Apukokinio 5 - AKITUTUKET NAKITETET (NEPEPEKA ISABULIN KA AWARAGASIA)

Ekitabo kiton imerekek

¹ Kanyuni eong' ekitabo kakan keng' kanakoteten kalo iboye kokicolong' kaloka ang'osibib; egirite iwaitin kere iare bobo epiakite ikung'eta ikanykaare.

² Bobo abu eong' kanyu emalaikat loka agogong', lo alimori keporoto ka lokapolon ebala ebe, “Ng'ai ilesikina akibil ikung'eta kiton ang'ar ekitabo?”

³ Konye mam ipede kokuju kere kokwap kere kokwap ka akwap ni ebeikini ang'ar ekitabo kang'olekin toma.

⁴ Abu eong' kamony kapipilu naarai mam itwan ipede ni abu kodumun ni ilesikina ang'ar ekitabo kere de ang'olekin toma.

⁵ Kosodi epe ka imojong' alimokin eong' ebe, “Mam akimonyo. Kitee, elanya Eng'atuny lo kekitekere kaloko Yuda, auri ka Daudi tetere ebeikini nesi ang'ar ekitabo kiton ikung'eta keng' ikanykaare.”

⁶ Abu eong' kanyu imerekek egwoi kokiding' ka ekicolong' kaloka ang'osibib, igalikiito nesi iboro iwong'on lu ejarete nepepeka imojong'. Atakani merekek bala ni arite. Ajaasi kamugwar akanykaare kiton akonyen akanykaare, lu eraito imoyoi ka Akuju lu ejukute akwap kere.

⁷ Koikari amerekek kosodi alemar ekitabo alomun ka akan kanakoteten na kalo iboye kokicolong' kaloka ang'osibib.

⁸ Kedau ayaar ekitabo, kosodete iboro iwong'on lu ejarete kiton imojong' akaisare ka iwong'on akibirokin kwap king'aren ka imerekek, irumit ng'ini ipe arupepe, kiton acuraka nu itenite kesawabu ileleba ebubani, nu eraito alipasia ka itung'a ka Akuju.

⁹ Kirukokinete kesi ekiruke lokitetet ebalasi: “Ilesikina ijo akirum ekitabo ka apukor ikung'eta keng'. Naarai abuni kwarai ijo, bobo kanuka atwanare kon ibu ijo kogwelak Akuju itung'a alomun kamaka ng'olo ekitekere, ang'ajep, akwap kiton luka amunyo kana egelegela.

¹⁰ Itarau ijo kesi ajakaanut naka isaserdotin kijaanakinete Akuju wok, ebunete kesi akipuga akwap.”

¹¹ Kang'oliari eong' bobo, keirari eong' imalaikan, aritai ka aritai kama kes! Agwoete igalikiito ekicolong' loka ang'osibib, iboro iwong'on lu ejarete, kiton imojong',

¹² ka ekiruke koporoto kaloko kuju ebe: “Imerekek ni ario itemokina adumun apolou, ajakaanut, acoa kiton agogong', akibusesu, akimaa kiton akitur!”

¹³ Keirari eong' ng'in ni esubite kokuju, kokwap, kiton kotoma akwap kiton toma akipi iboro kere lu ejarete ka akwap — bobo irukosi ebe: “Nesi lo iboyee kokicolong' kiton Imerekek, kiturwoi, koyong'ai, koinakine akibusesu kiton apedor, ikaru kere!”

¹⁴ Kinyakunete iboro iwong'on lu ejarete ebe, “Ikote nepeneni!” Kosodete imojong' akibirokin kwap kimaete.