Aswamisio 14 - AKITUTUKET NAKITETET (NEPEPEKA ISABULIN KA AWARAGASIA)

Paulo ka Barnaba ko Ikonio

¹ Ejaasi kesi Ikonio, kolomete kesi nenipe osinagog ka Iyaudin, kosodete ejor lo ainakini itung'a lu ipu akiyuun, kere luka Iyaudin ka Igirikin.

² Konye Iyaudini lu keng'erito araun lukeyunak abu kicokutu ilong'au ka amunaun adama kes akitepeg lu iyuuto Akuju.

³ Kosodete ikiyakia akideun kang'ina apak nakaujan, inerasi mam akurianu kuju ka Lokapolon, lo kitodiari ebe akiro kes kuju ka asianut ka Lokapolon keraito nuka abeite naarai kebu koinak kesi apedor naka asoma aumosia kiton akiro nuka akitim.

⁴ Konye ketiakak itung'a luko ore lokapolon; ice kigang'ara ka Iyaudin, ice ka ikiyakia.

⁵ Nape ketamakinata ilong'au ka Iyaudin nepepe ka ijakaa kes akisican ikiyakia ka adada kesi ka amoru,

⁶ kojenunete ikiyakia kosodete amotari Listra kiton Derbe, itaunin luko Likaonia kiton akwap naka kimanakit;

⁷ kosodete kesi akisiarakin akirot ka Akuju kang'ina.

Paulo kiton Barnaba ko Listra kiton Derbe

⁸ Kejii etwan Listra kiboye, lo mam abeikini akitosoma akejene keng' keng'walit nesi ape kidounere, mam kelosit apelem.

⁹ Kopup nesi Paulo inera; kosodi Paulo ang'olekini nesi kojokan kanyuni ebe ejaasi nesi ka akiyuun naka akitang'aleuno,

¹⁰ kotemari keporoto kaloko kuju, “Kogwo ka kejene kon.” Kosodi adetun kuju, kalosite.

¹¹ Nape kanyunata akwap ka itung'a nu kisomakini Paulo, kikarete iporotoi kes kuju ebalasi kang'ajep kanako Likaonia, “Abutu akujun kwap nama wok eputosi ka itung'a!”

¹² Komaikinete Barnabas Seus. Komaikinete Paulo Ames kanu keraitere nesi lokapolon ka ejori.

¹³ Kosodi esaserdotit loka Seus lo kejii etogo keng' loka akilipi king'aren ka ere ka lokapolon ayaun imong'in ka aturo orutei ka akidutu ikiyakia isuban.

¹⁴ Konye nape kiirarata Barnabas ka Paulo nu, kosodete acilicil inagai kes ka amoskin kiding' ka akwap ka itung'a emonyete:

¹⁵ “Inyo isomata osi nu? Iraito siong' de itung'a kwape kus! Ijaasi siong' ne alimori akiro nukajokak, ebe ekotokina osi akibelokin alomuni kamaka iboro lu atai, abunere nama ka Akuju lo asubi akuju ka akwap ka akare kang'in kere ni ejii toma kes.

¹⁶ Ka awuri kanaka sek, abu nesi kocamak itung'a kere asoma nu keseuto kesi;

¹⁷ konye mam nesi ajaikin emam niketodiaran, naarai abu nesi kisoma nukajokak ka ainun osi akiru alomun kokuju ka apakio nukajokak. Italakarit nesi itawon kus ka inyamata ka alakara.”

¹⁸ Konye mam kesi abeikin akirebokin itung'a alemikin kesi isuban.

¹⁹ Konye kobunete Iyaudin ng'ina alomun ko Antiok kiton Ikonio; bobo kedautu akimaima itung'a akigang' kesi, kosodete adaada Paulo ka amoru kosodete akigwosar nesi ko ore ka lokapolon, ituto ebe ketwaana.

²⁰ Konye na kelukakinata nesi ikiyakia, konyouni ka akilom ore lokapolon; kosodi nesi ka Barnabas alosite Derbe apaaran na ketupakini.

Abong'or Antiok nako Siria

²¹ Kedautu kesi akisiarasiara akiro ka Akuju ore lokapolon kang'olo bobo kedumuto lukesisiaka, kobong'orete Listra ka Ikonio ka Antiok,

²² itogogong'orito itawon ka ikiyakia, ka akimaima kesi kitolositete ka a akiyuun, bobo ebalalsi ebe akitoro toma ocani ejii oni akilom toma ajakanut ka Akuju.

²³ Bobo na kedaunata asekin kesi imojong' ka ng'olo ekanisa, ilipete ka akikany eteng'e, kigwakinete kesi kesi nama ka Lokapolon lo kemunokiito kesi.

²⁴ Kosodete kesi akitoro Pisidia ka abunere Pamfilia.

²⁵ Bobo na kedaunata kesi akisiarasiara akirot ka Akuju ko Perga, koikarete kesi Atalia;

²⁶ alomun kaneni, koikarete kesi edokito ataker akwap nako Antiok, nama kigwakinere kesi asianut ka Akuju kanuka asoma kanu kisomato kesi.

²⁷ Na kedoliata, kotukokinete ekanisa nenipe kosodete alimokin kesi ng'unu kere nu kisomat Akuju ka kesi bobo ekipone lo keng'akina nesi Ilong'au ekek loka akiyuun.

²⁸ Kosodete akideun kang'ina ka apak kanakaujan nenipe kalu kiyuuto.