Apukokinio 17 - AKITUTUKET NAKITETET (NEPEPEKA ISABULIN KA AWARAGASIA)

Amalayat na Ejenuna

¹ Kosodi emalaikat epe lo ajaasi kiton acuraka abunere nama kang' ka atemar, “Kobu, ketodik eong' ijo kwape isicanere amalayat na ejenuna, ere lokapolon ng'oli lo edukite arir ka ang'ololon nu ipuwaka.

² Abutu ijakaa luka akwap kisomata adoteu ka nesi, kosodete itung'a luka akwap amerikin ebinu loka adoteu.”

³ Abu Emoyo koyaite eong' kosodi emalaikat adakar eong' moding'. Kanyuni eong' aberu iboe kokuju ka etyang' lo ajaasi ka iroria luka akirat Akuju igirite ng'ini laro kama keng'; ajaasi etyang' ka akwes akanykaare kiton amugwar atomon.

⁴ Anapit aberu enaga lo pus kiton lokareng'an erapito nesi aswai nu itenite ka esawabu, amoru nuka jokak noi kiton atipe nukajokak. Kakan keng' erumit nesi ekikopot lo itenite ka esawabu ileleba iboro luka ileci kiton luka asilut, adumuni ka adoteu keng'.

⁵ Korete keng' egirakiite ekiror lo ejaasi ka apolou kana mam itwan kejeni: “Babilon Nakapolon, toto ka amalayai kere nepepe ka lukarokok kere kakwap.”

⁶ Kanyuni eong' aberu emera aokot ka itung'a ka Akuju kiton awokot kang'ulu kalu karite naarai keyong'ito kesi Yesu. Nape anyuna eong' nesi kaumokini eong' noi.

⁷ King'isi emalaikat eong' ebala ebe, “Inyena iumokiiti ijo?” Kalimokini eong' ijo apolou na iguwaite naka aberu kiton naka etyang' kalo edakit nesi, etyang' lo ejaasi ka akwes akanykaare kiton amuguar atomon.

⁸ Etiang' ng'oli ajari, konye mam bobo kejari; aaputi alomun kadwii kana ecakanikino ajokin ering'a akisicana kes nakesial kosodete akiara kesi. Eumokinete itung'a kere lu iboete ka akwap lu ering'a iroria kes kigirakina okitabo kalu ejarete ape kesubere akwap na anyunata kesi etyang'. Ajari etyang' ng'oli ape pak; kipokona mam bobo kejari, konye etakanuni bobo.

⁹ Ekotosi nu kere acoa kiton akijen. Akwes akanykaare eraito imoru ikanykaare nama iboya aberu. Bobo ejaasi ijakaa ikanykaare:

¹⁰ Ikany kama kes ebirorosi, ering'a epe ipugae, ering'a epe loce kebuno; ejii nesi akipuga kapak kana edit.

¹¹ Etiang' lo ajari apak ape, konye komam kejari bobo erait ejakait lokikanyet kauni lo erait epe kama kikanykaare konye elosiorit amudiaro.

¹² “Amuguar atomon nu kianyuti ijo eraito ijakaa itomon lu ering'a kegeuna akipuga, konye lu einakino apedor naka akipuga nenipe ka etyang' bala ijakaa ka apak kape.

¹³ Itomon lu kere ejaasi ka apupunoro, bobo einakinete kesi etyang' apedor kes kiton apolou kes.

¹⁴ Ebunete kesi akitijii Imerekek; konye Imerekek nepepe ka kalu keng' lu enyaraute, lu eseute, nepepe kalu etupito nesi lu emunokina ebunete akilanya kesi, naarai erait nesi Lokapolon ka lukapolok bobo ejakait ka ijakaa.”

¹⁵ Kolimokini bobo emalaikat eong' ebe, Akipi nukianyuti ijo, nu kiboya amalayat eraito akwapin, itung'a, itekerio, kiton ang'ajepa.

¹⁶ Amugwar atomon nu kianyuti ijo, kiton etyang' eng'erete kesi amalayat; eyarete kesi ng'ini ibore ni ejaasi ka nesi ka akinyekin nesi ekinyoro; ebunete kesi akinyam akwan keng' ka akiyara nesi ka akimi.

¹⁷ Naarai epiak Akuju otauon kes akote asoma nu ekote nesi kokipone kaloka asoma kakimorikikina ka ainakin etyang' apedor kes naka akipuga akitodol na eraunata akiro ka Akuju abeite.

¹⁸ “Aberu na anyut ijo erait ere lokapolon noi lo ipugaete ijakaa luka akwap.”