Apukokinio 18 - AKITUTUKET NAKITETET (NEPEPEKA ISABULIN KA AWARAGASIA)

Akibiror ka Babilon

¹ Kedaunosi nu, kaanyuni eong' emalaikat ace ijesuna alomun kokuju. Ajaasi nesi ka apedor apolo noi kosodi akibusesu keng' akitacaun akwap kere.

² Koceluni keporoto kaloko kuju ebe: Ebiror! Ebiror Babilon nakapolon! Etupito kipokona nesi ajokisinoi kiton ajokin nukarokok; ikweny kere lukarokok kiton lukakadakina iboyete kotoma keng'.

³ Naarai akwapin kere amatata ebino keng' — ebino lo icasit loka adoteu keng'. Abutu ijakaa luka akwap kisomata adoteu ka nesi, kosodete luka ebele luka akwap ajakaanar kanuka aminanar keng' kana emam kejong'a.

⁴ Kade eong' akiirar eporoto ece alomun kokuju ebala ebe: “Kolomutu king'a, itung'a kang'! Kolomutu king'a kama keng'! Mam kitemokina osi asoma emuna lo esoma nesi; mam kitemokina osi adumun ican kwape keng'!

⁵ Naarai arokusio keng' etukonokiite apiarit adolore kuju, bobo iituti Akuju irotin keng' lukarokok.

⁶ Kisomakisi nesi ekipone lo esomakina nesi osi; kotacata nesi irwana kaare kanuka ng'unu kere kanu esoma nesi. Kileleb ekikopot keng' kimatat kani edwar irwan kaare bala nimatat ni etenakiit nesi osi.

⁷ Koinak nesi ican kakituur etyae ka akibusesu kalakara kana esomakini nesi akwana keng' Naarai itolosit alope alimonokin ebe: ‘Eboe eong' kane bala akwiin! Mam eong' karait apuserut, Mam eong' cut kajenuuni ican!’

⁸ Kanuka nu ape paaran ebunio akinom nesi ka ican adeka, akituur kiton eteng'e. Ebunio akicwe nesi ka akimi, naarai Lokapolon Akuju, lo etubonokini nesi, epolo noi.”

⁹ Ijakaa luka akwap lu abutu komorata kadoteu kiton aminanar keng' edelorete ka akimonyo kanuka ere ka Lokapolon na anyunata kesi apuru elomun ka akimi kana icuei nesi.

¹⁰ Ebunete akigwo kama elwanikina noi, naarai ekuriaka kesi akimor ican keng'. Ebalasi kesi ebe, “Ikoni eronari ai! Ikoni eronari ai! Ere lokapolon lo kiton loka apedor, Babilon! Kosa ka epe bon esicanio ijo!”

¹¹ Lukesomak ebele de luka akwap emonyete ka akituur kanu keng', naarai emam itwan bobo ni egweli iboro kes;

¹² emam nikagwelan esawabu kes, epuesa, amoru nukajokak kiton atipe nukajokak; iboro kes lu kinagai, inagai lu pus, lukaratasi, kiton inagai lukareng'ak; iboro luka akito kanu emam ketakanete kiton iboro aputo kere lu itenite kamuguar ka etom ka akito nuka etiae kaloko kuju, kiton aisinit, kiton icumai, kiton amoru;

¹³ kiton esinamon, ka lueru maa, kiton emina, kiton lu esaete, kiton lukisurupununo, emira, kiton ebino, kiton akinyet, kiton akiria kiton engano, kiton akituk, kiton amerekekin, kiton afarasin, kiton agarin, kiton ijoloi, kiton akijar naka itung'a.

¹⁴ Elimonokinete nesi lukesomak ebele ebe, “Awolioto iboro kere lukajokak lukiminanari ijo adumun, abara kon kere kiton akibusesu kon aikasi kere, mam ijo bobo kidumuni kesi bobo!”

¹⁵ Lukesomak ebele, lu abutu kobarata kanuka asoma ebele ko ore kang'olo, ebunete akigwoo kama elwana, naarai ekuriaka kesi akimor ican keng'. Ebunete akimony ka akituur,

¹⁶ ka atemar ebe, “Erono koni! Erono koni kamaka ere ka Lokapolon! Anait nesi anapite inagai lu pus, lukareing'ak kiton arapite akwan keng' kaswa kanu itenite ka esawabu, amoru kiton atipe nukajokak!

¹⁷ Kosaa epe bon atowol abara na kere!” Kogwoete kama elwana ng'ulu kere lu itekerete ameli kiton lu edakite, kalukeguruok akipi tetere elosi ameli kiton luce kere lu isomaete toma akare,

¹⁸ kosodete adelor ape anyunata kesi apuru elomuni kotoma akimi kana adauni nesi. “Mam pelem kejaikina ere ece lokapolon kwape kalo, kalo epolo!”

¹⁹ Kobukokinete apua akwes kes, komonyata kituruoto ebalasi ebe, “Erono ekipone ali! Erono ekipone ali kamaka ere ka Lokapolon. Nesi nes ere lokapolon nama kejanakinosi ng'ulu kere lukejaasi ka amelin nu kekerete ka akipi! Konye kosaa ka epe etowol nesi ng'in ibore!”

²⁰ Kuju kolakari kanuka adauno keng'! Kolakarosi, osi itung'a ka Akuju kiton ikiyakia kiton ikadwarak! Naarai atuboki Akuju nesi kanu kisomakini nesi osi!

²¹ Kosodi emalaikat lokapolon noi asekun amoru nakapolon noi kacakakin toma akare ebala ebe, “Lo nes ekipone lo ecakarere kwap ka agogong' ere lokapolon loko Babilon, mam cut kanyuno bobo.

²² Mam cut bobo kiiraro kama kon ekiruke kadong'oi kiton iporotoi ka itung'a, kiton luka aulerun kiton arupepe; mam cut kiiraro bobo alomun kama kon acela naka amoru kana iriere!

²³ Mam cut kanyuno bobo kama kon acaus naka atarai; mam bobo iporotoi kanu emanyio kiton luka amanyak kepupuno kama kon. Lukesomak ebele kon nes ajaasi ka apedor adepar luce kere kakwap kijokin. Bobo kitosoma ijo akicud kon aking'ala itung'a kere luka akwap.”

²⁴ Abuni kisicani Babilon naarai abuni kodumune ko ore ka lokapolon awokot ka ikadwarak kiton nuka itung'a ka Akuju; teni awokot kang'ulu kere kalu ario kakwap.