2 Ikorinton 13 - AKITUTUKET NAKITETET (NEPEPEKA ISABULIN KA AWARAGASIA)

Akwenyarata ka Amalan nakesial

¹ Na nesi erwan nakiuniet eong' akipejokin osi. “Tar ng'in aiwosa kitogogong'osi ikajenak adepar iare” Kwape ebalatatar agirasia nukalaunak.

² Adaut eong' akikwenyar ng'ulu lu esomato arokusio sek, kiton luce kere. Ekwenyari eong' kesi kipokona emam eong' kajii kwape esomakina eong' apaki naka apejo kang' kanakiareit ebe, kabu eong' bobo, emam itwan ni enyekini eong'.

³ Ikotosi osi aitodiaret naitogogong'i ebe inera Kristo kama kang'. Mam nesi kenonok, ejaas kapedor kotoma kus.

⁴ Naarai kanonoku kwarete nesi komusalaba, ejari nesi ka agogong' ka Akuju. Kakimorikikina ka nesi inonok oni de, konye kakijar kosi kiton osi, imorete oni apedor ka Akuju kakijar keng'.

⁵ Kong'icakinos kakitemokin osi ikulopek, koanyut kijaas osi akiyuun. Mam osi kabeitee kijenete ebe eji Yesu Kristo toma kus? Kerebo ipusara osi!

⁶ Amunit eong' ebe ijenunete osi mam siong' kipusara.

⁷ Konye kilipito siong' Akuju ebe mam osi asoma aronus, mere kanuka akitodikin ebe elanyata siong', konye tetere isomaete osi nuiderete, atikere kiraito siong' bala luipusara.

⁸ Naarai mam siong' apedor asomaikin ibore akitepeg abeite, konye abeite bon.

⁹ Ilakara siong' inonok konye icasito osi. Kilipakito siong' osi adolite.

¹⁰ Na nesi atenikina egiria eong' alwanikina ka osi. Erait kong'in tetere adoluni eong' mam eong' ketosomae apedor ka Lokapolon nainak eong' kanyunyura, apedor nakakiduk osi, mere anyinyil osi.

¹¹ Ang'etakin eong', ikanacan ka akanacan kang', kaanyunosi! Kitodolikisi ejautene kus, kitalaka nice ka nice, kiboete kakinapakina. Ejaikinosi Akuju loka amina kiton aipuc ka osi.

¹² Kimalakinosi ka nice kanuikin kanakalaunan. Kimalaete osi itung'a ka Akuju.

¹³ Kimalato ijo lukalaunak kere.

¹⁴ Elipit eong' ebe, asianut ka Lokapolon Yesu Kristo, amina ka Akuju, ka eidicane loka Emoyo Lokalaunan kojaasi ka osi kere.