Apukokinio 8 - AKITUTUKET NAKITETET (NEPEPEKA ISABULIN KA AWARAGASIA)

Ekung'ete lo kikanyetkaare

¹ Na ang'ara Imerekek ekung'ete lo ikanyet kaare, kosodi akililing'i ajaikin kuju katutubet ka esaa epe.

² Kasodi eong' anyun imalaikan ikanykaare lu egwoenenete koking'aren ka Akuju, kosodete ainakin kesi arupepen akanykaare.

³ Kosodi imalaikat ice abunere kakigwo koking'aren ka etem irumit asurup naka esawabu; koinakinete nesi asurup na epolo noi tetere inyalakini nenipe ka alipasia ka lukalaunak kere kotem kalo kesawabu koking'aren kekicolong';

⁴ kosodi apuru naka asurup nenipe ka aelipasia ka lukalaunak aikar kuju alomun kakan ka malaikat kalo kejii king'aren ka Akuju.

⁵ Kosodi emalaikat alemun aisurupunet ka akileleb akimi alomun ka altari kosodi acakakin kwap; kajaikin arwoore naka idowon, ka iporotoi, ka akimilia kiton akijang'ajang'a ka akwap.

Arupepen

⁶ Kosodete imalaikan ikanykaare lu ajaasi karupepen akanykaare alokokin akutakin kesi.

⁷ Kokutakini emalaikat losodit arupepe keng', kobunete akako kiton akimi inyalakina kiton aokot kadacakin kwap; kosodi ipe kama kiuni kakwap asisii, kosodete ipe kama kiuni kikito asisii, kosodete inya kere asisii.

⁸ Kosodi emalaikat lokiareit akutakin arupepe keng' kosodete acakakin ibore bala emoru lokapolon, enoki akare nakapolon;

⁹ kotwakete ipe kama kiuni ka iboro kere kalu ejarete kaluka akare, kosodete amunaun ipe kama kiuni katakeria.

¹⁰ Kokutakini emalaikat lokiuniet arupepe keng', kosodi akanyeret nakapolon noi adacun kokuju, enoki noi bala etoci, kosodi adacakin kuju ka ipe kama kiuni kang'ololon kiton ocorin ka akipi.

¹¹ (Ekirori ka akanyeret erait “Adwarus”). Kosodi ipe kama kiuni ka akipi adwaraari kosodete itung'a ipu atwakare kanuka akimat akipi ng'unu naarai kebutu kodwarakarosi.

¹² Kosodi emalaikat lokiwong'onet akutakin arupepe keng', kinomete atutubet ape kamaka iuni naka akolong', kiton atutubet ape kamaka iuni naka elapa, kiton atutubet ape kamaka iuni naka akanyeren, tetere isironio atutubet ape na kamaka iuni naka acaus kes; kirebokinete atutubet ape kamaka iuni naka apaaran acaus, nenipe kiton akware.

¹³ Kang'oliari eong' keirari eong' ekuruk erwo koporoto kaloko kuju, eporitoi kokiding' kuju ebala, “Tukui, tukui, tukui ng'ulu lu iboete kakwap, na eruokinata arupepen nuce nu aput imalaikan iuni akutakin!”