Aswamisio 10 - AKITUTUKET NAKITETET (NEPEPEKA ISABULIN KA AWARAGASIA)

Petero kitoni Korineli

¹ Kejii etwan Kaiserea lokenyarite Korineli, Kerait nesi ekabuten koriong'et kanaka ajore kanakenyarite Itali,

² etwan lo kemina Akuju noi nenipe ka etogo keng' kere, king'aranakini itung'a lukapalapalak kilip Akuju ng'ini paaran.

³ Apiarit isaan ikanykaung'on, kwanyuni nesi kotenan koruja emalaikat ka Akuju ebuni toma alimokin nesi, “Korineli.”

⁴ Kitee nesi emalaikat ka akurianu, kotemari, “Inyena, Lokapolon?” Kolimokini emalaikat nesi ebe, “Acamu Akuju alipasia kon kiton ileman kon nama ka lukapalapalak, eitu nesi ijo.

⁵ Kanuka ng'un kijukiya kipokona ikiliok Yopa koyautu Simon lo enyarite Petero;

⁶ Iboyete ka Simon loketenan imukulei lo ejii etogo keng' ariri ka akare.”

⁷ Kedau emalaikat lo kinerasi ka nesi aikar, konyarauni nesi ukejaanakinak keng' iare kaloka ajore lo kemina Akuju epe kamaka ng'ulu kalukijanakinete nesi,

⁸ kosodi akijukiar kesi Yopa kedau alimonokin kesi ng'ini ibore.

⁹ Apaaran na ketupakini, elosete kesi, aputo kesi ore lokapolon koikari Petero kuju ka etogo akilipi, isaan ikanykape luka paaran.

¹⁰ Kiirari nesi eteng'e kosodi akote ibore ni nyamat; konye itenete kesi inyamat, kogeuni eruja

¹¹ kosodi anyun akuju eng'ari, kiton ibore ijesuna kwape ka esuka, ijesute kokonai ka iwong'on luka akwap.

¹² Toma keng' kejaasi ityeng' lu egelegela kiton lu eliatosi kiton ikwenyi lu egelegela.

¹³ Kolimokini eporoto nesi, “Konyou, Petero; kwara konyam.”

¹⁴ Konye kotemari Petero, “Mam, Lokapolon; naarai mam eong' apelem kanyemit ibore nikaronon.”

¹⁵ Kolimokini eporoto nesi bobo na kiareit ebe, “Mam kilesikina ijo anyarite ibore ni etalau Akuju nikaronon.”

¹⁶ Abutu nu kisomakinosi irwan kauni, koyarete esuka kuju atipet.

¹⁷ Ering'a Petero eomoomoe kuju ka apolou ka eruja kalo, kosodete ikiliok lu kiyakut Korineli adumun nama kejii etogo ka Simon. Bobo kegwoete ko orute.

¹⁸ Kiworokinete ka aking'it ebe, “Ejii ne epejonon lo enyarite Simon Petero?”

¹⁹ Ering'a Petero iitunene kuju ka eruja, kolimokini Emoyo Lokalaunan nesi, “Kopup, ejaasi ikiliok iuni ekotosi ijo.

²⁰ Konyou ka akijesar kwap, kouparosi ka kesi atipet; naarai ejukut eong' kesi.”

²¹ Kosodi Petero akijesari kwap nama kejaasi ikiliok kosodi atemar, “Eong' nesi etwan lo ikotosi osi. Inyo ibutetere osi?”

²² Kinyakuni, “Korineli ekabuten ka ajore, etwan lo edolit kiton lo eyong'it Akuju, etwan lo inera akwap kere naka Iyaudin nukajokak kuju keng' nes kitodikini emalaikat lokalaunan anyaraun ijo abunere otogo keng' kopup nesi nu ibala ijo.”

²³ Kidiauni Petero kesi otogo keng' bala ipejok keng'. Apaaran na atupakini konyouni ka aikar nenipe ka kesi. Kinyamakinete nesi itung'a ice lu kelomuto ko Yopa lu kemunokito Akuju.

²⁴ Apaaran na ketupakini kodolete kesi Kaiserea. Kiderit Korineli kesi bobo kenyarauti nenipe ekitekere keng' kiton ipoupatin keng'.

²⁵ Nape kelomia Petero toma, kosodi Korineli akisiriama nesi ka akibirokin akejen keng' ka akitamaa nesi.

²⁶ Konye kitonyouni Petero nesi ebala, “Kogwo; eong' de arait etwan.”

²⁷ Itolosit Petero ejori ka Korineli, kolomi Petero toma kosodi adumun itung'a ipu etukokina;

²⁸ kosodi alimokin kesi ebe, “Osi ikulopek ijenete ekipone lo mam ekisil kecamakiitere Eyaudit akimorikikin kere de akipejokin itwan kere nika akwap ka ace; konye ketodik eong' Akuju ebe mam ekotokina eong' anyaraun itwan ipede nikaronon.

²⁹ Kanuka ng'unu, nape kanyaraunere eong' abu eong' kabu mam apega. Eng'isit eong' konye inyo kinyaritere ijo eong'.”

³⁰ Kosodi Korineli akinyakun ebe, “Apaarasia auni nu atuborosi, apiarit akolong' kwape kana isaan ikanykaung'on elipi eong' kotogo kang'; kanepe kaneni kogwoi etwan koking'aren kang' enapit inagai lu imiliaete,

³¹ ebala, ‘Korineli, acamu Akuju alipasia kon kiton ileman kon nama ka lukapalapalak, eitu Akuju ijo.

³² Kanuka ng'unu kijukia kipokona ikiliok Yopa koyautu Simon lo enyarite Petero; iboye kotogo ka Simon loketenan imukulei lo ejii etogo keng' ariri ka akare.’

³³ Kejukuni eong' itung'a nama kon atipet, ejokuna ibu ijo. Kanuka ng'un ijaasi siong' kere ne king'aren ka Akuju akiirar ng'unu kere nu kicoraki ijo Akuju.”

Ejori ka Petero

³⁴ Kong'ari Petero Akituk keng' kosodi atemar: “Abeit, anyu eong' mam Akuju ketiakatiakae,

³⁵ konye ka akwapa kere itwan kere ni eyong'it Akuju kisomae nu ideerete ecamuni Akuju nesi.

³⁶ Ijenete osi akirot na abu nesi kijukak Israel, elimonori akiro nukajokak nuka ainapakina itorit nama ka Yesu Kristo (erait nesi Lokapolon ka itung'a kere),

³⁷ akirot na alimorio ko Yudea kere ageun ko Galilaya kedaun ebatism lo abu Yoana kolimo:

³⁸ Ekipone lo keseuna Akuju Yesu loko Nasareti kakijukakin nesi Emoyo Lokalaunan kiton apedor; ekipone lo kelosia nesi ng'in laro isomae nukajokak ka akitang'aleunun ng'ulu kere lu kisicani ajokit, naarai kejaasi Akuju ka nesi.

³⁹ Iraito siong' luketodiarak kuju kang'unu kere kanu kisomate nesi ka akwapin ka Iyaudin kiton Yerusalem. Abutu kwarata nesi kokipone kaloka akikacakin nesi okitoi;

⁴⁰ konye apaaran na kiuniet kitajaruni Akuju nesi kakitanyun nesi ko otung'a;

⁴¹ mere otung'a kere konye siong' lu aseun Akuju araus luketodiarak, siong' lu inyemete ka akimata ka nesi kedau anyoun kamaka lukatwak.

⁴² Kicorakini siong' alimonor akirot keng' ka otung'a, kalimonor ebe nesi nes lo eseut Akuju araus lokatubonokinan kalu ejarete kalu etwakito.

⁴³ Inerito ikadwarak kere kuju keng' ebalasi ebe ng'ulu kere lu emunakiito nesi erimakino arokusio kes ka apedor ka ekiror keng'.”

Edumunete ilong'au Emoyo Lokalaunan

⁴⁴ Ering'a Petero inera akiro nu, kobuni Emoyo Lokalaunan nama ka ng'ulu kere lu kepupete akirot keng'.

⁴⁵ Kosodete lukeyunak kamaka lu mam kekepite lu keupuna ka Petero aumokin, naarai edutat loka Emoyo Lokalaunan kedaute abukokin atikere ilong'au.

⁴⁶ Naarai kebutu kesi kiirasi kesi inerasi ka ang'ajepa kanu egelegela, iturete Akuju. Kotemari Petero,

⁴⁷ “Adumutu itung'a lu Emoyo Lokalaunan kwape idumunata siong' de. Ebeikin itwan ipede akirebokin kesi akibatisao ka akipi?”

⁴⁸ Kicorakini nesi kesi akibatisaun kokiro ka Yesu Kristo. Kosodete kesi akilipi nesi akiboi ka kesi apaarasia adis.