2 Petero 1 - AKITUTUKET NAKITETET (NEPEPEKA ISABULIN KA AWARAGASIA)

¹ Alomuni kamaka Simon Petero, ekejaanakinan kiton ekiyakia ka Yesu Kristo. Namaka ng'ulu kalu kotoma kadolite ka Akuju wok nepepe ka Yesu Kristo Eketajaran wok adauni ainakin akiyuun nakajokan bala na wok.

² Asianut ka aipuc kojaasi nepepe ka osi kakipwakus kanuka akijen kus Akuju kiton Yesu Lokapolon wok.

Anyarauno ka aseuno ka Akuju

³ Ainak apedor ka Akuju oni ng'ini ibore ni ikotosi oni tetere ijaasi oni toma akijar naka abeite na itiminariit Akuju kanuka ajenus wok nesi lo anyarauni oni akimor akibusesu kiton ajokus keng'.

⁴ Kokipone kalo ainaki nesi oni idutan lukapolok kiton lukajokak cut lu etumunikiit nesi, tetere ikuiete osi kamaka amina iboro lukarokok na ejii akwap na, kosodete abunere akimor ejautene lokalaunan.

⁵ Kanuka atenikina kana kotamakisi cut kiyatakisi ajokus kuju ka akiyuun kus; kuju ka ajokus kus kiyatakisi akijen;

⁶ kuju ka ajenus kus kiyatakisi eyaitone kus kikulopek; kuju ka eyaitone kus kikulopek kiyatakisi atitinyu; kuju ka atitinyu kiyatakisi asoma nu itiminarito Akuju;

⁷ kuju ka asoma kus nu itiminarito Akuju kiyatakisi amina luce; kuju ka amina luce kiyatakisi amina.

⁸ Lu kesi ikisila lu itemokina ajaus ka osi. Kijaasi osi ka kesi ka akipuakus einakinete osi asoma kacalara kiton akijene Lokapolon wok Yesu Kristo.

⁹ Konye ng'ulu lu mam kejaatatare iteete nama api noi akitodol na mam kanyunata bobo emuruokisi ebe etalaun kesi karokusio kes nuka sek.

¹⁰ Kanuka ng'un, ikanacan ka akanacan, kolemunosi cut kitodiasi anyarauno ka aseuno kus, naarai kisomata osi nu mam osi cut kibirorosi.

¹¹ Kinakino osi kokipone kaloka apedor kere naka Ajakanut ka Lokapolon bobo loketajaran wok Yesu kristo na mam esial.

¹² Kanuka ng'un abuni eong' ng'ini pak akisitonokin osi kuju ka akiro kanu, atikere kidauto osi ajenun kesi kodupakina osi toma abeite na idautu adumun.

¹³ Anyut eong' ebe erait ibore nikajokan kama kang', kapak kere kana ajaria eong' ka akwap kane, akisicat osi itauon kakisiitokin osi kuju ka akiro kanu.

¹⁴ Ajeni eong' ebe kapak kana api enyekini eong' akwana na ebosi kwape kalimokitere eong' Lokapolon wok Yesu Kristo mam kigwait.

¹⁵ Kanuka ng'un atamakini eong' cut akokin osi ekipone lo ibuniata osi akitun akiro nu kapakio kere kadau eong' atwanare.

Lukajenak akibusesu ka Kristo

¹⁶ Apak na itodiarata siong' kama kus apedor kiton abunore ka Lokapolon wok Yesu mam siong' atupito akapolok nu ejeite ka acoa, konye araito siong' lu anyuto acaus keng' na acae noi.

¹⁷ Ajaasi siong' ng'ina na ainakina Akuju Papa nesi ang'osibib ka akibusesu, na alomuna eporoto kamaka Akibusesu naka polon cut ebala ebe, “Lo nes Okoku kang' lominat lo itiminarit eong'!”

¹⁸ Abutu siong' ikulopek keirasi eporoto lo elomuti kokuju na ajaatatare siong' ka nesi moru lokalaunan.

¹⁹ Bobo isicasito akiro ka ikadwarak akirot ng'ini; isomaete osi kojokan kitupata osi, naarai eputosi ka atara na ecaikiit alaro na iriono akitodol apaaran na iwalara kosodi acaus ka akanyeret naka ataparacu acaun kotawon kus.

²⁰ Na sodit, itemokina osi akijen nu, ebe mam adwarunet naka agirasia na erait ibore ni ebeikini itwan atemar ekipone lo ekotore,

²¹ naarai mam apelem adwarunet na elomuut atupa ka akote ka etwan, konye itung'a lu ayait emoyo lokalaunan enerasi alomun kamaka Akuju.