2 Ikorinton 7 - AKITUTUKET NAKITETET (NEPEPEKA ISABULIN KA AWARAGASIA)

¹ Lu minan, asumuneta nu kere erai kanu wok. Keyamooto ng'in ibore ni emunaari akwan kere emoyo, karaut lukalaunak cut kacoitete Akuju.

Alakara ka Paulo

² Kong'akisi siong' itauon kus. Mam siong' kidiakarito kamaka itwan, mam siong' kimunauto itwan, kere de akirod itwan.

³ Mam eong' kenera nu akitoron osi, naarai enerit eong' sek ebe ijaas osi otauon kosi, atwanare nenipe bobo akijar nenipe.

⁴ Amunokit eong' osi, kapoga kanu kus! Kocan kere atitiny eong' kalakara.

⁵ Kidaut siong' adolun Makedonia, mam siong' akiyeng'un. Ajaasi ican ng'olowai, ang'olopa kaluce, akurianu kotauon kosi.

⁶ Konye Akuju lo einanakin atitinyu, abu koinak siong' atitinyu kabunore ka Tito.

⁷ Mam arait abunore keng' bon nes kitalakari siong', konye bobo arait akirot keng' ekipone lo kiinakinata osi nesi atitinyu. Kolimok siong' ekipone lokikotor osi anyun eong', ekipone lo ilokokina osi akigang' eong', alakara eong' noi kipokona.

⁸ Atikere kitakadikit osi ebaruait kang', mam eong' kelipit akarimao eong' nesi egiri. Tia eong' elipit akarimao kere kaanyut eong' osi ilipete akarimao kapak kana edit.

⁹ Konye alakara eong', mere kanu etakadikina eong' osi, konye akadakin kus abu koinak osi akibelokin irotin kus. Kitosoma Akuju akadakin ng'in, kang'un mam siong' kikang'asito osi.

¹⁰ Naarai akadakin na itosomae Akuju eyauni akibelosit namaka etau lo idirarit ayuuno bobo emam akimonyo! Konye akituuru naka ejautene ka akwap eyauni atwanare.

¹¹ Koanyut nu esoma Akuju kotoma akadakin kus, akitodikin ebe mam osi akiro! Bala anyunyura, akurianu, adumun nu ekote etau, alokokina akitisilar lu ediakarito! Itodikis osi ikulopek ebe emam osi aronus ka akiro kanu kere.

¹² Kang'unu atikere kegirakiit eong' osi, mam arait ebe kanuka ng'ini ni esoma aronus, kere de ng'ini ni isomakino aronus. Konye egiri eong' kanuka akitodikin osi itee Akuju, ekipone lo ilemuna osi kama kosi.

¹³ Ng'in nes atenikina ajatatar siong' ka etau loka atitinyu. Mere ainakin siong' etau lokatitiny bon, arait ekipone lo etalakara Tito siong' kalakara keng' naking'arakinata osi nesi!

¹⁴ Epoga eong' kanu kus kama keng', mam osi kisikadakito eong'. Enerata siong' abeite ng'in pak nama kus. Kokipone kalope kang'olo nu epogakito siong' Tito arau abeite.

¹⁵ Kanuka ng'unu epoloe amina keng' kama kus, kwape iitunana nesi ekipone lo ilokokina osi akiyong' acorasia keng', kekipone lo idiaunata osi nesi kakurianu kiton arimara.

¹⁶ Alakara eong' noi naarai ajaasi eong' kamunokina kama kus.