Aswamisio 11 - AKITUTUKET NAKITETET (NEPEPEKA ISABULIN KA AWARAGASIA)

Nu Kelimokini Petero ekanisa ko Yerusalem

¹ Abutu ikiyakia kiton ikanacan alomun ko Yudea kere kopuputu ebe kecamutu ilong'au de akirot ka Akuju.

² Kanuka ng'un keloto Petero Yerusalem, kitoronata nesi Iyaudin lukeminasi akepio,

³ ebalasi, “Inyo kilosia ijo nama kalu mam keraito Iyaudin akinyam ka akimat ka kesi?”

⁴ Kogeuni Petero alimonokin kesi alomun ka ageunet akitodol osial ebe,

⁵ “Ajii eong' ore lokapolon ko Yopa elipi. Abu eong' kanyu ibore koruja ijesuna alomun kokuju kwape ka esuka, eisikite kokonai kiwong'on. Kosodi akijesun nama kang'.

⁶ Etee eong' esuka kacan kotenan kama api, kanyuni eong' ibaren kiton ityeng' luko kitwi, kalu eliatosi kiton ikwenyi lu egelegela.

⁷ Ka apupuni eong' eporoto kalimokini eong', ‘Petero, konyou, kwaar, konyam.’

⁸ Konye katemari eong', ‘Mam, Lokapolon; naarai mam apelem ibore nikaronon kelomit akituk kang'.’

⁹ Konye kinyakuni eporoto na kiareit alomun kokuju ebe, ‘Ni etalau Akuju mam ijo kilesikina anyarite nikaronon.’

¹⁰ Kisomakinosi nu irwan kauni, kosodete akinyakar kuju.

¹¹ Akolong' ng'ipe ng'ini kodolunete ikiliok iuni otogo lo ajaasi siong', iyakute kesi nama kang' alomun ko Kaesarea.

¹² Kolimokini Emoyo Lokalaunan eong' alosite ka kesi atipete. Kosodete ikanacan ikanykape Akuju aupar ka eong' kalomete siong' otogo ka etwan.

¹³ Kosodi alimokin siong' kwape kanyuna nesi emalaikat egwoi ko otogo keng' ebala, ‘Kiyakia itwan Yopa koyau Simon lo enyarite Petero;

¹⁴ elimokini nesi ijo akirot na eyuni ijo nenipe ka etogo kon kere.’

¹⁵ Nape ageuna eong' ejori, kosodi Emoyo Lokalaunan abunere nama kes kwape abunia nama kosi sek.

¹⁶ Keituni eong' akirot na atemari Lokapolon ebe, ‘Yoana ebatise ka akipi konye osi ibatisao ka Emoyo Lokalaunan.’

¹⁷ Ejenun ebe keinak Akuju luka akwap idutan lupe einakiit oni iyuuto oni Lokapolon Yesu Kristo, ng'ai konye eong' abeikini akirebokin Akuju?”

¹⁸ Nape kiirarata kesi nu, kotaunete kesi ti. Kosodete akitur Akuju ebalasi, “Kanuka ng'un ainaki Akuju luka akwap apak naka akibelokin tetere edumunete akijar.”

Ekelesia ko Antiok

¹⁹ Abutu lukeyunak ice lukisiarakina kanuka akisicanio ka Stefan kolototo ka adolore Foenika, Saipras kiton Antiok elimonokinete Iyaudin bon akirot ka Akuju.

²⁰ Konye kejaasi ice kama kes, ikiliok alomun ko Saipras kiton Krene, lu nakebunata Antiok kosodete ejori ka agirikin de, elimonorete kuju Lokapolon Yesu.

²¹ Kejaasi akan ka Lokapolon ka kesi, kosodi akwap ka itung'a acamun akibeleun namaka Lokapolon.

²² Kobunete akiro nu akii ka ekanisa ko Yerusalem, kosodete kesi akiakiar Barnabas Antiok.

²³ Nape kebunia nesi kosodi anyun asianut ka Akuju kolakar nesi; kosodi nesi akimaima kesi kere akideun emunokito Lokapolon ka itawon kes kere;

²⁴ naarai kerait nesi etwan lokajokan, lokejaasi ka Emoyo Lokalaunan kiton akiyuun. Kosodete itung'a ipu akiyatakin namaka Lokapolon.

²⁵ Kosodi Barnabas aikar Tarsus akote Saulo;

²⁶ nape kedumuna nesi, koyari nesi Antiok. Naarai kokaru ka epe kere, kiriamakinosi kesi ka ekanisa, kosodete akisisianakin akwap ka itung'a; ko Antiok nes kegeere anyaraun lukesisiak Ikristayon.

²⁷ Kaparasia kanupe kang'un kebunenete ikadwarak Antiok alomun ko Yerusalem.

²⁸ Kosodi epe kama kes lokenyarite Agabus akigwo, kosodi adwarun ing'arakit Emoyo Lokalaunan nesi ebe ejaikin eteng'e lo epolo akwap kere; kisomakinosi nu apaarasia ka Klaudio.

²⁹ Kotiakunete ikiyakia akijukiar aking'arasit nama ka itung'a kalu eyong'ito Akuju lukiboyete ko Yudea;

³⁰ kisomakinete kong'in, ka ainakin Barnabas kiton Saulo aking'arasit kes nama ka imojong'.