Apukokinio 19 - AKITUTUKET NAKITETET (NEPEPEKA ISABULIN KA AWARAGASIA)

¹ Ketuborosi nu keirari eong' eporoto bala akiruruma naka akipuwakus ka itung'a kokuju ebalasi, “Keturuoto Akuju! Alakuno, akibusesu, kiton apedor eraito nuka Akuju wok!

² Eraito atubonokin keng' abeite ka adolite! Atuboki nesi amalayata na etoron akwap kadoteu keng'. Etisila Akuju nesi naarai kebu nesi kwara lukejaanakinak ka Akuju.”

³ Kocelunete kesi bobo ebe, “Keturuoto Akuju! Apuru na elomuni ka akimi kana enyemi ere lokapolon eikari kuju ikaru kere.”

⁴ Kosodete imojong' akaisare ka ityeng' iwong'on lu ejarete akibirokin kwap ka akimaa Akuju lo eboe kokicolong'. Kotemarete ebe “Ikote nepeneni! Aleluya!”

Epucit Loka Emanyit ka Imerekek

⁵ Kolomuni eporoto kokicolong' ebala ebe, “Keturuoto Akuju wok, lukejaanakinak keng' kiton itung'a kere, lukapolok kalucicik lu eyong'ito nesi.”

⁶ Keirari eong' ibore ni apupo bala akwap ka itung'a, bala eporoto ka akipi irurumaete kaburi, bala akimilianun ka idowon. Keirari eong' kesi ebalasi ebe, “Keturuoto Akuju! Naarai Lokapolon, Akuju Loka apedori kere erait Ejakait!

⁷ Kalelata bobo kalakarosi; keturuoto apolou keng'! Naarai adol akolong' naka emanyit ka Imerekek, apese keng' na emanyi nesi alokokin.

⁸ Ainakin nesi enaga lo elae lo imilimili anapite.” (Enaga lo elae erait asomisio nukajokak nuka itung'a ka Akuju).

⁹ Kosodi emalaikat alimokin eong' ebe, “Kigirak nu: Erereng' ng'ulu lu anyaraun opucit loka emanyit loka Imerekek.” Kotemari bobo emalaikat ebe, “Eraito nu akiro ka Akuju nuka abeite.”

¹⁰ Abu eong' kebirokin kwap akejen keng' akimaa nesi, konye kolimokini nesi eong' ebe, “Mam asoma kong'in! Arait eong' ekejaanakinan nepepe ka ijo kiton lu emunokiito kwape kon, ng'ulu kere lu ericito abeite na etodiari Yesu. Kimaa Akuju!” Naarai abeite na etodiari Yesu nes ibore ni einakiit ikadwarak agogong'.

Loketekeran afarasit naka kwang'an

¹¹ Kasodi eong' anyun eng'aar kuju, bobo ajii afarasit nakakwang'an. Loketekeran nesi anyarite, “Lo Emunokina” kiton “Loka abeite.” Erait ka adolite nes etubonokina nesi.

¹² Akonyen keng' aputosi ka ang'ajepa ka akimi, bobo anapit nesi abokokin nu ipu. Kejaasi nesi ka ekiror lokigirakiite kuju keng', konye mam ipede adepar nesi elope ajeni.

¹³ Enaga lo anapit nesi ang'urakina aokot ng'olo wai. Ekiror keng' erait, “Akirot ka Akuju.”

¹⁴ Atupito nesi lukajore luko kuju lu etekerete afarasin konapitete inagai lukakwang'ak noi.

¹⁵ Kakituk keng' kolomuni ekileng', lo ilanya nesi akwapin. Ebuni nesi akipuga kesi kebela kaloka ecumat, bobo ipudari nesi ebino lo ejii nama ecuere ka anyunyura ka Akuju Loka apedor kere.

¹⁶ Konaga keng' bobo kamuruo keng' egirakiite ekiror, “Ejakait loka ijakaa kiton Lokapolon loka lukapolok.”

¹⁷ Kasodi eong' anyun emalaikat egwoi kotoma akolong', kocelakini ikweny kere lu aporotosi kokuju ebala ebe, “Kobutu komorata epucit ka Akuju, epucit lokapolon!

¹⁸ Kobutu akinyam akiring' ka ijakaa, lu epolokiito ajore, ajore, akiring' ka afarasin nepepe ka kalu itekerete kesi, nepepe ka akiring' ka itung'a kere, lu elakakina, nepepe ka ijoloi, lukadisiak ka lukapolok.”

¹⁹ Bobo kanyuni eong' etyang' kiton ijakaa kere luka akwap etukokina akitijii loketekeran afarasit kiton ajore keng'.

²⁰ Kosodete akigwakin etyang' aenis, nenipe ka ekadwaran lokaliokonu lo kisomate aumosia koking'aren keng'. Erait kanuka aumosia nes king'alakina nesi kesi lukejaasi ka ekung'et naka etyang' kiton ng'ulu lu kimaete aputo ka etyang'. Kocakakinete etyang' kiton ekadwaran lokaliokonu ejarete toma akare naka akimi na enoki bala esalfa.

²¹ Kosodete akiara ajore kes ka ekileng' kalo kelomuni kakituk kalo itekeri afarasit; kosodete ikweny kere akinyam akiring' kes atupa ka apedor kes.