2 Ikorinton 6 - AKITUTUKET NAKITETET (NEPEPEKA ISABULIN KA AWARAGASIA)

¹ Kasoma wok nenipe ka Akuju, kilipito siong' osi ng'ulu lu adumutu asianut ka Akuju mam ajalakin komunaun.

² Kiirasi nu ebala Akuju: “Kedolu apak nakacamun osi, abu eong' kapup osi; Kedolu apaaran na eyuuna eong' osi, abu eong' keng'arak osi.” Kiiras! Na nesi apak naka akidyauni amina ka Akuju, lolo nesi apaaran nakakiuuno!

³ Mam siong' kikotos itwan adumun aronus kasoma kosi, itamakito siong' cut mam akirebokin eroto ka itwan kipede.

⁴ Konye itodikinete siong' osi ebe iraito siong' lukejaanakinak ka Akuju kang'in ibore ni isomaete siong' kotoma atitinyu kocan, aalangiru kiton akekesu.

⁵ Iposite siong', eyenyite siong', ecelakite siong', kitaari siong' asoma bobo mam ajoo kere inyamen.

⁶ Kalaus naka etau, akijen, akikany, asianut na itodikit siong' ikulopek ebe irai siong' lukejaanakinak ka Akuju ing'arakiit Emoyo Lokalaunan, bobo kamina kosi naka abeite,

⁷ kotoma akiro kosi nuka abeite, ka apedor ka Akuju. Ijaasi siong' ka adolite bala ijisio kosi, alomikina ka akigang' siong' ikulopek.

⁸ Eyong'ite siong' kanwang'ite de, erasite siong' kakitama de. Koyaasi siong' kwape lukaliokonu kwabo ineras siong' abeite,

⁹ bala lu mam kejenuna, konye ejenuna kojokan, bala lu etwakete konye kijarete siong', bala lu itisilarite konye mam kaarite;

¹⁰ ituriete konye elakara akolong' kere, epalipalito, konye itabarete lu ipu, mam kejatatar kibore kipede konye ijaasi kang'in ibore.

¹¹ Lu minan kotoma Ikorinton! Etebeikisi siong' alimokin osi, eng'ara itau kosi.

¹² Mere siong' kes igolokiito itawon kosi nama kus, konye erait osi kes igolorito itawon kus kama kosi.

¹³ Enera eong' kipokona bala osi idwe kang', kong'asi itauon kus kwape ang'akinata siong' osi. Kong'asi itauon kus.

Akwenyaret kuju ka iponosio kalu mam kiyuuto

¹⁴ Mam atamakin asoma nenipe kalu mam kiyuuto, naarai mam kebeikinosi. Ikoni adolit nepepe ka adiakar eupasi ai? Ikoni acaus kiton akirionus iboete nenipe ai?

¹⁵ Ikoni Kristo ka Asatanit iirarosi ai? Inyena emorete ni ejaasi ka akiyuun kani mam akiyuun?

¹⁶ Anyena akiirara ejaasi ka Etogo ka Akuju ka aputon? Naarai iraito oni Etogo ka Akuju kalo ejari! Kwape ketemaritere Akuju elope, “Abuni eong' adukun ere kang' ka akiboi kokiding' kes. Arauni eong' Akuju kes, bobo eraunete kesi itung'a kang'.”

¹⁷ Kanuka ng'un ebala Lokapolon, “Ejii osi akinyekin kesi ka agitar kama kes. Kinyekinosi kang'ini ibore nikaronon. Kasodi eong' acamun osi.

¹⁸ Arauni eong' papa kus, iraunete osi isapa ka apesur kang'. Atema Lokapolon Loka apedor.”