Apukokinio 9 - AKITUTUKET NAKITETET (NEPEPEKA ISABULIN KA AWARAGASIA)

¹ Kosodi emalaikat lokikanyet akutakin arupepe keng'. Kanyuni eong' akanyeret na adacuna kwap, kosodete ainakin nesi ilaceta luka adwi kana mam esial.

² Kong'ari akanyeret adwi na ecakanakino ajokin ering'a akisicanio kes nakesial, kolomuni apuru kotoma keng', bala apuru na elomuni kotoma akimi na epolo noi; kosodi apuru na alomuni kotoma adwi na ecakanakino ajokin akisirion acausu kakolong' kiton ewuria.

³ Kolomuni emase kotoma apuru karapakin akwap. Koinakinete kesi apedor bala na ejaasi kikiritona.

⁴ Kelimokiite kesi mam amunaun inya kere de ikito kere araito kere; kecamakiite kesi amunaun itung'a bon lu kemam kejaatatare ka ekung'ete ka Akuju koreta kes.

⁵ Kemam emase kekotokina akiara itung'a lu, konye akisican kesi kolapio kikanyi. Apipilu nakakisicanio erait bala apipilu naka akikonyo kekiriton.

⁶ Kolapio kikany kang'ulu ebunete kesi akote atwanare, konye mam kedumunete; ebunete amina atwanare konye eporori atwanare kama kes.

⁷ Atakani emase bala afarasin nu elokokina ejie; koreta kes ajaatatare kiton iboro bala abokokin nuka esawabu, ireta kes araito bala luka itung'a.

⁸ Itima kes araito bala itima luka aberu, ikiala kes araito bala luka eng'atuny.

⁹ Aturubes kes arapite kiboro kalu asit bala ibukui lukicumai. Akiruruma kabenokokia kes arait bala akiruruma naka agarin nuka afarasin ipu ekerete ojie.

¹⁰ Ejaasi kesi kikoseta bala ekiliton. Apedor kes naka akikang'asa itung'a kolapio kikany ejii okoseta kes.

¹¹ Ejaasi kesi ka ejakait lo ipugae kesi, lo erait emalaikat lo epolokiit adwi na ecakanakino ajokin ering'a akisicanio kes nakesial. Ekirori keng' ka Ayaudin erait Abadon; ka Agirikin erait Apollion (Apolou keng' erait “Lo ari”).

¹² Atuborosi ican lusodit; kitee, ering'a iare ebuto.

¹³ Kosodi emalaikat lokikanyetkape akutakin arupepe keng'. Abu eong' keira eporoto alomun kakonai ka auong'on ka altari kana itenite kesawabu ejii king'aren ka Akuju.

¹⁴ Kosodi eporoto alimokin emalaikat lokikanyetkape ebe, kolakak imalaikan iwong'on lu eyenite kang'ololo kanakapolon kanako Efurata.

¹⁵ Kolakakinete imalaikan iwong'on, lu kelokite kanuka akolong', apaaran, elapa, kiton ekaru akiara atutubet ape kamaka iuni ka etung'anan.

¹⁶ Kolimokinete eong' etyae ka ajore: Kerait imilionin akwatai aare.

¹⁷ Kasodi eong' koruja kang' anyun afarasin kiton lu kitekerete kesi: Enapito ibukui katuruberes kes lukareng'ak kwape ka akimi, bulu bala amor nu eputosi ka kuju, yelo bala esalfa. Akwes kafarasin araito bala nuka ing'atunyo. Alomut akimi kiton apuru kakituke kes.

¹⁸ Abutu ican lu iuni kwarata atutubeta ape kamaka iuni naka itung'a: Akim, apuru, kiton esalfa elomut kotoma akituki ka afarasin.

¹⁹ Naarai apedor naka afarasin ejii akituke kes bobo okoseta kes. Ikoseta kes eraito bala imunuo lu ejaasi ka akwes nu itosomaete akikang'asia itung'a.

²⁰ Itung'a luce kere lu mam ican lu karito, mam abutu kinyekisi asomisio nuka akanin kes kere akimaa ipara kiton aputosia nuka esawabu, nuka epuesa, aisinit, amoru kiton akito nu mam kiteete, akipup, kere alosite.

²¹ Bobo mam kesi akibelokin kaaron kes, kakicudu kes, kere de kadoteu kes, kere de kakokoo kes.