2 Petero 2 - AKITUTUKET NAKITETET (NEPEPEKA ISABULIN KA AWARAGASIA)

Lukesisianakinak Lukaliokonu

¹ Kotakanutu ikadwarak lukaliokonu de kotung'a, kwape ejaikinototor lukesisianakinak luka aliokonu kokiding' kus, lu eyaunete akisisianakino nukamunaunak, nukaliokonu, atikere aking'ere Ejakait lo agweli kesi, ayaun nama kes ka ikulopek amudiaro naka atipet.

² Konye kong'in de lu ipu etupete irotin kes luka arokusio; bobo kanuka nu isomaete kesi, ebunete luce ejori nukarokok kuju ka Erot kaloka abeite.

³ Komwane kes, ebunete lukesisianakinak luka aliokonu luka ameda kama kus kanuka alimonokin osi akapolok nu ejeute. Kapak kana euja kipokona alokokin lokatubonokinan kes, bobo ekenyi loka mudiaran kes.

⁴ Kemam Akuju akideun imalaikan na kisomakinata kesi aronus, konye abu kocakak kesi akim kosodi akipiakin kesi aduyoko nuka akwap naka lukatwak kiboto akitodol apak naka atubokin;

⁵ kemam nesi akideun akwap naka sek, konye kideuni Noa, lo alimonori kuju ka adolite nepepe ka itung'a ice ikanykaare na ayauna nesi akaale ka akwap ka itung'a lukarokusio.

⁶ Abu Akuju kotuboki ireria lukapolok luko Sodoma kiton Gomora kamunaun kesi ka akimi, kakitaraun kesi bala aputo kanu ebunete akisomakin kamaka lukarokusio.

⁷ Abu nesi kideu Loti, etwan lokajokan, eturie kanuka lukabilak ikisila.

⁸ Abu etwan lokajokan ng'oli kiboi kokiding' kes, kicanakin ng'ini paaran itee nesi kakipup kuju ka asomisio kes nukarokok.

⁹ Kanuka ng'unu ejeni Akuju ekipone loka akitukuu itung'a lu isomaete nu itiminarito nesi alomun kamaka atamisio kes ka ekipone loka akitolosite akisican lukarokusio ering'a apaaran nakatubokino kedolo,

¹⁰ kacut ng'ulu lu etupito nu ekotosi awate kes nu emunaunete kosodete akinwang' apedor ka Akuju. Ikesisianakinak lukaliokon lu mam kejaasi ka kakurian bobo mam kejaasi ka ayong'ara, bobo mam keyong'ito iboro lukalaunak luko kuju; erasete iboro ng'ulu.

¹¹ Atikere imalaikan de lu ejaasi ka agogong'u na edepara noi kicasitete noi adepar ikesisianakinak lukaliokonu lu, mam kiwosaete kesi karato koking'aren ka Lokapolon.

¹² Konye itung'a lu isomaete mam akiitunun bala ityeng' luko moding' lu idouno tetere ikamuno ka akiara; elominikinete karaton ibore kere ni mam kesi kejenete. Ebunio akiara kesi bala ityeng' luko moding',

¹³ etacakino kesi kican kanuka ican kalu ayautu kesi. Nu itiminarito kesi erait asoma ibore kere ni isimonikini eteng'e kes loka akwana; eraito kesi asilut kimorikikinosi ka ijo akinyam, kang'ini pak elakara kanuka irotin kes lukaliokon!

¹⁴ Mam kesi kekotosi akitere ibore ipede adepar aberu nukarokusio; mam cut eteng'e kes loka asoma arokusio kimoninikin. Eyaito itung'a lu etapaka aloketa kes. Isisianakiite itawon kes emwane. Ilamit Akuju kesi!

¹⁵ Enyekisi eroto lo ideere, kewolikisi eroto kes; ketupata eroto lo ketupit Balam okoku ka Boa lo amina ikabel lu edumuni kama karokusio

¹⁶ kiretakinete kanuka arokusio keng'. Abu asigiria keng' kinere keporoto ka itwan ka akiteng'ere asomisio nukibileri nuka ekadwaran.

¹⁷ Eraito itung'a lu bala icorin lu ewokito, bala idowon lu ekutari ekuwam; edeki Akuju kesi alaro kotoma akirionus na iduloro.

¹⁸ Inerasi kesi akiro nuka epogi kiton nuka abang'anut, kakitosoma akiro nuka akwana nuka emwane alokia ng'ulu lu egeuto usa akikuu kotung'a kalu iboete kawolite.

¹⁹ Isumunikinete kesi alakakina, konye kesi ikulopek eraito ijoloi kasomisio kanukarokok, naarai itwan erait ejolot ka ibore kere kani elanya nesi.

²⁰ Itung'a lu kedautu akikuu arokusio nuka akwap kokipone kaloka ajenuun Lokapolon Ekalakunan wok Yesu Kristo, kokau kocamunete alakuno ka ayaite kesi bobo arokusio ng'un, eronari noi ejautene kes adepar sek.

²¹ Kejokuna kama kes kere komam kesi kejenuto ekipone loka adolite akilany ajenuni ekipone ng'oli kakinyekin akicorasit nakalaunan na keinakite kesi.

²² Nu kisomakinosi kama kes itodikiit ebe eraito awaragasia abeite: “Ebong'ori eking'ok akinyam ibore ni aleka nesi” bobo “Epege lo adaun akilot ebong'ori bobo akibelebelo adwat.”