Apukokinio 14 - AKITUTUKET NAKITETET (NEPEPEKA ISABULIN KA AWARAGASIA)

Imerekek nepepe ka Itung'a keng'

¹ Kasodi eong' ang'oliar, kanyuni eong' Imerekek egwoi komoru kaloko Sayon; ka nesi ajaasi itung'a 144,000 lu kigirakiite oreta kes ekiror keng' kiton loka Papa keng'.

² Keirari eong' eporoto elomuni kokuju egiro bala akipi nu ebukuna kwap, kwape ka akiretun ka edou. Apupo bala ekiruke lo irukosi lukerukok eramete adeudeun kes.

³ Kogwoete itung'a 144,000, iboro iwong'on lu ejarete, kiton imojong'koking'aren ka kekicolong' loka ang'osibib; erukosi kesi ekiruke lokitetet, lokebeikinete kesi bon akisisia. Kesi bon nes alakun.

⁴ Eraito kesi ikiliok lu edarata awate kes kolaete mam kisomato kedurakina ka aberu; eraito kesi ibekon. Etupito kesi imerekek ng'ini laro ni elosi nesi. Alakun kesi alomun kamaka etung'anane kere bobo eraito kesi lu sodit lu edusio Akuju kiton Imerekek.

⁵ Mam kesi kejenuna king'alaete; mam kesi arokusio.

Imalaikan Iuni

⁶ Kasodi eong' anyun emalaikat ece eporotoi kouria, ka akirot naka ikaru kere naka kiro kanukajokak alimokin itung'a luka akwap, namaka itung'a lu egelegela amunyin, atekere, akituk, kiton akwapin.

⁷ Kotemari nesi keporoto kaloko kuju, “Koyong'itete Akuju, koinakisi nesi akibusesu naarai adolu apak naka atubonokin keng'; kimaata nesi lo asubi akuju, akwap, akare nakapolon nepepe ka icorin luka akipi.”

⁸ Kotupakini emalaikat lokiyareit losodit ebala ebe, Ebiror nesi, ebiror Babilon nakapolon, abu nesi koinak itung'a kere akimata ebino keng', ebino lo ecasit kotoma akote keng' nukarokok!

⁹ Kotupakini emalaikat lokiuniete iare lu ageito, ebala keporoto kaloko kuju ebe, “Ng'ulu kere lu emaete etyang' kiton aputo keng' kosodete adumun ekung'et koreet kes kere kakan kes.

¹⁰ Emasete kesi ikulopek ebino ka Akuju, ebino loka anyunyuranut keng', lo abukoki nesi toma okikopot loka adedeng'u keng' ka agogong' kere! Ng'ulu kere lu isomaete nu isicanio kotoma akimi kiton esalfa koking'aren ka imalaikan kiton Imerekek.

¹¹ Apuru naka akimi kana isicani kesi eikari kuju ikaru kere. Mam akiyeng'un akware ka apaaran kamaka ng'ulu kalu imaete etyang' kiton aputo keng' kiton ng'ini kere ni ejaasi ka ekung'et loka ekiror keng'.”

¹² Ekote nu atitinyu kamaka itung'a ka Akuju, ng'ulu lu eyong'ito ikisila ka Akuju bobo emunokito Yesu.

¹³ Kasodi eong' akiirar eporoto alomun kokuju ebala ebe, “Kigir nu: Erereng' ng'ulu lu etwakete kotoma akijaanakin lokapolon ageun kipokona!” Kinyakuni Emoyo ebe, “Eebo teni! Elakarosi kesi akiyeng'un kamaka asoma kes nu icasito, naarai adumunete kasoma kes eikarete ka kesi.”

Adwenyo Kakwap

¹⁴ Kang'oliari eong', kasodi eong' anyuni edou lokakwang'an, eputosi ka okoka ka etwan, ejaasi ka abokok naka esawabu kakou keng' kiton ering'a lo ekwana kakan keng'.

¹⁵ Kosodi emalaikat ece alomun kotogo ka Akuju kosodi adelor keporoto kaloko kuju nama kalo eboe kodou ebe, “Kitosoma ering'a kon, kodweny idwenyan, naarai adol akolong'; elokokina akwap adwenyo!”

¹⁶ Kosodi nesi lo eboe kodou akigwakin ering'a keng' kwap, kodwenyete akwap kere.

¹⁷ Kasodi eong' anyun emalaikat ece elomuni kotogo ka Akuju kokuju. Ajaasi nesi de ka ering'a lo ekwana.

¹⁸ Kosodi emalaikat ece lo epolokiit akimi alomun ka altari. Koceluni nesi keporoto kaloko kuju namaka emalaikat lo ajaasi ka ering'a lo akwanan ebala ebe, “Kitosoma ering'a kon, kong'er emusabibu komanikor kaloko kwap, naarai akono emusabibu!”

¹⁹ Kosodi emalaikat akigwakin ering'a keng' akwap, kong'eri emusabibu kateniek, kacakakin nama ecuere ebino loka anyunyuranut ka Akuju na ededeng' noi.

²⁰ Kocuete emusabibu kama ecuenenere koking'aren ka lokapolon. Kolomuni akaale naka awokot erait akilomitai akwatai auni kaujau kiton apiarit amitai are iduloro kwap.