Apukokinio 1 - AKITUTUKET NAKITETET (NEPEPEKA ISABULIN KA AWARAGASIA)

¹ Erait ekitabo lo asomisio nu apukori Yesu Kristo. Keinakini Akuju nesi apukokinio na kanuka akitodikin lukejaanakinak keng' nu itemokina akisomakin kapaarasia kanu apete. Kebu Kristo kitejenik ejaanakinan keng' Yoana iboro lu kokipone kaloka akijukiar emalaikat keng' nama ka Yoana,

² bobo alimo Yoana ng'unu kere nu anyu nesi. Nu nes akiro keng' ikamuut akiro alomun kamaka Akuju nepepe ka abeite na etodia Yesu Kristo.

³ Erereng' ng'ini ni isomae ekitabo lo, bobo de erereng' ng'ulu lu epupete akiro nu edwarite kosodi akiyong' nu igirite toma okitabo lo! Naarai apu apak na isomakinototor iboro lu kere.

Amalan namaka ikanisai ikanykaare

⁴ Eong' Yoana nes egirakiit ikanisai ikanykaare lu ejaasi oprovinsi loko Asia ebe Asianut ka aipuc kojaasi nepepe ka osi alomun kamaka Akuju kalo ejii, kalo ajii, kiton kalo ebuni, bobo alomun kamaka imoyoi ikanykaare koking'aren ka ekicolong' keng'

⁵ bobo alomun kamaka Yesu Kristo, eketodiaran lo emunokina, losodit alomun kamaka lukatwak, bobo lo erait lo ipisi ijakaa luka akwap. Emina nesi oni, bobo kanuka atwanare keng' naka isubanit, nes ayuuna nesi oni karokusio wok

⁶ kosodi akitaraun oni ajakanut naka isaserdotin kanuka akijaanakin Akuju keng' kiton Papa. Kojii akibusesu kiton apedor ka Yesu Kristo ikaru kere! Ikote nepeneni.

⁷ Kiteete, ebuuti nesi kodowon! Ng'in itwan anyuni nesi, imorikikit ng'ulu lu kicumete nesi. Itung'a kere ka akwap ebunete akimony kanu keng'. Ikokinete nepeneni!

⁸ Ebala Lokapolon Akuju lokapedor, lo ejii, lo ajii, kalo ebuuti ajaus ebe, “Eong' nes losodit kaloka esial.”

Eruja Kristo

⁹ Arait eong' Yoana, onac kus, bobo bala lokatupiton Yesu, arait eong' lo amorete ka osi akikany ka atitinyu ican lu ebunete nama kalu ejaasi toma Ajakanut keng'. Abutu kipiakine eong' akwap na ejii kiding' ka akare kanako Patimos naarai esiarisiarit eong' akirot ka Akuju kiton abeite na kitodiarit Yesu.

¹⁰ Kayait eong' Emoyo Lokalaunan ka apaaran kanaka Akuju, keirari eong' kokau kang' eporoto lokapolon bala arupepe

¹¹ ebala ebe, “Kigir nu itee ijo kokitabo bobo kijukiya okanisai ikanykaare; Efeso, Smurna, Pagamo, Tiatira, Sadis, Piladelfia kiton Laodisea.”

¹² Kebong' eong' anyun ng'ai kenerasi ka eong'. Na ebong'ia eong' kanyuni eong' ipirin ikanykaare lu itogwoere atarai nu itenite kesawabu,

¹³ kokiding' ka agwoyes ka atarai, ajii epe lo aputosi ka okoku ka etwan, lo anapit enaga lokaujan bobo ayenikiit aturub keng' karokoba kana itenite kesawabu;

¹⁴ akwang'aka itima keng' bala ajulo, kere akako; bobo anokete akonyen keng' bala akimi,

¹⁵ etacaute akejen keng' noi, nu elosite kakim, eporoto keng' aruo bala acela naka akipi nu ipuaka nu edacunosi kwap;

¹⁶ erumit nesi kakan keng' kanakoteten akanyere akanykaare, kolomuni kakituk keng' ekileng' lo ipienite iwaitin iare, acaete akonye keng' bala akolong' na ecae kiding' paran.

¹⁷ Na anyuna eong' nesi, kasodi eong' akibirokin akejen keng' bala itwan ni etwanit. Kidokokini nesi akani keng' nako teten nama kang' ebala ebe, “Mam akurianu, eong' nes losodit bobo lokesial,

¹⁸ eong' nes lo ajari; atwanit eong', konye kipokona ajari eong' ikaru kere, bobo ajaasi eong' kilaceta luka atwanare kiton akimi.

¹⁹ Kigir konye iboro lu itee ijo, lu ejaasi kiton lu isomakinosi kokau.

²⁰ Ikamut aumosia kuju ka akanyere akanykaare nu iyanyuto osi kakan kang' kanakoteten, kiton agwoyes ka atarai akanykaare nu itenite ka esawabu, akanyere akanykaare eraito imalaikan luka ikanisai ikanykaare. Agwoyes ka atarai akanykaare nu itogwoere atarai eraito ikanisai ikanykaare.