Apukokinio 12 - AKITUTUKET NAKITETET (NEPEPEKA ISABULIN KA AWARAGASIA)

Aberu kiton Emunu lokapolon

¹ Kosodi aumosit nakapolon atakanun kokuju. Ajii aberu na arait enaga keng' akolong', na ajii elapa kwap ka akejen keng' kiton abokok naka akanyere atomonkaare akou keng'.

² Aput nesi akidoun, kosodi apipilu kiton ican luka akidoun ikoku ainakin nesi edelori.

³ Kotakanuni aumosit ace kokuju. Ajii emunu lokapolon lokareng'an lo ajaasi kakwesi akanykaare kiton amugwar kiton abokok ejii kuju ka ng'ini kou.

⁴ Kopiari ekosete keng' atutubet ape kamaka iuni ka akanyere nuko kuju kacakakin kesi kwap. Kogwoi nesi koking'aren ka aberu, tetere nesi ilikori ikoku keng' nape idounere.

⁵ Kosodi nesi akidoun ikoku ni sapat, lo ebuni akipuga akwap kere ka ebela kalokecumat. Konye kodemaret nesi ikoku kosodete ayar nama ka Akuju nepepe ka ekicolong' keng' loka ang'osibib.

⁶ Kokere aberu moding', alaro nakitenakiit Akuju nesi; nama idaere nesi apaarasia aritata ape kakwatai aare ka kais akanykape.

⁷ Kosodi ejie ajaikin kuju. Kosodete Mikael kiton imalaikan keng' akitijii Asatanit, lo abu kitijii kesi nepepe ka imalaikan keng';

⁸ konye kilanyete Asatanit, kosodete akiteng'er nesi nepepe ka imalaikan keng' mam akiboi kokuju bobo.

⁹ Kocakarete king'a Asatanit nakapolon noi--emun ng'olo loka sek lo enyarite Asatanit lo eng'alae akwap kere. Kocakunete nesi kwap nenipe ka imalaikan keng' kere.

¹⁰ Keirari eong' eporoto lokapolon noi kokuju ebala ebe, “Adolu kona alakuno ka Akuju! Etodia kona Akuju apedor keng' kwape ka Ejakait! Kipokona etodia Emesaya keng' apedor keng'! Naarai acakar kwap, nesi lo agwoi koking'aren ka Akuju wok ka akiwosa ikanacan kiton akanacan wok akware ka apaaran.

¹¹ Elanyata kesi nesi ka aokot ka Imerekek nenipe ka akirot kes naka akitejenunar, naarai mam kesi amina akijar kes akitodol atwanare.

¹² Kolele konye, wu kuju ka osi lu iboyete kotoma kaneni! Konye tukui ijo, wu akwap ka akare nakapolon, naarai ejesun asatanit nama kus enyunyura noi naarai ejeni ebe euriana akolong' keng'!”

¹³ Na anyuna asatanit ebe kecakun nesi kwap, kotupi nesi aberu na kidouti ikoku ni kiliokit.

¹⁴ Koinakinete nesi abenokoka aare nuka ekokom ka Lokapolon tetere eporori nesi alaro keng' komoding', nama idarere nesi kokaru kiuni ka atutubet, kotenan emam asatanit kikang'asi nesi.

¹⁵ Kobukuni asatanit akipi kakituk keng' bala ang'ololo kokau keng' tetere edakarete nesi.

¹⁶ Konye king'arakini akwap aberu; kong'ari akituk keng' kakilikor akipi nu kelomuto kakituk ka asatanit.

¹⁷ Kosodi asatanit anyunyurikin ka aberu kosodi aikar akitijii auri ka aberu, ng'ulu kere lu eyong'ito ikisila ka Akuju komunokiitete Yesu.

¹⁸ Kosodi asatanit akigwo kawai ka akare.