2 Timoti 3 - AKITUTUKET NAKITETET (NEPEPEKA ISABULIN KA AWARAGASIA)

Apaarasia Nukesial

¹ Kojenete ebe ejaikinosi ican noi apaarasia nukesial.

² Ebuniete itung'a amina awate kes bon, ejaikinosi ka emwane, ka epogi, ka akitopolooro, arata, komam ayong'ite imojong' kes, komam kejaatatare ka akiyalama, kisomaete nukarokok,

³ komam amina, komam akisoni, eraunete lukasabasakak, luka adedeng'u, lu itukurianete, mam keminunete nukajokak;

⁴ ebunete abilibili ibotei, komam kepodosi, kobuitete ejaasi ka epogi, eminunete nukarokok nu italakaarito kesi konye mere Akuju;

⁵ ejaikinosi ka aputo naka ayong'ite Akuju konye kang'erite agogong' keng'. Kolwanikina kamaka itung'a kwape kang'ulu.

⁶ Ice kama kes elosiete otogoi ka itung'a ka ayaite aberu nu enonok nu inuyarito aronus, koyaite kesi aminanar naka iboro kalu egelegela,

⁷ aberu nu etamakiito ng'ini pak akisisia konye mam cut kejenunete abeite.

⁸ Ekipone lo etepegiata Janes kiton Jambres Musa nes ekipone itepegiata itung'a lu abeite, itung'a lu emam adama nes kisomaete bobo lu ebirorosi ka akiyuun kes.

⁹ Konye mam kedolete nama elwana naarai etakanuun aliokonu kes kotung'a kere kwape esomakinototor kamaka Janes kiton Jambres.

Acorasia nuka Esial

¹⁰ Konye itupu ijo akisisianakino kang', iponosio kang', kanu akote eong' asoma kang'aleu; akiyuun kang', atitinyu kang', amina kang', kiton akikanya kang',

¹¹ akisicanio kang', ng'unu kere nu abutu kisomakinosi eong' ko Antiok, Ikoniam, kiton Listra, akisicanio na abu eong' kekany! Konye abu Lokapolon koyuu eong' kang'unu kere.

¹² Itisilaro ng'ini kere ni ekote akijar na itiminaarit Akuju naka akimorikikina ka Yesu Kristo,

¹³ konye itung'a luka arokusio kiton luka esoswai ebunete akitolosite karonus noi ing'alaete luce king'alaete luce de kesi.

¹⁴ Konye ijo, kitolosite amunokiite cut ng'unu nu isisiau ijo ka amunikin cut, ijeni ijo namaka ng'ai nes kisisiauna ijo,

¹⁵ bobo ijeni ijo ebe ape sek kekiditeu kon, ijenu ijo Agirasia Nukalaunak nu ebeikiito ainakin ijo acoa nakiinakini ijo ayuuno akitoro amunokiite Yesu Kristo.

¹⁶ Agirasia Nukalaunak kere igirite atupa ka ayaite ka Akuju, bobo ejooka kakisisianakin abeite, ka akiretanakin kanuka apacarite, ka arwaanar arokusio kiton akisisianakin adolite,

¹⁷ tetere itwan ni ijaanakini Akuju ilesikina, kolokokina asoma ng'unu kere nukajokak.