1 Yoana 5 - AKITUTUKET NAKITETET (NEPEPEKA ISABULIN KA AWARAGASIA)

Akilanya wok akwap

¹ Ng'ini kere ni emunokiit ebe Yesu erait Kristo erait nesi ikoku ka Akuju. Ng'ini kere ni emina papa emina ikoku keng' de.

² Lo nes ekipone ijenunata oni ebe iminasi oni idwe ka Akuju: Erait amina Akuju nepepe ka aricakiite ikisila keng'.

³ Naarai amina wok Akuju erait aricite ikisila keng'. Ikisila keng' mam kelang'ir,

⁴ naarai ng'ini ikoku ka Akuju ebeikiit akilanya akwap. Ilanyete oni akwap akitor akiyuun wok.

⁵ Ng'ai epedori akilanya akwap? Erait itwan bon ni emunokiit ebe erait Yesu Okoku ka Akuju.

Alimor kuju ka Yesu Kristo

⁶ Nesi lo nes abuni itorit akibatisao kakipi nepepeka abukor awokot, Yesu Krisito, mere ka akipi bon konye ka akipi nepepeka awokot.

⁷ Ejaasi luketodiarak iuni:

⁸ Emoyo, akipi, aokot; bobo iuni lu kere ejaasi ka akitodiarit na eputo.

⁹ Imunokiito oni akitodiaret ka itung'a. Konye akitodiaret ka Akuju icasit noi, bobo etodia nesi kona kuju ka Okoku keng'.

¹⁰ Kanuka ng'unu, ng'ulu kere lu emunokiito Okoku ka Akuju ejaasi ka akitodiaret na kotawon kes. Konye ng'ulu lu emam kemunokiito Akuju, etarautu nesi eliokoi, naarai mam kesi kemunokiito nu atema Akuju ikamuut Okoku keng'.

¹¹ Akitodiaret nes na: Ainaki Akuju oni akijar naka ikaru kere, bobo akijar na elomuut kamaka Okoku keng'.

¹² Ng'ini kere ni ejaasi nepepe ka Okoku, ejaasi ka akijar kana. Ng'ini kere ni emam kejaasi nepepe ka Okoku ka Akuju, mam kejaasi ka akijar.

Akijar naka Ikaru kere

¹³ Egirakiit eong' osi lu imunokiito Okoku ka Akuju nu tetere ijenunete osi ebe ijaasi osi ka akijar kana emam esial.

¹⁴ Emam oni akurianu koking'aren ka Akuju, naarai ijaasi oni ka abeite ebe epupi nesi oni kilipata oni nesi ibore kere atupa ka nu ekote nesi.

¹⁵ Iirari nesi oni apaki kere na ilipiata oni nesi. Kanu ijeniata oni ebe eraito nu abeite, ijenete oni bobo ebe einakini nesi oni ibore ni ilipito oni kama keng'.

¹⁶ Kiyanyu ijo onaci kon kere kinaci kon isomae arokusio nu emam keyaunete atwanare, itemokina ijo akilip Akuju, lo einakini kesi akijar. Ikamuuto nu ng'ulu lu emam arokusio kes keyaunete atwanare. Konye ejii aronus na eyauni atwanare, mam eong' kabala ebe itemokina ijo akilip Akuju ikamuut ng'unu.

¹⁷ Adiakareta kere eraito arokusio, konye ejii aronus na emam keyauni atwanare.

¹⁸ Ijenete oni ebe emam ikoku ka Akuju ipede ni itolosit asoma arokusio, naarai idari Okoku ka Akuju kesi kotenan, bobo mam Lokaronon kebeikiit akikang'as kesi.

¹⁹ Ijenete oni ebe iraito oni luka Akuju konye akwap kijokin ejii kwap ka apugan kalokaronon.

²⁰ Ijenete oni ebe abu Okoku ka Akuju bobo ainaki nesi oni akijen, tetere ijenete oni Akuju loka abeite. Ijaasi oni oidicane nenipe ka Akuju loka abeite, oidicane nenipe ka Yesu Kristo, Okoku keng'. Lo nes Akuju loka abeite, bobo na nes akijar na emam esial.

²¹ Idwe kang', kocoikinosi ka akujun luka aliokonu!