Apukokinio 3 - AKITUTUKET NAKITETET (NEPEPEKA ISABULIN KA AWARAGASIA)

Akiro nu eyaro Sardis

¹ Kigiraki emalaikat loko okanisa kaloko Sadis ebe: Nu nes akiro keng' kalo irumit imoyoi ikanykaare luka Akuju kiton akanyer akanykaare. Ajeni eong' asomisio kus; ijenuna ijo bala ni ejaari, konye itwanit ijo.

² Konyou! Kisicat ni ideuna ni apuuti atwanare, naarai mam eong' kanyuu asomisio kus ideerete koking'aren ka Akuju kang'.

³ Kanuka ng'un, ki'tuteete nu idiautu osi kiton akiirar; koyong'ata, kibelokinosi. Konye kimam osi kinyounete, abuni eong' bala ekokolan, bobo mam osi kijenunete akolong' na abunia eong' nama kus.

⁴ Konye ijaasi ijo ka itung'a idis lu emam keng'urito inagai kes. Ebunete kesi alosite ka eong', enapito inagai lukakwang'ak, naarai ideerete kesi.

⁵ Ng'ini ni ilanyi enapi inagai lukakwang'ak kwape kes. Mam eong' kamwatari ekirori keng' kokitabo kaloka akijar, konye acamuni eong' ekiror keng' koking'aren ka Papa kang' kiton imalaikan.

⁶ Nesi ni ejaasi ka akii, kopup nu elimonokini Emoyo ikanisai!

Akiro nu eyaro Piladelfia

⁷ Kigiraki emalaikat loko okanisa kaloko Filadelfia ebe: “Nu nes akiro keng' ka Lokalaunan kalo erait loka abeite, lo irumit elacet ka Daudi. Emam ni egolokini ni ang'a nesi, emam ni eong'aari ni agoloki nesi.

⁸ Ajeni eong' asomisio kon. Kitee, ipiaki eong' king'aren kon ekeki lo eng'ara lo emam itwan ni ebeikini agolokin. Ajeni eong' ebe ijaasi ijo ka agogong' na edit, konye iricaki ijo akirot kang' bobo mam ijo king'erokiit ekiror kang'.”

⁹ Ekokini eong' ng'ulu lu eraito luke etogo loka alipasia ka Iyaudin ka Asatanit, lu ebalasi ebe kesi Iyaudin konye mam keraito konye eraito luka aliokonu, ekokini eong' kobutu kesi ka akibirokin akwap akejen kon ka akiyuun ebe aminu eong' ijo.

¹⁰ Kanu iricakinata osi akicorasia kang' nuka akikany katitinyu, abuni eong' de akidar osi kapaki kanakatamisio kana ebuuti akwap kere akitama ng'ulu lu iboyete ka akwap.

¹¹ Abuuti eong' atipet. Koricakiite ibore ni ejaasi ka ijo, tetere emam itwan ni eyaari abokoki kon.

¹² Etarauni eong' ng'ini ni ilanyi epir ko Otogo ka Akuju kang'. Bobo mam kesi kinyekinete. Egirakini eong' nama keng' ekiror ka Akuju kang' kiton ekiror ka ere ka Lokapolon kang', Yerusalem nakitetet, na ijesun kwap alomun kokuju kamaka Akuju; egirakini eong' de ekiror kang' lokitetet.

¹³ Nesi ni ejaasi ka akii, kopup nu elimonokini Emoyo ikanisai.

Akiro nu eyaro Laodesia

¹⁴ Kigiraki emalaikat loko okanisa kaloko Laodesia ebe: Nu nes akiro keng' kalo Ikote nepeneni, eketodiaran lo emunokina kiton loka abeite, lo ipugae iboro lu kejee Akuju.

¹⁵ Ajeni eong' asomisio kon, ebe mam ijo kitaci kere de kimwana. Kejokuna kere bere kitajo jo ci kere kimwana!

¹⁶ Konye kanu imamare ijo kitaci apu eong' akimwaari ijo kakituk kang'.

¹⁷ Ibala ijo ebe, abarit eong'. Eten eong' abara bobo mam eong' kakote ibore. Konye mam ijo kijeni ebe icana ijo, ipalipalit ijo, imudukana ijo bobo ijii ijo ekinyoro.

¹⁸ Kecorakin eong' ijo kogwelu esawabu kama kang' lo italauti akimi, tetere ibararori ijo; kiton inagai lukakwang'ak konapa ijo, tetere irapakin esekenyi kou lokasilus; kiton akinyet nakisuta akonyen kon tetere ibeikini ijo akitere.

¹⁹ Ekwenyanari eong' kakiretanakin ng'ulu lu amina eong'. Kanuka ng'unu kokukunyaka, kibelokinosi.

²⁰ Kitee! Agwoi eong' ka okeki ekong'ikong'i. Kiira itwan kere eporoto kang' kosodi ang'ar ekeki, alomi eong' toma kakinyam ka nesi, nesi ka eong'.

²¹ Ainakini eong' nesi ni ilanyi adolite naka akiboi ka eong' kokicolong' kang', kwape elanyia eong' kakiboikin nenipe ka Papa kang' okicolong' keng'.

²² Nesi ni ejaasi ka akii, kopup nu elimonokini Emoyo ikanisai.