2 Ikorinton 4 - AKITUTUKET NAKITETET (NEPEPEKA ISABULIN KA AWARAGASIA)

Abar Nakalaunan kamotio nuka elupe

¹ Akuju kotoma akitim keng' ainakin oni asoma nu, kanuka ng'unu mam siong' kibwalara.

² Ing'eroto siong' nu igwaite nuka ilec, ing'eroto siong' aing'ala, kere de amunaun akirot naka Akuju. Konye akitodikin kabeite ebe, ibusakinit siong' akitodun ikulopek kakonyen ka Akuju kiton kakonyen ka awomisio kang'in itwan.

³ Kigwaite Akiro Nukajokak nu isiaresiarete siong', igwaite kamaka ng'ulu kalu ewoliorito.

⁴ Etumuduk kesi akuju loka akwapa adama kes kalu mam kiyuuto kinyekisi anyun acaus na ecaikiit kesi, acaus naka Akiro Nukajokak nuka akibusesu ka Kristo, lo erait aputo ka Akuju.

⁵ Naarai mam siong' kisiaresiarete kuju kosi; isiaresiarete siong' Yesu Kristo Lokapolon, siong' ikulopek iraito ikejaanakinak kus kanuka Yesu.

⁶ Akuju lo alimun, “Kinyek acaus kocau kamuton!” Erai Akuju ng'openg'ol nesi etacauni acaus keng' kotauon wok, ayaun oni akijene naka akibusesu ka Akuju ecae kakonyen ka Kristo.

⁷ Konye oni lu ijatatar kabara nakalaunan iputosi ka amotio nuka elupe kanuka akitodiar ebe apedor na epolo erait naka Akuju mere na kosi.

⁸ Kisicanio oni kang'olo wai, konye mam kipiricara; akolong' ace ejii abuonokin konye mam abwalari,

⁹ kisicanio, konye mam kinyekino; kibirokino kwapa, konye mam kemudiaro.

¹⁰ Ng'in pak edakite kakwana atwanare ka Yesu, tetere akijar ka Yesu etakanun kawate wok.

¹¹ Naarai ijarete oni ijaas oni ocan lukatwanare kanuka Yesu, tetere etakanun akijar keng' kawate wok.

¹² Kong'in ejii atwanare isomae kotoma wok, konye akijar ejii nama kus.

¹³ Kanu ijaatatare oni ka emoyo epe loka akiyuun kwape igiritere ebe, “Enerit eong' naarai eyuut eong'.” Siong' de kinerasi naarai kiyuuto siong'.

¹⁴ Kijen siong' ebe Akuju lokitajaruni Lokapolon Yesu, itajaruni siong' nenipe ka Yesu, kayaar siong' ka nesi, king'aren keng'.

¹⁵ Eraito nu kere kanu kus, tetere edolokin asianut ka Akuju itung'a lu ipu, itopolorete akibusesu ka Akuju kakiyalama.

Akiboi kakiyuun

¹⁶ Kanuka ng'unu mam oni kipasete itauon. Atikere kemunaunosi awate wok nuko king'a, iteteo awate nuko toma ng'in paaran.

¹⁷ Ican lu luka apak kana etubete, eyatakinete oni akibusesu na elang'ir noi akilanya ican.

¹⁸ Naarai mam oni kitete iboro lu etakanete, konye iboro lu mam ketakanete. Naarai lu etakanete etuborosi atipet kapak kana edit, konye lu mam ketakanete iboyete ikaru kere.