2 Ikorinton 10 - AKITUTUKET NAKITETET (NEPEPEKA ISABULIN KA AWARAGASIA)

Igang'i Paulo asoma keng'

¹ Eong' Paulo kemaimait eong' elope osi, lo ebalai iyapepera bobo iyamara ajaasi eog' ka osi, konye ededeng' ka osi mam eong' kajii. Kotoma akiyamara nepepe ka asianut ka Kristo.

² Elipit eong' osi mam akikurakin eong' adedeng'u na abunia eong'; naarai ajeni eong' abeikini eong' ayar ka adedeng'u ng'ulu lu ebalasi ebe isomaete siong' atupa kanu ekote akwap.

³ Erait abeite iboete oni ka akwap, konye mam oni kijiosi kanuka akote nuka akwap.

⁴ Naarai ijisio lu itosomaete oni kojie wok mere luka akwap, konye ijisio ka Akuju luka agogong', lu itosomaete oni amudiar akibois kes na icasit. Imudiarete oni epegete loka aliokonu,

⁵ itiyarete oni ibore kere nika epogi ni irebokini akijen ka Akuju, kimudiarete oni awomisio kere akitodol nama eyong'ia Kristo.

⁶ Alokokina akitisilar aking'ere eyong'ara kere, edoli ayong'ara kus.

⁷ Kiteete nu ejaasi akonyen kus. Kejii ipede ni ebala ebe erait nesi nika Kristo, kinyek nesi kiitu ilope ebe kwape eraitere nesi nika Kristo, nes araitore siong' de.

⁸ Atikere kepoga eong' nama diosi nama epolo kanuka apedor kosi, na ainakini Lokapolon siong' kanuka akiduk osi, mere kanuka amudiar osi, mam eong' kitisilikino.

⁹ Tia mam eong' kasiite bala lo etukuriani osi kibarua.

¹⁰ Naarai ebalasi kesi, “Elang'iri bobo icasito ibarua keng', konye ajaus ka akwana keng' enonok, bobo ejori keng' emam adumunete.”

¹¹ Kojenutu itung'a bala ng'ulu ebe nu atemarete siong' mam kijaasi, esomaete siong' kijaasi.

¹² Mam siong' king'asikina aputokin nenipe kang'ulu lu idelasi ikiara kuju. Ebang'aka kesi koni! Itenete ekipone lo itemototor ikulopek katubonokin ikulopek kokipone kes.

¹³ Kowai kosi, mam epogi kosi kedepar nama ekotokina, ideun katutubet kana ekotokina asoma nu esek iit Akuju siong', nu imorikikina kasoma kosi kama kus.

¹⁴ Kwape ijatatar osi atutubet ng'in, mam siong' alosete akilam kesi na abunata siong' nama kus, iyauto Akiro Nukajoka kuju ka Kristo.

¹⁵ Mam siong' kipogas kanuka asoma nu esomata itung'a ice akidepe atutubet na itemokit Akuju siong'. Konye imunokito siong' kopoloe akiyuun kus, tetere ibeikinete siong' akisomakin asoma nukapolok katutubet na adau Akuju akitemokin.

¹⁶ Ibeikinete siong' alimonor Akiro Nukajoka kakwapin kace akilam akwapa kus, bobo komam epogi kuju ka asoma nu kedaun asoma komana ka itwan kice.

¹⁷ Konye kwape ebalatatar agirasia nukalaunak, “Ng'in ni ekote akipoga ejii epogi kuju kanu esoma Lokapolon.”

¹⁸ Erait itung'a lu iitunene Lokapolon kojokan kuju kes nes teni ecamute, mere itwan ilope ebala ebe acamun nesi.