2 Ikorinton 9 - AKITUTUKET NAKITETET (NEPEPEKA ISABULIN KA AWARAGASIA)

Aking'arakin Ikristayon luce

¹ Mam atenikina eong' akigirakin osi kuju ka aking'arasit na eyaro nama ka itung'a ka Akuju ko Yudea.

² Naarai ajeni eong' ilokokina osi aking'arakin, epoga eong' kanu kus kamaka itung'a kaluko Makedonia. Alimokini eong' kesi ebe, “Elokokina ikanacan ka akanacan luko Akaia aking'arakin ageun ekaru lo atubor.” Esinepu akimi kus lu ipu.

³ Konye ejukuti eong' ikanacan kiton akanacan, tetere mam epogi kosi kuju kus kerauni akiro along'u. Kwape abalare eong', ijaikinos osi ilokokina kaking'arasit kus.

⁴ Kere bo kaupunosi eong' ka itung'a kice luko Makedonian, kadumun ebe mam osi kilokokina, kisilikini siong' noi, emam alimun ibore ipede kuju kasilut kus kanuka amunokiite kosi osi.

⁵ Nesi eong' akiitun ebe ederi akijukun ikanacan ka akanacan nama kus, kogeut akitemonokin inakineta lu isumunikito osi. Tetere adoluni eong' adumun elokokina, itodikin ebe ilemut osi naarai ikotoi osi, mere ebe ikurakite osi alemun.

⁶ Konye kojenut ebe itwan ni eyekini ikinyomo idis edwenyun nama edit, ng'in ni eyekini ipuaka ipwaka edwenyuni.

⁷ Ng'in itwan kama kus kolem kwape ebalar etau keng', mere kwape bala ni ikurakite, naarai emina Akuju ni elemuni elakara.

⁸ Epedori Akuju ainakin osi iboro adepar lu ikotosi osi, tetere ijaikinosi osi ng'in pak kang'in ibore ni ikotosi osi ka adepar ka akirot kere nakajokan.

⁹ Kwape ebalatatare agirasia nukalaunak: “Ekorakin nesi ketau kalokajokan ng'ulu lu ekadad; Asianut keng' iboe ikaru kere.”

¹⁰ Konye Akuju lo einakini ikonyom koyekine kiton emugati lonyamata, einakini ijo ikinyom kere lu ikote ijo kosodi nesi akitopoloun kosodete osi akidwenye nu ipu alomun kodutane kus.

¹¹ Einakin nesi osi abara na ilesikina apaarasia kere, tetere lu ipu iyalamikinete Akuju kanuka idutan kus lu adumutu kesi kama kosi.

¹² Naarai akijaanakin na isomata osi mere kakote ka itung'a ka Akuju bon, konye idouni akiyalam na eleliarit nama ka Akuju.

¹³ Kanuka akitodiaret na ayau akijaanakin kus, einakinete itung'a lu ipu Akuju akibusesu kanuka arimanut kus kamaka Akiro Nukajokak ka Kristo, lo ilimorito osi, kiton ajokun kitau kus kakimor ka kesi kang'in itwan.

¹⁴ Kanuka ng'unu ka amina na epolo kilipakinete kesi osi kanuka asianut ka Akuju na egelakina na etodik nesi osi.

¹⁵ Keyalamikisi Akuju kanuka ainakinete keng' na emam etyae!