1 Yoana 4 - AKITUTUKET NAKITETET (NEPEPEKA ISABULIN KA AWARAGASIA)

Emoyo loka Abeite kiton loka Aliokonu

¹ Luminat kang', siri kimunokisi ng'olo emoyo, konye kotamata imoyoi kwaanyutu kosesenoto kelomuuto kamaka Akuju. Naarai aikasi lukadwarak luka aliokonu lu ipu akwap.

² Kokipone kalo ijenuni ijo Emoyo ka Akuju. Emoyo kere lo ecamuni ebe abu Yesu Kristo kotoma akwan elomuut kamaka Akuju,

³ bobo emoyo kere lo emam kecamuut Yesu mam kerait loka Akuju. Erait lo emoyo kaloketepegan, lo ibutu osi kiirasi ebe ebuuti. Kanuka ng'un ejii kipokona toma akwap.

⁴ Konye iraito osi luka Akuju, idwe kang', ilanyata osi ikadwarak luka aliokonu. Naarai Emoyo lo ejii toma kus ejaasi ka agogong' noi akilanya emoyo lo ejii toma kang'ulu luka akwap.

⁵ Ikadwarak luka aliokonu ng'ulu inerasi kuju ka akiro kanuka akwap. Epupi akwap kesi naarai eraito kesi luka akwap.

⁶ Konye iraito oni luka Akuju. Ng'ini kere ni ejeni Akuju epupi siong'. Ng'ini kere ni emam kerait nika Akuju mam kepupi siong'. Kanuka ng'un, ekipone lo nes ibeikiteter oni ajenun agelakina na ejii kiding' ka Emoyo kaloka abeite kiton loka aliokonu.

Erait Akuju Amina

⁷ Luminan, kaminasi luce, naarai amina elomuut kamaka Akuju. Ng'ini kere ni emina erait ikoku ka Akuju, bobo ejeni nesi Akuju.

⁸ Ng'ini kere ni emam kemina mam kejeni Akuju, naarai Akuju erait Amina.

⁹ Abu Akuju kitodia amina keng' kama wok kopone kaloka akijukun Okoku keng' epe bon akwap tetere ibeikenete oni akijar akitor nama keng'.

¹⁰ Na nes erait amina: Mam kerait ebe kiminasi oni Akuju konye ebe abu nesi kominu oni ka akijukun Okoku keng' korau ebe akitor nama keng' nes erumakinere arokusio wok.

¹¹ Luminan, keminat cut Akuju oni ekipone lo, itemokina oni de amina luce.

¹² Emam itwan apelem ni anyut Akuju. Konye kiminasi oni luce, iboye Akuju kokiding' wok bobo amina keng' etakani kotoma wok kojokan.

¹³ Ijaasi oni ka abeite ebe ijaasi oni oidicane nenipe ka Akuju, bobo ejii nesi de oidicane nenipe ka oni, naarai ainaki nesi oni Emoyo keng'.

¹⁴ Ianyutu oni bobo ilimoerete oni ebe abu Papa kijuku Okoku keng' korau Lokeyuunan akwap

¹⁵ Kelimoo itwan kere ebe erait Yesu Okoku ka Akuju, ejii nesi oidicane nenipe ka Akuju, Akuju de ejii oidicane ka nesi.

¹⁶ Oni ikulopek ijenete ka amunokiite amina na itodikiit Akuju oni. Erait Akuju amina. Ng'ulu kere lu ejaasi ka amina, ejaasi oidicane nenipe ka Akuju bobo ejii Akuju oidicane ka kesi.

¹⁷ Itojokonite amina kotoma wok tetere ijaikinosi oni ka akicasite Kapaaran naka Atubonokino. Ijaikinosi oni ka akicasite naarai akijar wok ka akwap kana eputosi kanaka Kristo.

¹⁸ Emam akurianu kotoma amina. Amina naka abeite ireng'iari king'a akurianu kere. Kanuka ng'un, mam amina na ejii toma kang'in kere kani ekuriana kerait naka abeite. Naarai akurianu erait akitisilaro.

¹⁹ Iminasi oni naarai abu Akuju kogee sek aminuni oni.

²⁰ Kitemasi oni ebe iminasi oni Akuju, konye kading'asi oni ka ikanacan ka akanacan wok, iliokoko oni. Naarai mam itung'a kebeikinete amina Akuju lo ering'a kesi kaanyuna, kemam kesi keminasi ikanacan ka akanacan kes lu aanyutu kesi.

²¹ Akicorasit na ainaki Akuju oni nesi na: Ng'ulu kere lu eminasi Akuju itemokina amina onaci kere kinaci kes de.