2 Ikorinton 2 - AKITUTUKET NAKITETET (NEPEPEKA ISABULIN KA AWARAGASIA)

¹ Kanuka ng'unu katiakuni eong' mam abunore nama kus bobo.

² Kere katiakut eong' akitakadikin osi, tia ng'ai ideun akitalakar eong'? Itung'a ng'ulu bon lu etakadikit eong'.

³ Ng'in nes atenikina egirikina eong' osi ebaruait ng'olo, mam eong' akote abunere nama kus kosodete itung'a lupe ng'ulu akitakadikin eong' lu itemokina akitalakar eong'. Naarai ajeni eong' cut ebe alakara eong', ilakara osi de kere.

⁴ Egirakin eong' osi ebaruati lo ecana eong', elang'ir etau, bobo amonyi akiyo nu ipu noi, atenikina kang' mam arait akitakadikin osi, konye ainakin osi ijenunete etyae lo aminare eong' osi kere.

Erimakino ni ediakarit

⁵ Kejii itwan ni itakadikiit nice, mam kitakadikiit eong', konye kokipone kece, etakadiki osi kere.

⁶ Kanuka itwan bala ng'ini, ilesikina akitisilaro na elomun kamaka lu ipu.

⁷ Kanuka ng'unu imokina arimakin ka aking'aing'a nesi, along'u ebeikini akituur na epolo akilanya nesi.

⁸ Elipit eong' osi cut kitejenikisi nesi ebe iminasi osi nesi.

⁹ Egirakin eong' osi ebaruait ng'ol naarai akote eong' ajenun nama igwoyata osi bobo kilokokina osi akiyong' acorasia kang'.

¹⁰ Ni irimakinete osi, arimakini eong' de. Ni arimak eong' kejii eong' arimakin, arimakin kanu kus koking'aren ka Kristo,

¹¹ kanuka akitamamun Asatanit ajaus kuju wok, naarai ijenete oni nu itemitemi nesi.

Eburut Paulo ko Troa

¹² Kadol eong' Troa akisiarasiara Akiro Nukajoka nuka Kristo, kadumuni eong' keng'a Lokapolon eroto loka asoma kang'ina.

¹³ Konye eyalong'i eong' noi, naarai mam eong' adumun onaci wok Tito. Kasodi eong' akinyekin kesi ka aikar Makedonia.

Akitelekar akitoro nama ka Kristo

¹⁴ Akiyalama namaka Akuju, lo king'aranikini oni ng'in pak kotoma Kristo akilanya. Bobo akitoro nama wok isiarakini nesi akukunyu naka akijene nesi ng'olo wai.

¹⁵ Naarai iraito oni bala asaus na ekukuny na etasauni Kristo kamaka Akuju, isiarakin namaka ng'ulu lu ilokonyunos kiton ng'ulu lu ewolito.

¹⁶ Kamaka ng'ulu lu ewolito, erait asaus nakabosan na ari, konye kamaka ng'ulu kalu ilokonyunos, erait asaus na eyauni akijar. Ngai konye epedori asoma bala ng'unu?

¹⁷ Mam siong' kiputosi kang'ul lu ipu lu ekotosi adumunete kamaka akiro ka Akuju, konye kwape ejukuna Akuju siong', eneras siong' abeite koking'aren keng', kwape ka ikejaanakinak ka Kristo.