2 Ikorinton 11 - AKITUTUKET NAKITETET (NEPEPEKA ISABULIN KA AWARAGASIA)

Paulo kiton Ikiyakia luka aliokonu

¹ Kere kibeikinete osi acamun eong' kabang'anut kang'. Kicamit kong'irikis!

² Anyuut eong' aronus ko otau kang' kama kus, kwape ka Akuju, iraito osi bala apese na adau eong' akisumunikin etwan epe akimanya, nes Kristo elope.

³ Konye akuriana eong' ebe ebuto amunaun adama kus kosodete osi akinyekin akimaa Kristo kabeite, ekipone ng'openg'ol king'alakina emun Iva kaliokonu nakacoa.

⁴ Naarai icamuto osi cut ng'in itwan ni ebuni nama kus isiarisiari Yesu lo egelakina, mere Yesu lo isiarisiarete siong'. Icamuuto osi Emoyo kiton Akiro nukalaunak nukaliokon nuegelakina kama kanukidumunete osi kama kosi.

⁵ Amunit eong' mam eong' kadit kamaka ng'ul kalu enyarite, “Ikiyakia” kus!

⁶ Kerebo mam eong' kajen akinimnim ejori, konye mere kakijen adut siong' akitodikin osi nu kakolong' kijokis kojautene kere.

⁷ Mam eong' ketataci osi ibore esiarsiar eong' akiro nukajokak nuka Akuju kama kus, eyamuna eong' elope tetere itopoloro osi. Kabu eong' kesoma aronus?

⁸ Esomae eong' nama kus, ikanisai ice katacete eong'. Katamasi arodi eong' kesi tetere aking'arakin osi.

⁹ Ajaasi eong' ka osi ajii eong' akadada ikabel, mam eong' akisial osi akote aking'arasit. Koinunete eong' ikanacan ka akanacan luko Makedonia ibore kere lu akote eong'. Kwape sek, kiton apaarasia nu ebuto, mam eong' ka ainakin osi alang'iru!

¹⁰ Kwape ejaar abeite ka Kristo toma kang', esumunikin eong' osi ebe mam ketataun epogi kang' tii kalaro kere ko Akaia.

¹¹ Enera eong' nu naarai mam eong' kamina osi? Ejen Akuju ebe amina eong' osi!

¹² Etolosit eong' asoma nuesomae eong' kipokona, tetere egaliori “Ikiyakia” luce ng'ul kamaka ajaus katenikina kere nakepogi, kejori kes ebe isomaete kesi ekipone epe loisomata siong'.

¹³ Itung'a ng'ul eraito ikiyakia lukaliokonu, ing'alaete kuju kasoma kes, ebalas ebe eputos kesi bala ikiyakia lukabeite luka Kristo.

¹⁴ Mam ariang'un! Kebeikin Asatanit atemar ebe eputos nesi ka emalaikat loka acaus!

¹⁵ Kang'un, mam kitete ikejaanakinak keng' ebalas eputos kesi ka ikejaanakinak lukadolite. Kosiale edumunete nuitemokina ka asomisio kes.

Ican ka Paulo erait Ekiyakia

¹⁶ Enyogokin eong' bobo, mam itwan akiitunun ebe abang'an eong'. Konye kiituto osi kong'in, kocamut eong' bala ebang'ai, tetere ajaasi eong' kani ipogar eong'.

¹⁷ Ajeni eong' nuenera eong' kipokona mere nueminar Lokapolon eong' kalimu, kotoma akiro nukepogi, enera eong' cut bala etwan lo bang'ai.

¹⁸ Konye kwape ejatatar luipogas kuju kateninkina kakwap, esomae eong' de kong'in.

¹⁹ Icoak osi ikulopek, kacamute ibang'aisik!

²⁰ Icamuto osi itwan kere niicorakin osi kakitosom osi namerono, kere nielokun osi, kere nikibapi osi akonyen.

²¹ Kasilikit eong' acamun ebe, akuriaka siong' asoma iboro kapakang'ul! Konye keng'asikin itwan apoga kuju kibore, enera eong' bala ebang'ai, ang'asikin eong'.

²² Eraito Iburanian? Arait eong' Eburaniat. Elomuto kesi kauri ka Aburaam? Arai lokauri ka Aburaam.

²³ Eraito kesi ikejaanakinak ka Kristo? Asit eong' bala lokibiler, konye asit adio bere eong' arait ekejaanakinan lo ejokuna akilany kesi! Esoma ka agogong' noi, adum eong' ayeno erwan ipu, ebung'ai eong' noi, akuenene eong' koret katwanare erwan ipu.

²⁴ Irwana ikany abutu Iyaudin kolecoto eong' apariko akaisauni ka ikanykawong'on

²⁵ ilecito Iromayon eong' erwanka kauni, ape pak ibirite eong' kamoru. Elumit eong' akipi erwan auni, adaut eong'akolong'ia akaisare kiwong'on kotoma akipi.

²⁶ Kolotote kang' ajaikin eong' ocan alomun kama kobulone, kiton alomun kamaka lukademak. Ican arait alomun kama Kiyaudin kang' kiton alomun kamaka Luka akwap. Ajaikinos ican oreria lukapolok, ican kokitwi, ican kama kityeng', ican kokuju ka akipi, kiton ican alomun kamaka ipoupatin luka aliokonu.

²⁷ Ajaikin asoma kakilolitoi, apak ace emam eong' ajo, emam akinyam ka akimata, ajaikin eong' ekadito inyamata, namamecit, kere de inagai.

²⁸ Adepar iboro ice, aji eong' amwanus apaarater eyalolong' kuju kikanisai kere.

²⁹ Edit itwan agogong', editiar eong' de agogong', kedupor itwan asoma aronus, arieba eong' ko otau kang'.

³⁰ Kere keji eong' apoga, epoga eong' kiboro kaluitodikito akalanyanut kang'.

³¹ Akuju ka Papa Lokapolon Yesu, kiturwoi ekiror keng' ikaru kere! Ejeni mam eong' keng'alae.

³² Aji eong' Damaskas, kipiakin egavana lo ejii kwap ka ejakait Areta lukedarak orutei luko Damaskas akikamun eong'.

³³ Konye kijolounet eong' kwap kobukit akitotorun apedot karwatat kakui eong' kama keng'.