2 Ikorinton 1 - AKITUTUKET NAKITETET (NEPEPEKA ISABULIN KA AWARAGASIA)

¹ Alomun kamaka Paulo ekiyakia ka Yesu Kristo kamina ka Akuju, kiton Timoti onac wok. Nama ka ekanisa ka Akuju ko Korinto, bobo namaka itung'a kere ka Akuju ko Akaia.

² Koinaki osi Akuju Papa wok nepepe ka Lokapolon Yesu Kristo asianut ka aipuc.

Iyalamikin Paulo Akuju

³ Keyalamikis Akuju Papa keng ka Lokapolon wok Yesu Kristo, Papa lokasianut, Akuju lo elomutere aking'arasit kere!

⁴ Ing'arakit nesi oni kocan kere, tetere ijaas oni kapedor naka aking'arakin luce lu ejaasi ka ican kere lu egelagela, itosomaete oni aking'arasit na idumuto oni ikulopek kamaka Akuju.

⁵ Kwape imoriata oni kokipone kalo epolo ican ka Kristo, kokipone kang'opekang'ol kamaka Kristo imorete oni aking'arasit nakapolon noi naka Akuju.

⁶ Kecanakinos siong', erait kanuka aking'arakin osi nepepe ka alakuno kus, king'arakin siong', ing'arakin osi de bobo ka ainakin osi agogong' naka akikanya katitinyu ican kwipe kwi lu ekanyete siong'.

⁷ Amunokina kosi kama kus mam kijang'ajang'a, ijenete siong' ebe kwape imoriata osi kocan kosi, imorete osi de kotoma aking'arasit na idumunete siong'.

⁸ Ikotosi siong' akisitokin osi, ikanacan ka akanacan, ican lu adumunete oni kakwap kanako Asia. Apolo alang'iru nadakakite siong' akilanya apedor kosi, komamuni siong' amuno naka akideun ijarete.

⁹ Kageunete siong' akipup bala lu atubokin atwanare. Konye esomakinosi nu tetere ipiakinete siong' amuno kosi nama ka Akuju lo itajari lukatwak, mere nama kosi kikulopek.

¹⁰ Nesi nes ayuuni siong' kakang'asia nukarokok nuka atwanare, bobo kayuuni siong', epiakis siong' amuno kosi nama keng' ebe eyuun nesi siong' bobo,

¹¹ kwape ing'arakitotor osi siong' kalipasia kus. Kang'unu, ebong'okino alipasia kus nu ipu kanu kosi, isirereng'i Akuju siong', Irukokinete lu ipu nesi kiporotoi kes akiyalama kanu kosi.

Akibelosit kakitemtemsio ka Paulo

¹² Ipogas siong' ebe ejautene ka adama kosi isilesikit siong' ebe akijar kosi ka akwap kana, kacut ajena kosi ka osi, erait na eyaite ka abeite ka Akuju na etakani komunokina, kapedor kasianut ka Akuju, mere ka acoa ka etung'anan.

¹³ Igirakinete siong' osi nu ibeikinete osi akisoma ka akijen bon. Amunit eong' ibunete osi akijenun siong' cut kojokan,

¹⁴ tetere apaaran naka Lokapolon wok Yesu, ipogasi osi kanu kosi kwape epogatatare siong' de kanu kus.

¹⁵ Ajeni eong' cut ebe, etemtemit eong' akigee akipejokin osi, tetere idumunete osi asulwany irwana kaare.

¹⁶ Etemtemit eong' akipejokin osi alosi eong' Makedonia kiton bobo de abong'un eong', tetere ing'arakinete osi eong' ekipone loka elotote kang' loko Yudea.

¹⁷ Kijulakina awomisio kang', etemitemi eong' nu? Etemitemi eong' akitemitemisio kang', etemitemi eong' kesi bala etwan loka akwap, alokokina atemar “Eebo, Eebo” bobo, “Mam, mam” kapak kape?

¹⁸ Kwape eraitere Akuju lo emunokina, mam akitumunet kang' arait “Eebo” ka “Mam”.

¹⁹ Naarai Yesu Kristo, Okoku ka Akuju lo esiarasiarakino osi kes ka Silivano, Timoti, ka eong', mam kerait “Eebo” ka “Mam”. Erai nesi “Eebo” ka Akuju.

²⁰ Naarai nesi nes “Eebo” kakitumuneta kere ka Akuju. Na nesi atenikina akitoro nama ka Yesu Kristo, “Ikote nepeneni” wok etemario kanuka akibusesu ka Akuju.

²¹ Akuju elope nes esimorikik siong' nenipe ka osi, kotoma Kristo. Erait Akuju elope nesi kinyonyoik oni akinyet,

²² kakipiakin ajenunete keng' kuju wok, ka ainakin oni Emoyo Lokalaunan kotoma otauon wok bala akitumunikinete ebe idumunete oni ng'ulu kere lu kigwaikite oni.

²³ Eworoun eong' Akuju bala ekajenan kang' - ejeni nesi etau kang'! Ajokuna eong' akideun osi nes atiakuna eong' mam alosite Korinto.

²⁴ Mere ebe isukurakito siong' osi akiyuun, kijenete siong' ebe icasito osi kotoma akiyuun. Konye kisomaete siong' ka osi kanuka alakara kus.