2 Timoti 4 - AKITUTUKET NAKITETET (NEPEPEKA ISABULIN KA AWARAGASIA)

¹ Kelipit eong' ijo koking'aren ka Akuju kiton Yesu Kristo kalo ebuni atubonokin lu ejarete ka lukatwak bobo kanu ebuutere nesi akipuga erait ejakait ebe,

² kisiarasiara akirot ka Akuju, kerait apaki na ejokuna kere na erono. Kimaima, korwaa, kisicata itung'a itawon kes, kitolosite atitinyu ka akisisianakin.

³ Ebuut apak na eng'eriata itung'a akipup akisisianakino naka abeite. Konye ebunete kesi atupite nu itiminarito kesi ikulopek. Bobo etukokinete kesi kakipuakus noi lukesisianakinak lu ebunete alimonokin kesi nu ekotosi akii kes akiirar.

⁴ Inyekinete akipup abeite kotupiete awaragasia nu ejeete itung'a.

⁵ Konye itemokina ijo ayaite akwana kon kapakio kijokin; kikanyakiite ican, kisoma asoma nukaraus lokesiarasiaran Akiro Nukajokak, bobo kisoma asoma kon kere bala loka ejaanakinan ka Akuju.

⁶ Konye eong' adol akolong' nakalemunere eong' kwape ka isubanit. Na nes apak kang' nakatwanare.

⁷ Adau eong' ejie kojokan, adau eong' akerite, aricaki eong' akiyuun.

⁸ Konye kipokona ibore ni idarit eong' koking'aren erait ainakino abokok na idumuni ijo kanuka adolite, na einakini eong' Lokapolon, Lokatubonokinan lo edolit Apaaran ng'ini. Konye mere bere eong' bon, konye ng'ulu kere lu iderito nesi kobong'u.

Akiro ka Elope

⁹ Kotamaki cut kobuu nama kang' atipet.

¹⁰ Kanuka aminuute akwapa nakipokona na, enyeki Demas eong', aika Tesalonika. Aika Kresenes Galatia, aika Tito akwap nako Dalimatia.

¹¹ Luka bon nes ejaasi ka eong'. Kokou Mariko, kobuutu ka nesi ne, naarai ebeikiit nesi aking'arakin eong' asoma.

¹² Abu eong' kejukia Taikikas akwap nako Efeso.

¹³ Apak na ibunia ijo, koyau akoti kang' na enyekiitere eong' Karpo ko Troa. Koyau ikitaboi de, kacut lu igirir kitenitete kimukulei.

¹⁴ Abu Alekisanda loketenan iboro kaswai kisomaki eong' nukarokok noi. Ebuni Lokapolon akitaca nesi atupa kanu esoma nesi.

¹⁵ Kocoikina ka nesi, naarai etepegi nesi kakitukurian nu esisianakinete siong'.

¹⁶ Amam itwan ipede abu kigang' eong' apak nasodit na egang'itere eong' akwana kang'. Apotu itung'a kere kinyekisi eong'. Elipit eong' komam Akuju ketubokini kesi kanuka ng'unu!

¹⁷ Konye abu Lokapolon kojaikinosi ka eong', koinakini eong' agogong'u, naka akisiarasiara akiro kotenan tetere iirarete ilong'au kere. Kanuka ng'un apon koyuune eong' kakituk keng'atuny.

¹⁸ Ebuni Lokapolon ayuun eong' ka arokusio kere ka ayaari eong' kotenan Ajakaanut keng' nako kuju. Akibusesu kojei nepepe ka nesi ikaru kere! Ikote nepeneni.

Emalan Lokesial

¹⁹ Kimalakisi eong' Priska kiton Akwila kiton etogo ka Onesifor.

²⁰ Abu Erasto kideun ko Korinto, kenyekini eong' Trofimas ko Miletas edeka noi.

²¹ Kotamak cut kobuu ering'a apaarasia nuka akiru ka ataus ii kedolo. Kimalato ijo kes ka Yubulo, Pudens, Lino kiton Klaudia nenipe ka ikanacan ka akanacan kere.

²² Kojei Lokapolon ka ijo komoyo. Asianut ka Akuju kojaasi ka osi kere.