Apukokinio 20 - AKITUTUKET NAKITETET (NEPEPEKA ISABULIN KA AWARAGASIA)

Ikaru aritata

¹ Abu eong' kanyu emalaikat ijesun kwap alomun kokuju, edakit kakanin keng' elacetait loka adwi nakaujan kiton enyoror lokaburuon.

² Kikamuni nesi asatanit, emunu ng'olo lomojong'it, nes atemar, eparait kere Asatanit, bobo ka akiyen nesi ka enyororo ikaru aritat.

³ Kocakakini emalaikat nes toma adwi. Kogolori nesi bobo ka anueskin nes, tetere emam nesi king'alae akwapin bobo akitodolo nama edaunototor ikaru aritat. Kedaunosi ng'unu ejii alacakin nesi ka apak kana edit.

⁴ Abu eong' kanyu icolong'o luka ang'osibib, bobo lukiboyete kocolong'o kang'ulu araito lu kebuni koinakine agogong' naka atubonokin. Bobo kanyuni eong' imoyoi ka itung'a kalu kebuni kotubore akwes kes kanu kisiarasiarata kesi abeite nakitodiarit Yesu kiton akirot ka Akuju. Kemam kesi kimaito etyang' kere de adumun ejenunet loka etyang' koreta kes kere de ka akanin kes. Kojarunete kesi ka akipuga bala ijakaa nenipe ka Kristo aritai ka ikaru.

⁵ (Lukatwak luce mam abutu kojarutu akitodol na atuborototore ikaru aritata). Na nes akitajaruno nasodit ka lukatwak.

⁶ Elakara bobo erereng'e noi ng'ulu lu imarakiite akitajaruno na nasodit kamaka lukatwak. Atwanare na kiareit mam kejaasi ka apedor kama kes; eraunete kesi isaserdotin ka Akuju nepepe ka Kristo, bobo ebunete kesi akipuga ka nesi ikaru aritata ape.

Akilanyo ka Asatanit

⁷ Ketuborosi ikaru aritata, elakakino Asatanit ka aenis keng',

⁸ bobo elomari nesi king'a aking'ala akwapin nuka Gog kiton Magog, akwapin nu isiarakina akwap kere. Eyauni Asatanit kesi kere nenipe ojie, ka akipuakus bala asing'e na ejii arir ka akare.

⁹ Kosodete kesi akisiarakin akwap ka akirimokin ekambi ka itung'a ka Akuju kiton ere lokapolon lo emina nesi. Konye kobuni akimi kwap alomun kokuju kosodi akiara kesi.

¹⁰ Kosodete acakakin Asatanit na king'alakini kesi toma akare naka akimi kiton esalfa, nama kedaute acakakin etyang' kiton ekadwaran lokaliokonu; ebunio akisican kesi akware ka apaaran ikaru kere.

Atubonokino Naka esial

¹¹ Kasodi eong' anyun ekicolong' lokakwang'an lokapolon kiton ng'oli lo iboe kaneni. Kosodete akwap kiton akuju awoli koking'aren keng', mam atakanun bobo.

¹² Kasodi eong' anyun lukatwak, lukapolok kalucik nenipe egwoete koking'aren ka ekicolong'. Kong'arete ikitaboi, kosodete ang'ar ekitabo ece, ekitabo kalu ejarete. Kotubokinete lukatwak atupa kanu kisomato kesi, kwape kigiritere toma okitaboi.

¹³ Kosodi akare alemun king'a itung'a luketwakito kotoma keng'; Kosodi atwanare kiton akwap ka lukatwak de akinyekin lukatwak lu kikamutu kesi. Kosodete atubokin itung'a kere atupa kanu kisomato kesi.

¹⁴ Kosodete acakakin atwanare kiton akwap ka lukatwak akare naka akimi. (Akare naka akimi na erait atwanare na kiareit).

¹⁵ Abu kocakakine toma akare naka akimi ng'ulu kere lu kemam iroria kes kigirakiite okitabo kalu ejarete.