Apukokinio 2 - AKITUTUKET NAKITETET (NEPEPEKA ISABULIN KA AWARAGASIA)

Akiro nu eyaro Efeso

¹ “Namaka emalaikat loka ekanisa ko Efeso kigiri: Nu nes akiro keng' kalo irumit kakan keng' kanakoteten akanyere akanykaare bobo lo elosi kokiding' ka agwoyes ka atarai akanykaare.

² Ajeni eong' asomisio kus, akukunyanut kus kiton atitinyu kus. Ajeni eong' ebe mam osi kibeikinete akikany ka itung'a lukarokusio, imoata osi ng'ulu lu ebalasi ebe kesi ikiyakia konye mam keraito, bobo ianyutu osi ebe eraito kesi lukaliokon.

³ Ijaikinosi osi katitinyu bobo ikanyata osi ican kokiror kang', bobo ering'a osi kipasa.

⁴ Konye ajaasi eong' kanu kuju kus: Inyekisi osi amina kus na sodit.

⁵ Kitutu nama kibirunototor osi! Kibelokinosi kisomata iboro lu kisomato osi na sodit. Kimam osi kibelokinosi, abuni eong' nama kus ka alemar agwoyes katara kus kalaro keng'.

⁶ Konye ijaasi osi kajokus kana: Ikadakiito osi nu isomaenenete itung'a lu etupito Nikolaus, nuka kadakiito eong' de.”

⁷ Nesi ni ejaasi ka akii, kopup nu elimonokini Emoyo ikanisai. Ainakini eong' itwan ni ilanyi adolite naka akinyam araitoit naka ekitoi kaloka akijar, lo ejii paradiso naka Akuju.

Akiro nu eyaro Smirna

⁸ Namaka emalaikat lok ekanisa loko Smrna kigirak ebe: Nu nes akiro alomun kamaka lo erait losodit kiton lokesial, lo abu kotwana kojaruni bobo.

⁹ Ajeni eong' ican kus; ajeni eong' ipalipalito osi konye abeite ijakaaka osi! Ajeni eong' iboro lukarokok lu etemarite kuju kus ng'ulu lu ebalasi eraito kesi Iyaudin konye mam keraito, konye eraito kesi akatong'tong'it ka Asatanit.

¹⁰ Mam akuriana ican lu apuut osi adumun. Kalimokini eong' osi ebe ebuni Asatanit apiakin ice kama kus aenis kanuka akitama osi, icanakinosi osi ka aparasia atomon. Kojaasi ka amuno akitodol atwanare, kasodi eong' ainakini osi abokoki naka akijar.

¹¹ Nesi ni ejaasi ka akit, kinyek nesi kiira nu elimonokini Emoyo ikanisai. Ng'ini ni ilanyi mam nesi kikang'asi atwanare na kiareit.

Akiro nu eyaro Pergamum

¹² Nama ka emalaikat loko okanisa loko Pergamum kigirak ebe: “Nu nes akiro alomun kamaka lo ejaatatare ka ekileng' lokapolon lo ipienite iwaitin iare.

¹³ Ajeni eong' nama iboya ijo, ng'ina nama ejaatatare Asatanit ka ekicolong' keng'. Konye ideunosi osi imunokiito ekiror kang'. Mam osi akinyekin akiyuun kus kama kang' atikere aparasia nuka Antipas, eketodiaran kang' lo emunokina, lo ario ko ore kus ka lokapolon kama iboya Asatanit.

¹⁴ Konye ajaasi eong' ka iboro idis luka akitepege osi: Ijaasi ijo ka itung'a ice ng'ina lu emunokiito akisisianakino ka Balaam, lo esisianakini Balak aking'ala itung'a luko Israel asoma arokusio nuka akinyama inyamata lu edusite akujun kiton adoteu.

¹⁵ Bobo ijaasi ijo de ka itung'a kalu etupito akisisianakino ka Nikolaitas.

¹⁶ Kanuka ng'un, kibelokinosi! Kemam, apuuti eong' abunere nama kus kakitijii kesi kekileng' kalokaujan kalo elomuni kakituk kang'.”

¹⁷ Ng'ini ni ejaasi ka akii, kopup nu elimonokini Emoyo ikanisai. Ainakini eong' nesi ni ilanyi emana lo igwaite. Bobo ainakini eong' nesi amoru nakakwang'an na igirakiite ekiror lokitetet, ejenuna kamaka ng'in bon kani idiauni amoru na.

Akiro nu eyaro Tiatira

¹⁸ Namaka emalaikat loko okanisa kaloko Tiatra kigirak ebe: Nu nes akiro alomun kamaka Okoku ka Akuju, lo ecaete akonyen keng' bala akimi, bobo lo acaete akejen keng' bala aisinit,

¹⁹ Ajeni eong' asomisio kon, amina kon kiton akiyuun kon ka akijaanakin kon, ka atitinyu kon, bobo asomisio kon nu kokau ilanyito nu sodit.

²⁰ Konye ajaasi eong' kanu nuka akitepege ijo: ebe ikanyi ijo aberu ng'ini Yesebeli, na ebala alope ebe erait nesi akadwaran bobo isisianakini bobo itapait lukejaanakinak kang' asoma arokusio nuka adoteu ka akinyama inyamen lu edusite akujun.

²¹ Abu eong' kainak nesi apak naka akinyekin arokusio keng', konye eng'erit akinyekin arokusio keng'.

²² Kanuka ng'un, acakakini eong' nesi apetat na kalu edekasi, bobo ng'ulu lu isomaete adotou ka nesi acakakini eong' toma ocani lu ipu, kemam nesi kinyekini arokusio keng'.

²³ Enomi eong' idwe keng' akiara. Bobo ejenunete ikanisai kere ebe eong' nesi lo ajeni awomowomosia kiton nu ekote ng'ini itwan. Ataci eong' ng'ini ipe kama kus atupa kanu esomata osi.

²⁴ Konye osi luce kere lu ijaasi Tiatira, lu mam kitupito akisisianakino nakaronon na; lu mam kisisiauto nu enyarito ice iboro ka Asatanit luko toma, alimokini eong' osi ebe mam eong' keyatakini osi bobo alang'iru ace.

²⁵ Ibore bon kirumata ka akekus nu ejaasi ka osi akitodol na abunia eong'.

²⁶ Ng'ini ni ilanyi kosodi asoma nu akote eong' akitodol osial, ainakini eong' nesi apolokiite akwapin,

²⁷ bobo ipisi nesi kesi kebela kaloka ecumata, kwape ebwang'ibwang'ere amotio, kwape adumuna eong' elope apolou alomun kamaka Papa kang'.

²⁸ Kasodi eong' ainakini nesi akanyeret nakatupurucu.

²⁹ Ni ejaasi ka akii, kopup nu elimonokini Emoyo ikanisai.