Apukokinio 7 - AKITUTUKET NAKITETET (NEPEPEKA ISABULIN KA AWARAGASIA)

Itung'a 144,000 luko Israel

¹ Ketuborosi nu kanyuni eong' imalaikan iwong'on egwoete kakudieta awong'on nuka akwap, irebokito ikuwamun iwong'on tetere emam ekuwam kekusi akwap kere akare nakapolon kere okito epede.

² Kasodi eong' anyun emalaikat ece ebuut ko kide ejaasi ka ekung'et ka Akuju lo ejari. Kiworouni keporoto ka lokapolon imalaikan iwong'on lu keinakiit Akuju apedor nakamunaun akwap kiton akare.

³ Kotemari amalaikat ebe, “Mam akikang'asa akwap, akare nakapolon, kere de ikito, akitodol na ikung'akinata siong' ikejaanakinak ka Akuju wok ka ekung'et oreta kes.”

⁴ Kolimokinete eong' ebe etiae kang'ulu kalu kikong'okite ka ekung'ete ka Akuju oreta kes kerait 144,000. Kelomuto kesi kotekerio itomonkaare luko Israel,

⁵ itung'a aritai itomonkaare alomun kang'olo okitekere: Yuda, Ruben, Gadi

⁶ Asha, Naftal, Manase,

⁷ Simion, Lawi, Isakar,

⁸ Sebulun, Yosef kiton loka Benjamin.

Akwap ka itung'a

⁹ Ketuborosi nu kang'oliari eong', kanyuni eong' akwap ka itung'a nakapolon noi. Amam itwan abeikini akimar itung'a kijokin. Alomuuto kesi ko kitekerio kere, kakwapin kere, kiton ang'ajepa kere. Kogwoete koking'aren ka ekicolong' loka ang'osibib nepepe ka Imerekek, enapito inagai lukakwang'ak kiton edakito akwii ka akanin kes.

¹⁰ Kiworoto koporoto kaloko kuju ebe, “Akiyuuno elomuni kamaka Akuju wok, lo iboye kokicolong' kaloka ang'osibib ka alomun kamaka Imerekek!”

¹¹ Kosodete imalaikan kere akigwo elukakiito ekicolong', imojong', kiton iboro iwong'on lu ejarete. Kosodete kesi akibirokin kwap ebubura koking'aren ka ekicolong' kosodete kimaa Akuju,

¹² ebalasi, “Ikote nepeneni!” Asulwany, akibusesu, acoa, akiyalama nepepe ka ang'osibib, apedor, agogong'u, eraito nuka Akuju wok ikaru kere! Ikote nepeneni.

¹³ King'isi epe kamaka imojong' eong' ebe, “Kes ka ng'ai itung'a lu enapito inagai lukakwang'ak, ai elomutotor kesi?”

¹⁴ Kenyakakini eong', “Mam eong' kajeni lokapolon. Ijeni ijo.” Kolimokini nesi eong', Lu nes itung'a lu etoroto ocan lu ipu noi inapakina. Elotata kesi inapen kes ka aokot ka Imerekek.

¹⁵ Ng'ini nesi atenikina egwoyata kesi koking'aren ka ekicolong' ka Akuju ka akijaanakin nesi apaaran ka akwaare ko otogo keng'. Nesi lo iboe kokicolong' ebuni akidar kesi ka ajaus keng'.

¹⁶ Mam bobo kesi kiirarete eteng'e kere akure; mam bobo akolong' kenomori kesi kere amwanus na icwei.

¹⁷ Naarai Imerekek ni ejii kiding' ka ekicolong' nes erauni lokecokon kes, ebuni akisidirari kesi ocorin luka akipi nuka akijar; ebuni Akuju amwatar akio kere kakonyen kes.