Apukokinio 6 - AKITUTUKET NAKITETET (NEPEPEKA ISABULIN KA AWARAGASIA)

Ikung'eta

¹ Kasodi eong' anyuna Imerekek ebili ka ang'ar ekung'et losodit kikung'eta ikanykaare, keirari eong' epe kama kiboro kalu ejarete kiwong'on ebala keporoto kalo ereta bala edou ebe, “Kobuni!”

² Kang'oliari eong' kasodi eong' anyun afarasit naka kwang'an. Lo kitekeri nesi kedakit ekusi kosodete ainakin nesi abokok. Koikari nesi king'a akilanya bala lokelanyan.

³ Kosodi Imerekek akibil ka ang'ar ekung'et lokiareit; kasodi eong' akiirar ibore ni kiareit ni ejari ebala ebe, “Kobuni”

⁴ Kobuni afarasit ace king'a nakareng'an. Abuni koinakine ni itekeri nesi apedor naka ayaun ejie kwap, tetere arakinosi itung'a. Koinakinete nesi ekileng' lokapolon noi.

⁵ Kosodi Imerekek akibil ka ang'ar ekung'et lo kiuniet; keirari eong' ibore nikiuniet ni ejari ebala ebe, “Kobuni!” Kang'oliari eong', ajii neni afarasit na eriono. Ni etekeri nesi erumit alatir ka akani keng'.

⁶ Keirari eong' ibore ni apupo bala eporoto elomut kotieng' kiwong'on ebala, “Alita nakaakiria nuka engano kotiae kaloka adinari, alitai auni nuka akiria nuka engano kotiae kaloka adinari. Konye mam amunaun ikitoo luka akinyet kere luka edifai!”

⁷ Kosodi Imerekek akibil ka ang'ar ekung'et lo kiwong'onet; keirari eong' ibore nikiwong'onet ni ejari ebala ebe, “Kobuni!”

⁸ Kang'oliari eong', ajii neni afarasit na ajaasi kaputo na mam kitiminarit. Ni etekeri anyarite atwanare etupit nesi kokau akwap ka lukatwak kokau api. Koinakinete kesi apedor naka apolokiit atutubet kakwap, akiara ka ejie, eteng'e, adeka kiton ityeng' luko moding'.

⁹ Kosodi Imerekek akibil ka ang'ar ekung'et lokikanyet; kanyuni eong' kokwap ka altari itawon kang'ulu kalu kebuni kwarai kanu kisiarasiarata kesi Akirot ka Akuju bobo kanu kemunokinata kesi ka akitodianar kes.

¹⁰ Kiworoto koporotoi kaluko kuju ebe, “Lokapolon Loka Apedor kere, lokalaunan kiton loka abeite! Akitodol iwori iderit ijo atubonokin itung'a kotoma akwap kakisican kesi kanuka akiara siong'?”

¹¹ Koinakinete ng'ini itwan kama kes enaga lokakwang'an, kosodete alimokin kesi kiyeng'utu nedio akitodolo nama kedaunere akiara etiae lokitemokina loka lukejaanakinak ka kesi kiton lukeraito Ikristayon kwape kes.

¹² Kanyuni eong' Imerekek ebili ka ang'ar ekung'et lokikanyetkape. Ajii akijang'ajang'a naka akwap nakapolon noi, kosodi akolong' akirionar bala inagai lukiriokok luka akiyo, kosodi elapa areng'aari cut bala awokot.

¹³ Kosodete akanyere akibirun kwap, kwape edacunototor araito keng' nuka apaarasia nuka akiru kotaci na ijang'ijang'ia ekuwam nesi.

¹⁴ Kowolie akuju bala ekitabo lo enunukite, kosodete alemari imoru kere kiton akwap na igalikito akipi kalaro keng'.

¹⁵ Kosodete ijakaa luka akwap, lu ipugaete kiton lu epolokiito luka ajore, lu ebarito kiton luka apedor, kiton itung'a luce kere, ijoloi kiton lu elakakina, aking'op kabwai kiton kwap katataba komoru.

¹⁶ Kiworounete imoru kiton atatab ebalasi ebe, “Kibirokinosi siong', kitong'opata siong' kakonyen kalo iboe kokicolong' kalok ang'osibib, bobo kanyunyura ka Imerekek!

¹⁷ Kwape adoluna apaaran nakapolon naka anyunyura kes, ng'ai egwoi?”