite kiton akimata aokot.

²¹ Naarai ageun ape ka aturion nu sek, ajaikina Musa ka ng'ol ere Lokapolon ka itung'a lu isiarisiarete kuju keng', naarai isomaonono nesi ng'ini Sabato kosinagogin.”

Ebaruait nama ka lukeyunak lu mama keraito Iyaudin

²² Kosodi asubun ajokun kamaka ikiyakia ka imojong' ka ekanisa kere aseun itung'a kokiding' kes ka akijukiiar kesi Antiok nenipe ka Paulo kiton Barnabas. Kijukiarete kesi Yuda lo enyarite Barisaba ka Sila lu keyong'ite kamaka ikanacan,

²³ ejaasi ka epopula lo kebala ebe. “Lukeyunak nepepe ka siong' ikiyakia ka imojong', nama ka lukeyunak lu eraito ilong'au lu ejaasi kus, Antiok, Siria kiton Silisia amalan.

²⁴ Eirasi siong' ebe ejaasi itung'a ice alomun kama kosi esialata osi bobo etakadisi osi ka akiro kes; konye mam siong' ainakito kesi akicorasia apede,

²⁵ esit bala ajokunar kama kosi, kidautu siong' akiirar, aseun itung'a ka akijukun kesi nama kus nepepe ka luminat kosi Barnabas ka Paulo nama Kus,

²⁶ itung'a lu epiakisi akijar kes ocani kanuka Lokapolon wok Yesu Kristo.

²⁷ Kanuka ng'unu ejukuyutu siong' Yudas kiton Sila, lu elimokinete kesi ikulopek osi iboro lupeng'ulu ka akituk.

²⁸ Naarai asit bala ajakuna kamaka Emoyo Lokalaunan nepepe ka siong' mam akiyatakin osi alang'iru ace adepar iboro lu itemokina:

²⁹ Ebe kinyekisi iboro lu kedaun ainakin akujun nepepe ka aokot; bobo iboro lu emiedakina; bobo inyekinosi ka adoteu. Kinyekisi osi asoma nu ibunete osi akitolosite kotenan. Kidara.”

³⁰ Kanuka ng'un, na kijukiarere kesi koikarete kesi Antiok; kedaun atukokin lukeyunak nenipe, kainakinete kesi epopula.

³¹ Nape kisomata kesi epopula, kosodete kesi alakar kanu kitogogong'orere kesi.

³² Kosodete Yudas ka Sila, lukeraito kesi ikulopek ikadwarak ejori akiro nu epuaka nuka akitogogong' ikanacan ka akanacan.

³³ Kedautu kesi akiboi kaneni kapak kadiosit, kisidarete lukayuunak kesi kaipuc kolototo namaka ng'ulu kalu kiyakito kesi.

³⁴ Konye kosodi Sila akideun.

³⁵ Konye kosodete Paulo ka Barnabas akideun ko Antiok, isisianakinete ka akisiarasiara akirot ka Lokapolon, nenepepe kaluce de.

Etiakasi Paulo ka Barnabas

³⁶ Kokau kolimokini Paulo Barnabas, “Kabong'osi akipejokin ikanacan ka akinacan wok kang'olo taun lo ibutu oni kalimonosi akiro ka Lokapolon, kajenutu ekipone lo itolositotor kesi.”

³⁷ Kekote Barnabas kouparosi kesi ka Yoana lokenyarite Mariko.

³⁸ Konye kwanyuni Paulo ebe mam kejokuna kesi ayar etwan lo kebu kinyekinosi ka kesi ko Pamfilia, bobo mam kelosito ka kesi asoma.

³⁹ Kojaikin apega na ketiaki kesi; Kosodi Barnabas ayar Mariko koikarete Saipras,

⁴⁰ konye kosodi Paulo aseun Sila koikarete, edauto ikinacan ka akanacan akigwakin kesi asianut ka Lokapolon.

⁴¹ Kitori nesi Siria ka Silisia itolosit akitogogong' ikanisai.