2 Ikorinton 8 - AKITUTUKET NAKITETET (NEPEPEKA ISABULIN KA AWARAGASIA)

Akilem ka Ekristayot

¹ Ikinacan ka akanacan kosi, ikotosi siong' osi kojenutu nu esoma asianut ka Akuju ko okanisai kaluko Makedonia.

² Adaun akiteme kesi akitor ocan lu etorot kesi, konye apolo alakara kes kama kakileme kes, atikere kepalipalito kes cut.

³ Kalimokin eong' osi ebe abut kesi koinakis siong' etyae lokebeikinete alemun kamina kes,

⁴ Kilipata kesi siong' koinakine kesi apak naka aking'arakin itung'a ka Akuju ko Yudea.

⁵ Elamito nu akotosi siong' Nasodit kolemunosi kesi ikulopek namaka Lokapolon kosodi konye kamina Akuju kolemikinosi nama kosi de.

⁶ Kanuka ng'unu kemaimaete siong' Tito, lo ageun asoma nu, kitolosite kaking'arakin osi akirikakin akijaanakin na ejokuna noi naka amina.

⁷ Ibarito osi noi koboro kere lu ijaasi ka osi: kotoma akiyuun, kojor, nepepe ka akijen, kotoma alokokina kus aking'arakin bobo kotoma amina kus kama kosi. Kang'unu ikotosi siong' osi de kodutaka kotoma akijaanakin naka amina.

⁸ Mam eong' kayaut akicorasia. Konye akitodikin osi ekipone lo elokokina luce aking'arakin, atamakit eong' ajenun ekipone lo ejare amina kus kikulopek.

⁹ Ijenete osi asianut ka Lokapolon wok Yesu Kristo, kabara keng', kakitaraun elope lokapalapalan kanu kus, tetere ibarete osi kotoma apalupalut keng'.

¹⁰ Kotoma akirot na, ejokuna akirikakin nukisiaute ekaru lo atubor. Mere asoma nukakileme bon, konye ajaus ketau lo elokikina.

¹¹ Kirikakisi konye asoma! Kojaas ketau lokakirikan bala osi kitemitemete, bobo kitosomata ka ibore kani ejatatar ka osi kipokona.

¹² Kijaas ijo ketau loka alemun, ecamun Akuju idutan kon atupa kibore ni ilemun ijo, mere ni mam kijaasi ka ijo.

¹³ Mam eong' katamakit akiwoun alang'iru kamaka luce, kakitogwok osi alang'iru, erait along'u ebe king'arakisi ng'ulu lu icanasi.

¹⁴ Na ijaatatar osi ka akisitoi bobo kojaasi kesi kalu ipu, ing'arakinete kesi osi. Kopone kalo eyaro iare kere iriaka.

¹⁵ Kwape ebalatatar agirasia ebe, “Ng'in ni etukokiit nu ipumam ajaasi kanu ipu bobo ngini ni etukokini idis mam ajaasi ka idisi cut.”

Tito kiton ipaupatin keng'

¹⁶ Kiyalama siong' Akuju ainakin Tito etau kwape ikotor siong' aking'arakin osi!

¹⁷ Mam nesi acamut nu elipito siong' bon, ajaasi nesi ketau loka aking'arakin adolore abunore nama kus kakolong' keng' mam kikurakite.

¹⁸ Ka nesi ijukuto siong' onac lo eyong'ito ikanisai kere kanuka asoma keng' nukakisiarasiar Akiro nukajokak.

¹⁹ Mere ng'unu bon, aseutu ikanisai nesi alosite ka siong' akitopolor akijaanakin naka amina kanuka akibusesu ka Lokapolon

²⁰ Icoikina siong' mam akisinepun akiro nukarokok kuju kejautene kaloka idutan kalu epoloko.

²¹ Atenikina kosi erait asoma nu edolito kakonyen ka Akuju kiton akonyen ka itung'a.

²² Ijukuto siong' onac wok nenipe ka kesi. Etemoto siong' nesi erwan ipu kadumun nesi ejaasi ketau lokaking'arakin.

²³ Ikamuto Tito, erai nesi epaupa kang' lo isomaete ka eong' kanu kus; ikamuut ikanacana luce lu elosete ka nesi, eraito luka ikanisai kice einakiito Kristo akibusesu.

²⁴ Kitodikis amina kus nama kes, tetere ejenunete ikanisai kere ebe kiderete siong' ipogas kanu kus.