Apukokinio 16 - AKITUTUKET NAKITETET (NEPEPEKA ISABULIN KA AWARAGASIA)

Acuraka nuka Anyunyura ka Akuju

¹ Keirari eong' eporoto lokapolon inera alomun kotogo ka Akuju elimonokini imalaikan ikanykaare ebala ebe: “Kolototo kobukokisi kwap anyunyura ka Akuju na ejii acuraka akanykaare!”

² Koikari emalaikat losodit kabukokin acuran keng' kwap. Kolomunete ajimii nukarokok nu epipil kamaka ng'ulu naka lukejaasi ka ekung'et loka etyang' kiton ng'ulu lu kebutu kimaata aputo keng'.

³ Kosodi emalaikat lokiareit abukokin acuran keng' akare. Kosodete akipi araun bala aokot ka etwan kalo etwanit, kosodi ng'ini ibore ni ejari kotoma akare atwanare.

⁴ Kosodi emalaikat lokiuniet abukokin acuran keng' ang'ololo kiton ocorin luka akipi, kosodete akibelokin araun aokot.

⁵ Kasodi eong' akiirar emalaikat lo epolokiit akipi ebala, “Atubonokineta nu isub ijo edolito, okwai lokalaunan, ijo lo ijii bobo kijii.

⁶ Kobukosi kesi aokot ka itung'a ka Akuju kiton nuka ikadwarak, kanuka ng'unu inak ijo kesi aokoto akimata!”

⁷ Keirari eong' eporoto elomuni ka altari ebala, “Eebo, Lokapolon Akuju loka Apedor kere, atubonokineta kon eraito nuka abeite bobo kodolito.”

⁸ Kosodi emalaikat lokiwong'onet abukokin acuran keng' akolong', koisikinete akicue itung'a ka akimi.

⁹ Kicueik kesi amwanus na dedeong', kosodete kesi kere akilam ekiror ka Akuju lo ejaasi ka apedor kuju ka ikapulin kalu. Konye mam kesi aking'ere arokusio kes ka akimaa akibusesu keng'.

¹⁰ Kosodi emalaikat lokikanyet abukokin acuran keng' okicolong' ka etyang'. Atipet kosodi akirionus arapakin ajakaanut keng', kogeunete itung'a keng' akonyokony ang'ajepa kes kanuka kapipilu,

¹¹ kosodete kesi akilama Akuju loko kuju kanuka ariebon kiton ajimii kes. Konye mam kesi akinyekin asoma iboro lukarokok.

¹² Kosodi emalaikat lokikanyetkape abukokin acuran keng' Ang'ololo nakapolon nako Yufurets, kowonikini cut kajaikin eroto lokitorito ijakaa alomun ko kide.

¹³ Kasodi eong' anyun ajokin auni nukarokok nu aputosi ka adodoka. Alomunenete ka akituk ka eparait, kiton naka etyang', kiton akituk ka ekadwaran loka aliokonu.

¹⁴ Eraito kesi imoyoi ka ajokin lu isomaete aumosia. Imoyoi lu iuni elosete nama ka ijakaa kere kaluka akwap, atukokin kesi nenipe kanuka ejie kapaaran kanakapolon naka Akuju loka Apedor kere.

¹⁵ “Kiirasi! Abuti eong' bala ekokolan! Erereng' nesi lo ekwenyi, kidari inagai keng' tetere emam nesi kelosi ekinyoro ka asilikin koking'aren ka itung'a!”

¹⁶ Kosodete imoyoi atukokin ijakaa nenipe alaro na enyarite ka ang'ajep ka Iyaudin Armageddon.

¹⁷ Kosodi emalaikat lokikanyetkaare abukokin acuran keng' ouria. Kolomuni eporoto lokapolon kokicolong' kalo ajii toma Otogo ka Akuju ebala ebe, “Esomakin!”

¹⁸ Kojaikin akimilia, akiruruma kiton akiretunun ka edou, kiton akijang'ajang'a ka akwap nakaronon noi. Mam apelem de kejaikina akijang'ajang'a ka akwap ape kesubere etung'anan; na nesi akijang'ajang'a naka akwap nakaronon kama kanuce kere!

¹⁹ Kotiakete ere lokapolon irwan kauni, kosodete amunaun ireria lukapolok luka akwapin kere. Kiituni Akuju Babilon nakapolon ka akitamat nesi ebino alomun kokikopot keng'--ebino lokanyunyuranut keng'.

²⁰ Kosodi ng'in alaro na imanamanakiito akipi awoli, kowoliete imoru kere.

²¹ Kosodete akako nukapolok nukejaatatar ape ka alang'iru naka ikiloi akaisakany adacanakin otung'a alomun kokuju akitodol na elamiata itung'a Akuju kanuka ikaupulin luka akako, naarai etukurianete ikaupulin noi.