1 Yoana 1 - AKITUTUKET NAKITETET (NEPEPEKA ISABULIN KA AWARAGASIA)

Akirot naka akijar

¹ Igirakiito siong' osi kuju ka Akirot naka akijar, kana ajaikin ape kageunet. Eirasi siong' kuju keng', bobo anyutu siong' nesi kakonyen kosi. Eebo, aanyutu siong' nesi, bobo ajorosi akanin kosi nesi.

² Nape atakanuna akijar na, kanyunete siong' nesi. Kanuka ng'un, inerasi siong' kuju keng' ka alimonokin osi kuju ka akijar kana emam esial kana ajaasi ka Papa kosodete alimokin oni.

³ Kalimonokinete siong' osi de nu anyutu siong' kiton akiirar, tetere ijaikinosi osi nenipe ka siong' ka akimor kana ijaasi siong' ka Papa kiton Okoku keng' Yesu Kristo.

⁴ Igirito siong' nu tetere ailel kosi iyatakin noi.

Erait Akuju Acaus

⁵ Akiro nu eirasi siong' kamaka Okoku keng' kiton nu isiarisiarete siong' nes nu: Erait Akuju acaus, emam cut akirionus kotoma keng'.

⁶ Kanuka ng'un, kitemasi oni ebe imorete oni ka nesi konye bobo kajaasi oni akirionus, ing'alaete oni kojor kiton kasomisio wok.

⁷ Konye kijaasi oni toma acaus, kwape ejaare nesi toma acaus itodikiit imorete oni nenipe, bobo ilosete awokot ka Yesu, Okoku keng' oni alomun karokusio kere.

⁸ Kitemasi oni ebe emam oni arokusio, ing'alaete oni ikulopek, bobo emam abeite kotoma wok.

⁹ Konye kiyamooto oni arokusio wok kamaka Akuju, isomakini nesi asumunet keng' kasoma nu idereete: Erimakini nesi oni arokusio wok ka akitalaun oni karokusio wok kere.

¹⁰ Kitemasi oni ebe mam oni kisomato arokusio, itaraunete oni Akuju eliokoi, bobo akirot keng' mam kejii toma wok.