2 Timoti 2 - AKITUTUKET NAKITETET (NEPEPEKA ISABULIN KA AWARAGASIA)

Loka ajore loka Yesu Kristo lo Eyong'ara

¹ Ijo okoku kang', kicasite atupa ka asianut kana edumun kanuka akimorikikina wok ka Yesu Kristo.

² Koricakiite akisisianakino na ibu ijo kopupu eong' esiarisiari koking'aren ka ikajenak kalu ipu, koinak itung'a lu emunokina lu ebeikiito kesi de akisisianakin itung'a luce.

³ Konyama ican kwape kaloka ajore ka Yesu Kristo kalo eyong'ara.

⁴ Loka ajore lo isomae ka agogong'u, ekotenene akitalakaarite lo epolokiit ajore. Kanuka ng'un, mam nesi kisomae asoma nukang'aleu kanaka akwap kana.

⁵ Lokakeran lo ekeri mam kedumuni idutan kemam nesi keyong'it ikisila.

⁶ Itemokina loka akoruon lo esoma asoma nu ipu akigee adumun araito.

⁷ Kiitunun kuju kanu abala eong', naarai kiinakini Lokapolon ijo apedor naka ajenus nu kere.

⁸ Kiitutu Yesu Kristo, lo etajaruno katwanare, lo arait auri ka Daudi kwape isisianakinere ka Akiro Kanukajokak kanu esiarisiari eong'.

⁹ Ecana eong' kanu esiarisiaria eong' Akiro Nukajokak. Bobo koyenete eong' bala lo ekokoit. Konye akirot ka Akuju mam ketokite,

¹⁰ kanuka ng'un ekanyakiit eong' ng'in ibore kanuka itung'a ka Akuju kalu eseute, tetere edumunete kesi de akiyuun na edumun akitor namaka Yesu Kristo ka ayaun akibusesu na emam esial.

¹¹ Erait na abeite: “Kitwakito oni ka nesi, ibuniete oni de akijar ka nesi.

¹² Kitolototo oni atitinyu, ibuniete oni de akipuga ka nesi. King'erokisi oni nesi, nesi de king'erokini oni.

¹³ Kimam oni kimunokina, edeuni nesi emunokina, naarai mam nesi kebeikiit aking'ala nesi elope.”

Lokejaanakinan lo edolit lo atiaku Akuju

¹⁴ Kisiitoki itung'a kon nu, bobo kikwenya kesi koking'aren ka Akuju kinyekisi apega kuju ka akiro. Emam akiro ng'un ajokus apede adepar amunaute itung'a lu epupiete.

¹⁵ Kotamaki cut acamuno koking'aren ka Akuju kwape ka lokejaanakinan kalo emam kejaasi ka asilut kanuka asoma keng', konye bala ng'oli lo isisianakini itung'a kotenan akirot naka abeite naka Akuju.

¹⁶ Kinyekinosi ka akinamanama kana emam kitiminaarit Akuju kiton naka abang'aanut, na ireng'iarit itung'a namaka lwanan alomari kamaka Akuju.

¹⁷ Akisisianakino ng'ini erait bala ajimi na enyemi akwana. Aimanus kiton Piletas kes itung'a iare lu isisianakinete iboro ng'ulu.

¹⁸ Enyekisi eroto loka abeite bobo de etoronata akiyuun ka ikeyuunak ka ice kokipone kaloka atemar ebe adau ajarun wok akisomakin.

¹⁹ Konye apetetait na icasit na adau Akuju adukokin mam kijang'ajang'akino. Kuju keng' igirakiite akiro nu: “Ejeni Akuju ng'ulu lu eraito lukeng'.” Bobo “Ng'ulu kere lu ebalasi ebe kesi luka Lokapolon itemokina akibeleun ka arokusio.”

²⁰ Ko otogo kalo epolo, ejaasi iboro igelelgela. Ejaasi luka esawabu, luka epuesa, luka akito kiton adwat. Ice itenite katenikina kanakapolon noi, ice katenikina kanaka ng'ini paaran.

²¹ Kanuka ng'un, kinyekinosi itwan kere ka arokusio kang'unu kere, erauni nesi ibore ni itosomao kokipone ka Lokapolon. Naarai adaun aseun nesi bobo ejaasi nesi ka ajokus kamaka Lokapolon keng', bobo elokokina nesi kasoma kere kanukajokak.

²² Kinyekinosi ka aminanar naka atelepaanut konye kokooto adolite, amuno, amina kiton aipuc bobo imorikikina ijo kang'ulu kalu ilipiete Akuju kitawon kalu elaete.

²³ Konye kinyekisi apega naka abang'anut kawolite. Ijeni ijo ebe esial keng' erait ang'olopa.

²⁴ Lokejaanakinan ka Akuju, mam kitemokina ang'olopa. Konye itemokina nesi araus ni ejokuna kamaka itung'a kere, ni ejeni akisisianakin bobo kotitiny,

²⁵ korwanari kakiyapepera lu itepegete nesi. Naarai ebeikiit Akuju einakini kesi apak naka akibeleun kojenunete abeite.

²⁶ Kaneni ebeikinete kesi akikuu aloketa ka Asatanit, lokedaut akikamun kesi kanuka asoma nu ekote nesi.