Apukokinio 10 - AKITUTUKET NAKITETET (NEPEPEKA ISABULIN KA AWARAGASIA)

Emalaikat kiton ekitabo lo edit

¹ Kasodi eong' anyun emalaikat ece lokapolon ijesuna kwap alomun kokuju, erapakiite kodou, ejii etolo akou keng', ereete keng' ajii bala akolong', akejen keng' araito bala ipirin ka akimi.

² Ajaasi nesi ka ekitabo lo edit eng'ara ka akan keng'. Kigwakini nesi akeju keng' nakoteten toma akare, kigwakini nakokidieny akwap,

³ kiworori koporoto kaloko kuju, bala eng'atuny irurumae; na ewororo, kocelunete akireta kidowon akanykaare.

⁴ Nakedaun acela kidowon ikanykaare, aput eong' akigirakin konye keirari eong' eporoto alomun kokuju ebala ebe, “Kigwa nu atemasi akireta kidowon ikanykaare, mam akigirakin.”

⁵ Kosodi emalaikat lo anyut eong' egwoi ka akare kiton kwap akikiar kuju akan keng' nako teten

⁶ kosodi akiyapokin kokiror ka Akuju, kalo ejari ikaru kere, lo asubi kuju, akwap, kiton akare, kiton ng'ini ibore kotoma kes. Kotemari emalaikat ebe, “Mam bobo adaute akolong'!

⁷ Konye nape ekutakina emalaikat na kikanyetkaare arupepe keng', edauni Akuju akitemeteme keng' na mam ketakani, kwape kelimokiitere nesi ikejaanakinak keng', ikadwarak.”

⁸ Kosodi eporoto lokeirarit eong' inera alomun kokuju alimokin eong' bobo ebala, “Koloto koyaa ekitabo lo eng'ara lo ejii akan ka emalaikat kalo egwoi ka akare kiton akwap.”

⁹ Kalosi eong' nama kemalaikat ka aking'it nesi koinak eong' ekitabo lo edit. Kolimokini nesi eong', “Koya konyam; epapang'ar kakooki kon konye kakituk kon ejijimar bala asig.”

¹⁰ Kalemuni eong' ekitabo lo edit kakan keng' kakinyam, ajijim noi kwape ka asig kakituk kang'. Konye kadau eong' akilikor, kosodi adwarar kakook kang'.

¹¹ Kosodete alimokin eong', “Itemokina ijo bobo adwarun kuju ka itung'a kalu ipu, ka akwapin, ang'ajepa kiton ijakaa.”