1 Yoana 3 - AKITUTUKET NAKITETET (NEPEPEKA ISABULIN KA AWARAGASIA)

Idwe ka Akuju

¹ Kong'olekisi kwape aminuna Papa oni! Epolo noi amina keng' akitodolo na anyaraunere oni idwe ka Akuju. Kanuka ng'un iraito oni idwe keng'. Na nes atenikina na emamar akwap kejenia oni - ebe kemam kejeni nesi.

² Luminat kang', iraito oni idwe ka Akuju kipokona. Konye ering'a kejenuna ejautene wok lo ebuut. Konye ijenete oni ebe nape etakanuuna nesi iputokinosi oni ka nesi, naarai anyunete oni nesi kwape ejaare nesi.

³ Ng'ini itwan ni ejaasi kamuno kana kotoma ka Kristo idari akwana keng' elae, kwape elaare Kristo.

⁴ Ng'ini kere ni isomae arokusio, imarakiite ebe abil ekisil ka Akuju, naarai asoma arokusio erait akibil ekisil.

⁵ Ijenete osi ebe ketakanuut Kristo kanuka alemar arokusio, bobo emam aronus kama keng'.

⁶ Kanuka ng'un itwan kere ni ejii odicane kiton Kristo mam kitolosit asoma arokusio. Konye ng'in ni itolosit asoma arokusio mam apelem kaanyut kere de kejenuna nesi.

⁷ Mam acamun king'alak itwan ipede osi, idwe kang'! Edolit ng'ini kere ni isomae nu ideerete, kwape edoliter Kristo.

⁸ Ng'ini kere ni itolosit asoma arokusio erait nika Asatanit, naarai esoma Asatanit arokusio ape kageun. Atakanuuni Okoku ka Akuju kanuka nu, amunaun nukisomat Asatanit.

⁹ Emam ipede kamaka ng'ulu kalu eraito idwe ka Akuju itolosito asoma arokusio, naarai ejautene elope loka Akuju ejii toma kes. Bobo mam kesi kitolosito asoma arokusio kanu eraitere Akuju Papa kes.

¹⁰ Na nes agelakina na ejii kiding' ka idwe ka Akuju kiton idwe ka Asatanit: Ng'ulu kere lu emam kisomaete nu edolito kere lu mam keminasi luce, mam keraito idwe ka Akuju.

Kominasi

¹¹ Naarai nu kes akiro nu ibutu osi kiirasi ape kageun, ebe itemokina oni amina luce,

¹² komam araite bala Kain lo arait loka Asatanit kosodi akiara onac keng'. Inyo karia Kain nesi? Naarai aroko asomisio keng' kelope konye adolito nuka onaci keng'.

¹³ Siri kiumokisi, ikanacan ka akanacan, ebe kikadakiit osi akwap.

¹⁴ Ijenete oni ebe ituborosi oni kotoma atwanare ka akilomo toma akijar naarai iminasi oni ikanacan ka akanacan. Ng'ini ni emam kemina ideuna kamaka lukatwak.

¹⁵ Ng'ini ni ekadakiit onaci keng' erait nikaaran. Ijenete osi ebe emam nikaaran ni ejaasi ka akijar kotoma keng'.

¹⁶ Kokipone kalo ijenete oni amina, ebe kebu nesi kopala akijar keng' kanu wok. Itemokina oni de akipala akijar wok kanuka ikinacan nepepe ka akinacan.

¹⁷ Konye kejaasi itwan ka iboro luka akwap kana kosodi anyun onac keng' ekadad, konye komam akitim, ikoni amina ka Akuju ejii toma keng' ai?

¹⁸ Idwe kang', kenyekisi amina usa kakiro kiton ejori. Konye kaminasi kasomisio kiton abeite.

Atitinyu koking'aren ka Akuju

¹⁹ Kokipone kalo ijenunete oni ebe iraito oni luka abeite. Bobo lo nes ekipone lo icasiata oni itawon koking'aren ka Akuju

²⁰ ng'ini pak na iwosata itawon wok oni. Naarai epolo Akuju adepar itawon wok. Bobo ejeni nesi ng'ini ibore.

²¹ Luminat, kemam itawon wok kiwosato oni, ijaasi oni kakicasite koking'aren ka Akuju;

²² bobo idumunete oni kama keng' ibore kere ni ikotosi oni, kanu iricakiiteter oni ikisila keng' bobo kasoma nu italakaarito nesi.

²³ Lo nes ekisil keng', ebe itemokina oni amunokin ekiror ka Okoku keng' Yesu Kristo nepepe ka amina luce, kwape ecorakina nesi oni.

²⁴ Ng'ulu kere lu eyong'ito ikisila keng' ejaasi toma keng', nesi de ejii toma kes. Kanuka Emoyo kalo ainaki Akuju oni ijenete oni ebe iboe Akuju kotoma wok.