Apukokinio 13 - AKITUTUKET NAKITETET (NEPEPEKA ISABULIN KA AWARAGASIA)

Ityeng' Iare

¹ Kasodi eong' anyun etyang' elomuni ka akare. Ajaasi ka amuguar atomon kiton akwes akanykaare; kang'in mugwarata keng', ajii abokoki, kang'in kou keng' ajii ekiror lo arasi Akuju.

² Aputosi etyang' kiton erisa, ajaasi ka akejen bala nuka etyang' lo ededeng' noi lo enyarite edubu ka akituk bala naka eng'atuny. Abu emun lokapolon koinak etyang' apedor keng' ka elopet, ka ekicolong' keng' kiton apedor keng' na epolo.

³ Akou ape naka etyang' asiit bala kikang'asite noi, konye kebu ajimii kong'aleu. Koumokini akwap kere kosodi akitup etyang'.

⁴ Abu ng'ini itwan komaa emun lokapolon naarai kebu nesi koinaki etyang' apolou keng'. Komaete kesi etyang' de ebalasi, “Ng'ai eputosi ka etyang'? Ng'ai ebeikini akitijii nesi?”

⁵ Kocamakine etyang' ejori akiro nuka akirata Akuju, kosodete acamakin nesi ajaus ka apedor kolapio akaisawong'on ka iare.

⁶ Kogeuni akilama Akuju, ekiror keng', alaro na iboya nesi nepepe ka ng'ulu kere lu iboyete kokuju.

⁷ Kocamakinete nesi akitijii itung'a ka Akuju kakilanya kesi, koinakinete nesi apolokiite ng'olo ekitekere, akwap, ang'ajep nepepe ka erangi.

⁸ Itung'a kere lu iboyete ka akwap ebunete akimaa nesi akilanya ng'ulu lukegeite akigiri iroria kes okitabo loka akijar ka Imerekek kani kebun kwarai ering'a akwap kesubuna.

⁹ Kejii ipede ni ejaasi ka akit kinyeknesi kopup:

¹⁰ Ng'ini kere ni itemokina akikamun teni ikamuno; ng'ini kere ni itemokina ario ka kekileng' teni ario ka ekileng'. Nu ekotos atitinyu kiton amuno kowai ka itung'a ka Akuju.

¹¹ Kanyuni eong' bobo etyang' ece lo alomun ka akwap. Ajaasi ka amugwar aare bala nuka imerekek, kosode akinerakin bala asatanit.

¹² Ajaasi nesi ka apedor na apolo alomun kamaka etyang' kalo sodit, kosodi nesi akitosoma apedor ng'ini koking'aren ka etyang' kang'oli. Kikurak nesi akwap kiton ng'ulu kere lu ejaasi toma neni akimaa etyang' losodit lokedaut ajimii keng' ang'aleun.

¹³ Abu etyang' lokiyareit lo kisoma aumosia nukapolok; kitolomu akimi alomun kokuju abunere kwap koking'aren kang'in itwan.

¹⁴ Kosodi aking'alakin itung'a kere lu iboyete kakwap kokipone kaloka asoma aumosia nu kecamakiite nesi asoma koking'aren ka etyang' kalo sodit. Kolimokini etyang' kesi kitenata aputo kanuka etyang' kalo kikang'asite kekileng' kalokaujan konye kojari.

¹⁵ Kocamakinete etyang' lokiyareit akutakin euria nama ka aputo naka etyang' kalo sodit, tetere ebeikini aputo inera kosodi akiara ng'ulu kere lu mam kebeikinete akimaa nesi.

¹⁶ Kikurakini etyang' itung'a kere, lukadisiak nepepe ka lukapolok, lu ebarito kiton lu epalipalito, ijoloi kiton lu elakakina, kigwakine ekung'et akanin kes nuko teten kere de oreta kes.

¹⁷ Amam itwan ipede abeikini agwela kere de akitegwel mam kejaasi ka ekung'et na, nes atemar, ekiror ka etyang' kere de enamba loka ekiror.

¹⁸ Nu ekotosi acoa. Ng'ini kere ni eperiana ebeikini ajenun apolou ka enamba ka etyang' naarai apolou ka enamba ka ekirori ka etwan. Enamba keng' erait akwatai akanykape ka akaisakanykape ka ikanykape.