Apukokinio 22 - AKITUTUKET NAKITETET (NEPEPEKA ISABULIN KA AWARAGASIA)

¹ Abu emalaikat de kitodik eong' ang'ololo naka akipi nuka akijar, ecaete bala agilasit bobo elomuto kokicolong' ka Akuju kiton loka imerekek

² eleliarito kwap kiding' keroto kalo ejii ore lokapolon. Kang'olo wai kaloka ang'ololo, ajii ekitoi loka akijar lo igwanakini araito irwan katomon kaare, atipet ng'olo elapa. Akwii keng' eraito nu itang'aleunere akwapin.

³ Mam ibore ipede ni ilamit Akuju kedumuno kore ka Lokapolon. Ekicolong' ka Akuju nepepe kaloka Imerekek ejaikin ore lokapolon, kosodete lukejaanakinak keng' akimaa nesi.

⁴ Ebunete kesi anyun erete keng', bobo ekiror keng' igirakino oreta kes.

⁵ Emamuni bobo akware, bobo mam kesi kebunete akote atarai kere de akolong', naarai ebuni Lokapolon Akuju araun acaus kes, bobo ebunete kesi akipuga bala lukepugak ikaru kere.

Abunore ka Yesu

⁶ Kosodi emalaikat alimokin eong' ebe, “Akiro nu eraito abeite, bobo ebeikino amunokin. Bobo ejuku Lokapolon Akuju lokainakinan lukadwarak Emoyo keng' emalaikat keng' akitodikin lukejaanakinak keng' lu itemokina akisomakin apaarasia kadis kanu ebuto.”

⁷ Ebala Yesu ebe, “Kiirasi! Abuti eong' atipet! Erereng' ng'ulu lu eyong'ito akiro nuka akidwar nu ejaasi okitabo lo!”

⁸ Eong', Yoana, eira eong' bobo anyu eong' iboro lu kere. Bobo na adauna eong' akipup ka akitere kesi, kasodi eong' akibirokin kwap akejen ka emalaikat kalo abu kitodik eong' iboro lu, bobo aaputi eong' akimaa nesi.

⁹ Konye kolimokini nesi eong' ebe, “Mam aluruokin eong'! Arait eong' lokejaanakinan nenipe ka ijo nepepe ka ikanacan kon lukadwarak nepepe kang'ulu kere lu eyong'ito akiro nu ejaasi okitabo lo. Kemaata Akuju!”

¹⁰ Kolimokini nesi eong' ebe, “Mam akigwaa akiro nuka akidwar nuka ekitabo kalo naarai aaputi apak na isomakinototore nu kere.

¹¹ Ng'ini kere ni isomae nukarokok, kitolosite asoma nukarokok, ng'ini kere nikaronon kitolosite karonus keng'. Ng'ini kere nikajokan kitolosite asoma ajokun, ng'ini kere nikalaunan kitolosite alaus.”

¹² Ebala Yesu ebe, “Kiirasi, abuti eong' atipet! Abuti eong' kidutan kang', ainakin ng'in itwan atupa kanu esoma nesi.

¹³ Eong' nes losodit kiton lokesial, eong' nes ageunete kakirikakinet.”

¹⁴ Erereng' ng'ulu lu ilosete inagai kes kocaete kadumun kokipone kang'olo kadumun adolite naka akinyama araito nuka ekitoi kaloka akijar kakitor okekia elomete ore lokapolon.

¹⁵ Konye koking'a kere ka ere lokapolon, ejaasi itung'a lu esomata nukarokok nepepe kang'ulu kalu isomaete nuka akicud, ng'ulu lu isomaete adoteu, ng'ulu lukarak, ng'ulu lu imaete akujun nepepe ka ng'ulu kaluke ng'alak kojori nepepe kasomisio.

¹⁶ “Eong' Yesu, ejuku eong' emalaikat kitodia akiro nu kama kus ko okanisai. Eong' auri ka Daudi. Eong' nes akanyerete naka taparacu na ecae.”

¹⁷ Ebalasi Emoyo nepepe ka aberu na itemokina amanyakin ebe, “Kobutu!” Bobo ng'ini itwan ni epupi nu itemokina atemar ebe, “Kobutu!” Bobo ng'ini ni iirarit akure kobu. Bobo ng'ini ni ekote, komata akipi nuka akijar mam akitaca ibore.

Ang'etakinet

¹⁸ Ekwenyari eong' ng'in itwan ni iirari akiro nuka akidwar nuka ekitabo kalo. Kiyataki itwan nukeng' kuju kanu, ebuni Akuju akiyatakin nesi ican lu inerite kokitabo kalo.

¹⁹ Bobo kelema itwan ibore kere akiro kanuka akidwar nuka ekitabo kalo, ebuni Akuju alemar kama kes nu itemokina kesi adumun kokitoi kalo ejaasi ka akijar bobo kotoma, Ore Lokalaunan, nu inerite kokitabo kalo.

²⁰ Nesi lo etodia nu ejeni nesi kuju kanu kere ebala ebe, “Teni cut! Abuti eong' atipet!” Ikote nepeneni. Kobuu Lokapolon Yesu!

²¹ Asianut ka Lokapolon Yesu kojaasi kang'in itwan.