Apukokinio 21 - AKITUTUKET NAKITETET (NEPEPEKA ISABULIN KA AWARAGASIA)

Kuju nakitetet kiton Akwap nakitetet

¹ Kasodi eong' anyun akuju nakitetet kiton akwap nakitetet. Kosodete Akuju nasodit kiton akwap nasodit awoli, kosodi akare amamun.

² Kasodi eong' anyun Ere Lokalaunan, Yerusalem nakitetet, ebuti kwap alomun kokuju kamaka Akuju, itenite elokokina, bala aberu na enapit kanuka akiriamakin ka okilen keng'.

³ Keirari eong' eporoto lokapolon inera alomun kokicolong' kaloka ang'osibib ebala ebe: “Kipokona ere ka Akuju ejii otung'a! Ebuni nesi akiboi ka kesi, bobo eraunete kesi itung'a keng'. Ejaikinosi Akuju elope ka kesi, bobo erauni nesi Akuju kes.

⁴ Emwatari nesi akiyo kere kakonyen kes. Mam kang'ina bobo atwanare, mam bobo akituur kere akimony kere apipilu. Awolioto iboro lu mojong'.”

⁵ Kosodi lo iboe kokicolong' atemar ebe, “Eteteu eong' ng'ini ibore akolong' na!” Bobo kolimokini nesi eong' ebe, “Kigir nu, naarai akiro eraito abeite bobo ebeikino amunokin.”

⁶ Kotemari nesi ebe, “Esomakinosi! Eong' nes losodit kiton lokesial, ageunet kiton ang'etakinet. Ng'ini kere ni ejaasi ka akure ainakini eong' nesi adolite naka akimat kocor kaloka akipi kanuka akijar mam akitac.

⁷ Ng'ulu lu ilanyete edumunete nu kama kang': Arauni eong' Akuju kes, eraunete kesi idwe kang'.

⁸ Konye lu ekuriaka, kalu mam kemunokiito, kalu itowolito luce, kalukarak, luka adoteu, ka ikacudak, lu imaete akujun, kalukaliokon kijokin—alaro kes erait akare na inepi akimi kiton esalfa, na erait atwanare nakiareit.”

Jerusalem nakitetet

⁹ Kosodi epe kamaka imalaikan kalu ajaasi ka acuraka akanykaare ileleba ican ikanykaare lukesial abunore nama kang' kosodi atemar ebe, “Kobuni, ketodikini eong' ijo ateran, aberu ka Imerekek.”

¹⁰ Kosodi Emoyo ayaite eong', kosodi emalaikat adakar eong' kuju ka emoru lokaujan noi. Kitodikini nesi eong' Yerusalem, Ere Lokapolon Lokalaunan, ijesuna kwap alomun kokuju kamaka Akuju

¹¹ ecae ka akibusesu ka Akuju, eputosi acaus keng' bala amoru na elae noi, bala eyasipa lo ecae noi.

¹² Ajaasi ka arwatat na auja noi, ka ikekia itomonkaare, bobo ajaasi imalaikan itomonkaare lu edarete ikekia. Kokekia, egirite iroria ka itekerio itomonkaare ka itung'a kaluko Israel.

¹³ Ajaasi ikekia iuni ng'olo wai. Ajaasi iuni kide, ajaasi iuni agolitomei, iuni ng'alakimak, ajaasi iuni to.

¹⁴ Arwatat kere ka Lokapolon adukokiite kuju ka amoru atomonkaare nu ajaasi apetatait, nu egirakiite iroria itomonkaare ka ikiyakia ka Yesu.

¹⁵ Emalaikat lo enerito ka eong' ajaasi ka acumat naka esawabu na itemitemere ere lokapolon, ikekia keng' nepepe ka arwatat keng'.

¹⁶ Eiriaka alalau ka aujau naka ere ka Lokapolon. Kosodi emalaikat akitemeteme ere lokapolon itosomae acumat keng'. Aujau keng' arait akilomitai aritai aare akwatai aung'on bobo eiriaka alalau keng', ka akikiara keng' eiriaka bala aujau.

¹⁷ Kosodi emalaikat de akitemeteme etyae loka arwatat. Aujau keng' adolit amitai akaisakanykape atupa ka ekipone loka akitemeteme lo etosomae nesi.

¹⁸ Arwatat etenite kejasipa, bobo ere lokapolon elope adukite kesawabu bon ecae bala agilasit.

¹⁹ Amoru nuka apetatait karwatat kang'in, elimite ka amoru kanukajokak noi nuka etyae kaloko kuju. Amoru nasodit naka apetatait arait amoru nakareng'an naka etyae kaloko kuju. Nakiareit arait esafira. Nakiuniet arait erute, nakiwong'onete arait emerald,

²⁰ nakikanyet arait oniks, nakikanyetkape arait ekarnelian, nakikanyetkaare arait yelo krisolito, nakikanyetkauni arait beril, na kikanyetkawong'on arait topas, nakitomonet arait kalsedon, nakitomonetkape arait turkuois, na kitomonetkaare arait ametist.

²¹ Irutei itomonkaare araito irutei itomonkaare luka paal. Ng'olo erute etenite ka paal kape. Erot loka ere ka Lokapolon etenite kesawabu eputosi ka agilasit.

²² Mam eong' abu kanyu Etogo ka Akuju kore ka Lokapolon, naarai etogo keng' erait Lokapolon Akuju loka Apedor kere nepepe ka Imerekek.

²³ Ere lokapolon mam kekote bere de akolong' kere de elapa kocakiite nesi naarai ecakiit akibusesu ka Akuju nesi, bobo Imerekek nes acaus keng'.

²⁴ Ebunete itung'a luka akwap alosite eyait kesi acaus keng', bobo ebunete lukepugak akwapin ayaun abara kes toma neni.

²⁵ Ikekia luka ere kang'olo ebunete ang'ara paran kere naarai emamuni akwaare kaneni.

²⁶ Eyauno apolou nepepe ka abara naka akwapin toma ore lokapolon.

²⁷ Konye mam ibore ipede ni mam kelae ebuni akilomo toma ore kere de itwan kere ni isomae iboro luka asilut kere de ni ing'alae. Ng'ulu bon lu igirite iroria kes toma okitabo ka Imerekek, okitabo loka lukajarak nes elomete ore lokapolon.