2 Petero 3 - AKITUTUKET NAKITETET (NEPEPEKA ISABULIN KA AWARAGASIA)

Akitumunikinete kuju kabunore ka Lokapolon

¹ Ipoupatin kang' luminan, lo nes ebaruait lokiareit lo egiraki eong' osi. Kobarua kiare kere atamaki eong' akitonyoun awomowomosia nukajokak ka adama kus kokipone kaloka akisitokin osi akiro nu.

² Akote eong' osi akitun akiro nu enerito ikadwarak lukalaunak sek, kiton akicorasit alomun kamaka Lokapolon Ekalakunan na ainakinete ikiyakia kus osi.

³ Na sodit itemokina osi akijen ebe kapaarasia kanukesial kanu etakanunete itung'a ice lu eyait emwane ka awate kes. Ebunete kesi akwenare osi

⁴ kosodete aking'it ebe, “Asumunikiit nesi abunore, mere? Wali ejii nesi? Adautu imojong' wok atwakare, konye ering'a ng'ini ibore ejii kwape ajaare ape kesubere akwap!”

⁵ Itebeikiito kesi aking'ere abeite ebe kebu Akuju sek kolem akicorasit, kosodete akisub kuju kiton akwap. Kesubio akwap alomun ka akipi, bobo itosomao akipi

⁶ bobo akipi, akipi nuka akaale nes amunaunere akwap naka sek.

⁷ Konye ka akirot kanipe kang'ini nes idaritere akujusinoi kiton akwap nu ejaasi kipokona, tetere emunauno ka akim. Inyekiite kesi akitodol apaaran na etubonokinere ka akiara itung'a lukarokok.

⁸ Konye mam akimuruokin abeite ape na, luminat kang', ebe apaaran ape kamaka Lokapolon erait ikaru aritat ape, ikaru aritat ape eraito bala apaaran ape.

⁹ Mam Lokapolon kiyamiyami asoma nu esumuniki nesi, kwape itunanata ice. Konye ikanyakiit nesi osi, naarai mam nesi kekote komudiare itwan ipede, konye ekote nesi kinyekisi itung'a kere arokusio kes.

¹⁰ Konye ebuni Apaaran ka Lokapolon bala ekokolan. Kapaaran kang'in, ewoliete akujusinoi kacela kanako kuju, ebunete akanyere asisii ka amudiaro, ewolie akwap kang'in ibore kotoma keng'.

¹¹ Kanu emunaunere iboro lu kere kokipone kalo, itemokina osi araus itung'a luka ekipone kali? Itemokina akijar kus alaus kalemikina kamaka Akuju,

¹² iderito osi cut ka agogong' Apaaran ka Akuju kobuu — Apaaran na esisiata akujusinoi kamunauno, kosodete akitacalaar akanyeren kamwanus.

¹³ Konye iderito oni nu esumuniki Akuju: Akujusinoi kiton akwap nakitetet, ere ka kadolite.

¹⁴ Kanuka ng'un, ipaupatin kang', iderito osi Apaaran ng'ini, kigwakisi agogong' alaus osi cut emam arokusio apede koking'aren ka Akuju bobo ka ajaus ka ainapakina kang'in ka nesi.

¹⁵ Kwanyutu akikany ka Lokapolon wok erait bala apak na einakiit nesi osi ayuuno, kwape egirakina Paulo, onac wok lo ominat osi, itosomae acoa na ainakini Akuju nesi.

¹⁶ Nu kes nu ebala nesi kobaruai keng' kere igiri nesi kuju kanu. Ejaasi iboro ice lu icasito obaruai keng' lu isisianakinete itung'a lubang'aisik kaliokonu kwape ekokinata kesi Agirasia ace. Kanuka ng'un eyauto kesi atwanare kes kikulopek.

¹⁷ Konye osi, ipaupatin kang' idautu ajenuni nu. Kanuka ng'unu kocoikinosi tetere emam awolite kalu enwang'ito ekisil kitapaete osi kosodete osi akibirun alomun kalaro kus kana ideere

¹⁸ Konye kitolositete apolou kama kasianut kiton ajenus naka Lokapolon wok, Ekeyuunan Yesu Kristo. Kojei akibusesu ka nesi, lolo ka ikaru kere! Ikote nepeneni.