1 Yoana 2 - AKITUTUKET NAKITETET (NEPEPEKA ISABULIN KA AWARAGASIA)

Kristo lokeng'aranakinan wok

¹ Egirakiit eong' osi nu, idwe kang', tetere mam osi kisomaete aronus. Konye kisomaki itwan kere aronus, ijaasi oni kalo imaimai Papa kanu wok Yesu Kristo lo edolit.

² Kristo elope nes eroto lokarumakino karokusio wok, mere arokusio wok bon, konye arokusio kang'in itung'anan.

³ Kiyong'ata oni akicorasia ka Akuju, ijaasi oni ka abeite ebe ijenete oni nesi.

⁴ Ng'ulu lu ebalasi ebe ejenete kesi nesi, konye komam keyong'ito akicorasia keng', eraito iliokoisik bobo emam abeite kotoma kes.

⁵ Ng'ulu kere lu eyong'ito akirot ka Akuju nes lu eminasi Akuju naka abeite. Lo nes ekipone ibeikiteter oni ajaus ka abeite ebe imorete oni ka nesi:

⁶ Ng'ulu lu ebalasi ebe ideuna kesi emorete ka Akuju itemokina ajaus kwape kejaare Yesu Kristo.

Ekisil Lokitetet

⁷ Ipoupatin kang' luminan, ekisil lokegirakiit eong' osi lo mere lokitetet. Erait ekisil lomojong', lo apelem ejaasi ka osi ape kageunet. Ekisil lomojong' erait akiro nu adautu osi akiirar.

⁸ Konye akicorasit na egirakiit eong' osi kipokona itet, naarai abeite keng' etakani kamaka Kristo kiton kama kus. Naarai etubitoi akirionus, bobo acaus naka abeite ecae kipokona.

⁹ Ng'ulu lu ebalasi ebe ejaasi kesi toma acaus, konye komam keminasi ikanacan ka akanacan kes ejaasi kesi akirionus akitodol akolong' na.

¹⁰ Ng'ulu lu eminasi ikinacan kiton akinacan kes ejaasi toma acaus. Kanuka ng'un emam ibore ipede ejii toma kes ni einakini itwan ice asoma aronus.

¹¹ Konye ng'ulu lu emam keminasi ikanacan ka akanacan kes ejaasi toma akirionus. Elosete kesi kotoma akirionus komam akijen nama elosiorito naarai ainaki akirionus kesi amudukaanut.

¹² Egirakiit eong' osi idwe kang' naarai arimakini arokusio kus kanuka Kristo.

¹³ Egirakiit eong' osi kes ka papa naarai ijenete osi nesi lo ajaikin ape kageunet. Egirakiit eong' osi isapa naarai ilanyata osi Lokaronon.

¹⁴ Egirakiit eong' osi idwe kang' naarai ijenete osi nesi lo ajaikin ape kageunet. Egirakiit eong' osi isapa ka asapa naarai icasito osi. Iboe akirot ka Akuju kotoma kus bobo ilanyata osi Lokaronon.

¹⁵ Mam amina akwap kere de ibore kere ni erait nika akwap. Kimina ijo akwap mam ijo kimina Papa.

¹⁶ Iboro kere lu eraito luka akwap — lu ekote akwana naka arokusio, lu iteete itung'a kokotosi, kiton ng'in ibore kakwap kana lu ipogatatare itung'a emam ipede kamaka lu ni elomuut kamaka Papa. Elomuuto kere kakwap.

¹⁷ Akwap kiton ng'in ibore kotoma keng' lu eminasi itung'a etuborosi. Konye ng'ulu lu isomaete nu ekote Akuju ejarete ikaru kere.

Epading'a ka Kristo

¹⁸ Idwe kang', apu esial! Alimokiite osi ebe ebuni epading'a ka Kristo. Bobo kipokona adautu ipading'atin ka Kristo lu ipu atakanuun. Kanuka ng'un ijenete oni ebe apu esial.

¹⁹ Apotu itung'a lu kolomasi kama wok. Kere keraito kesi lu wok, tin kesi ideuna ka oni. Konye apotu kesi kolomasi tetere ejenuni abeite ebe kemam kesi kejaasi wai wok.

²⁰ Konye ainaki Kristo osi Emoyo Lokalaunan. Kanuka ng'un ijenete osi kere abeite.

²¹ Kanuka ng'un, egirakiit eong' osi mere ebe kanu imamatatare osi kijeniate abeite. Konye kanu ijeniata osi. Bobo ijenete osi ebe emam aliokonu apede na elomuut kama abeite.

²² Kanuka ng'un ng'ai konye eliokoi? Erait ng'ulu lu ebalasi ebe mam Yesu kerait Kristo. Itung'a kwape kang'ulu eraito ipading'a ka Kristo. Eng'erito kesi Papa kiton Okoku keng'.

²³ Emam ipede ni eng'erito Okoku ejaasi ka Papa. Ng'ini ni ecamuut Okoku ecamuut Papa de.

²⁴ Koricakisi akirot na ibuutu osi kiirasi ape kageunet. Kiricakisi osi akirot ng'ini, ibunete osi ajaus oidicane kiton Okoku nenipe ka Papa.

²⁵ Nu kes abu Kristo elope kisumunik oni-ang'aleu na emam esial.

²⁶ Egirakiit eong' osi nu kuju kalu etamakiito aking'ala osi.

²⁷ Konye akinyonyoikino na ibuutu osi kodumutu ideuna kama kus. Kanuka ng'un emam atenikina ikototore osi ebe kisisianak itwan kere osi. Naarai akinyonyoikino keng' kisisianakini osi ng'ini ibore, koraite abeite, emam aliokonu. Kideun kama keng' kwape esisianakina akinyonyoikino keng' ijo.

²⁸ Idwe kang' kideunosi kokidicane ka nesi, tetere na etakanuuna nesi ijaikinosi oni ka akicasite kotawon komam oni kikotosi ang'opikin nesi kanuka akurianu apaaran na ebunia nesi.

²⁹ Ijenete osi ebe edolit Kristo. Itemokina osi ajenus ebe itwan kere ni isomae nu edolito erait ikoku ka Akuju.