2 Ikorinton 12 - AKITUTUKET NAKITETET (NEPEPEKA ISABULIN KA AWARAGASIA)

Irujasinoi kiton Apukoreta ka Paulo

¹ Tar kepoga eong', atikere kemam kejokuna. Konye ejii eong' ejori kuju ka irujasinio kiton apukoreta nu ainaki eong' Lokapolon.

² Ikaru itomon kawong'on lu atuborosi, aji Ekristayot mutan lo aponi kokopore kuju cut. (Mam eong' kajeni kisomakina nu tenii kere bere kerait eruja, Akuju bon nesi ejeni).

³ Abong'okini eong' ebe ajeni eong' etwan lo apon kokopore ka ayaari nesi Paradiso (bobo de, mam eong' kajeni kisomakina nu tenii kere bere eruja, Akuju bon ejeni),

⁴ kang'ina kiira nesi iboro lu emam inerunos, iboro lu emam ebusakinit etung'anan alimun.

⁵ Epoga eong' kanuka etwan kalo, konye mam eong' kepoga kanu kang', edepar iboro luitodikito akipiang'ar ka agogong' kang'.

⁶ Mam eong' kabang'ana akote eong' apoga, naarai nu enera eong' erait abeite. Konye mam eong' apoga, naarai mam eong' akote itwan akote nuedeparito kama kang' akilanya nuaanyu esomae eong' kakiirar nuatema eong'.

⁷ Konye kawai kamaka epogi kanuka iboro kalukajokak kalu anyu eong', koinakinete eong' ariebo naka apipilu, na isomae bala ekijukane loka Asatanit kanuka akitamamuun eong' epogi.

⁸ Kelipi Lokapolon erwana auni kuju kanu, keng'isi eong' nesi kolema kama kang'.

⁹ Konye kinyakuni ebala ne, “Asianut kang' nesi itemokina ijo, kanu epolor agogong' kang' akolong' naeditar agogong' kon.” Alakar eong' noi, akipoga kaditeu ka agogong' kang', tetere adumun akigang'io kamaka agogong' ka Kristo kokuju kang'.

¹⁰ Elesikin eong' akiditeu ka agogong', araton, ican, akisicanio, kiton alang'iru kanuka Kristo. Naarai edit eong' agogong', ecasit agogong' kang'.

Iyalolong'i Paulo kuju ka Ikorinton

¹¹ Esomae eong' kwape ebang'ai, konye osi ikokis eong' asoma kong'in. Erai osi ilesikina akitodun ejenunete kus kam kang'. Karaida kamam eong' karait ibore, mam eong' kadit kamaka ng'ul “ikiyakia” kus luegelute.

¹² Aumosia nuipuak nuitoduto ejenunete ebe arai eong' ekiyakia etodikis kama kus katitinyu.

¹³ Ekipone ali keyaiter osi namemam kejokuna kwape ikanisai luce, akilanya bon amam eong' eng'isit osi aking'arasit kikabel? Kicamit korimakis eong' kanuema eong' kadoliter!

¹⁴ Erai na erwan nakiuniet eong' alokokin abunore akipejokin osi, mam eong' keng'isi osi ibore. Akote osi mere ikabel kus. Mam idwe keinakinete ikauriak kes, konye erait ikauriak nes einakinete idwe kes.

¹⁵ Eyalamikin eong' akitosoma nuejaas ka eong' kere, ka eong' elope de, kanuka aking'arakin osi. Mam osi kiminunete eong' naarai amina eong' osi noi?

¹⁶ Icamunete osi ebe amam eong' arait alang'iru kama kus. Konye etamar itwan ice ebe arait eong' okunyuk, kalopun osi kaliokonu.

¹⁷ Kekon eong' etosomae osi ai akitor namaka luejukun eong'?

¹⁸ Kelipi eong' Tito kipejoki osi, kejukuni eong' ikanacan ice Ikristayon nenipe ka nesi. Itamarete osi ebe kebu Tito kitosoma osi nama karonon? Mam eong' ka nesi kijaasi kiponesio lu eputosi kasoma kwape atenikina apei?

¹⁹ Kimunito osi ebe apak na kere itataete siong' ejenunet kosi kama kus? Mam! Ineras siong' kwape ekotor Kristo siong' ejori koking'aren ka Akuju, ka iboro kere lu isomaete siong'. Luminan, isomasi nu aking'a'arakin osi.

²⁰ Akuriana eong' ebe adumun eong' osi igelakina kamaka ejautene kalo akote eong' osi ajaus, idumunete osi eong' de agelakina kwape kikoter osi de eong' ajaus. Akuriana eong' ebe adumuni ang'olopa, eding', anyunyura kiton ationus, araton kiton elodo, epogi kiton akitabulikina.

²¹ Akuriana eong' ebeikini Akuju akitisilikin eong' koking'aren kus kabong'u eong' bobo, adelor eong' kuju kang'ul lu mam kiyamoto aronus nakisomato kokolong' sek, lukiboro kalukarokok kiton aronus nakadotei kes.